Lamatualain aten mia sorga noo susura ana nenelulu'
10
Basa ma, au 'ita Lamatualain ate manaselin esa, 'onda mia sorga. Aon nenemboti' noo lelee', ma hambu elus rereo' langga na boe. Matan naronda 'ona' relo, ma ei na ra mbila 'ona' ai. 2 Ana to'u susura ana nenelulu' esa mana makambembela' ena. Ana nambarii' ei 'onan sia tasi, ma ei diin sia mad'a' ata. 3 Ana nameli nahere' 'ona' singa nggasi. Nameli basa ma ndelas ndukurulu nataa na'atutute' lao hitu. 4 Lele' ndelas ndukurulu basa, ma au 'ae sura' 'o'ola na ra. Te au rena hara' esa mia sorga 'oi, “Wee! 'Afi' mufad'e ndelas kahitu' ra 'o'ola na ra reu atahori, o! 'Afi' sura' saa-saa boe.”5 Basa ma ate mana nambarii' noo ein seri sia tasi' ma seri sia mad'a' ata, so'u lima 'onan lalai neu, 6 de sumba nae, “'O'ola ngga ia, mema' teb'e! Au sumba 'endi' Lamatualain naran, huu Ana sia nakandoo losa doo ndu'u-d'oon! Ana mana tao lalai, raefafo' noo basa isi-oe na. Dad'i rena malolole! Fai' fo hita tahani' a deka-d'eka nema ena. 7 Te mete ma Lamatualain ate kahitun nae fuu ma'oan, dei fo Lamatualain tao tungga dud'u'an fo fe'esa'an atahori nda rahine' a sa. Te Ana nafad'e dud'u'an naa neu mana 'ola-'ola na ra fo mana tao-ues fee Ne. Dad'i rena malolole, huu 'o'ola ngga ia, teb'e.”a
8 Basa ma, hara' fo au rena mia lalai a, 'ola' selu' noo au nae, “Yohanis, muu sia ate fo mana nambarii' ein seri sia tasi', ma seri sia mad'a' ata a. Ha'i mala susura ana nenelulu' a fo mana makambembela' sia lima na.”
9 Basa de au 'isi' ate a, de 'o'e susura ana' naa. Boe ma ana nafad'e au nae, “Ha'i fo mua leo! Sia bafa ma, na, ma'ee' 'ona' oni oe', te sia tei ma, na, ana meru.”
10 Ana 'ola' basa ta'o naa, ma au simbo susura ana' naa mia lima na. De au 'ua. Sia bafa ngga ma'ee' 'ona' oni oe'. Te 'od'o hendi ma, tei ngga rasa meru.b
11 Boe ma, hambu esa denu au nae, “Ho musi muu mufad'e selu' saa fo Lamatualain nae tao sia raefafo'. Mufad'e saa mana nae dad'i neu basa mane' ra, roo atahori mia basa leo ra, basa nusa' ra, ma basa ded'eat ra sia raefafo'.”