Fuu ma'oa kaliman — lamat na'asususa' atahori
9
Basa ma, Ate kaliman fuu ma'oa na. Ma au 'ita nduu' esa tud'a raefafo' nema. Ara fee nggoe' esa neu nduu' a fo neu soi ndola roma' mana nda ma'iko' sa, lelesu na. 2 Ana soi ndola' a lelesun, ma masu nggeo mamafafau' dea nema 'ona' lasi nened'ed'e' masu na. Masu' naa namasu bub'ue' ata neu, losa lalai noo relo a ma'ahatu.a 3 Boe ma lamat hetar seli ratambele dea rema mia masu' naa rala, de 'onda raefafo' rema. Lamatualain fee se koasa 'ona' 'ura' e.b 4 Te Ana parenda se nae 'afi' tao milutu uru a, hau huu', ma sela-nggari' ra. Te ara musi tao ra'asususa' atahori fo Lamatualain cap na nese ree na ra.c 5 Lamatualain mbo'i lamat ra tao ra'asususa' atahori fula lima, te nda bole risa se. Sad'i tao doid'oso se 'ona' 'ura' a to'i'. 6 Sia fula lima naa rala, atahori doid'oso rala seli, losa ro'e 'a mamates. Mae 'ona' naa o ara nda bisa mate sa.d7 Au 'ita lamat naa ra mata-ao na ra 'ona' a, ndara netatis. Ara rasolo solo netatis nenetao' mia lilo. Mata na ra 'ona' atahori.e 8 Langga fulu na ra naru' 'ona' ina' ra langga fulun, ma nisi na ra tande' 'ona' singa nisi'.f 9 'Ona' ara pake pepele tenda' nenetao' mia besi, 'ona' 'u'u una' e. Lid'a na ra ralii rahere' 'ona' sold'ad'u nononggo' esa ndara na ra lea kareta netatis.g 10 'Iko na ra manaseli' ma marasot 'ona' 'ura' a rason. Ara hambu koasa fo tao doid'oso atahori rendi' raso na ra, losa fula lima. 11 Mane lamat ra, naeni malangga mia basa ate nene'oi' sia ndola doid'oso' fo nda ma'iko' a sa. Naran sia ded'ea Ibrani, Abadon, ma sia ded'ea Yunani, Apolyon. Sosoan, “Mana Tao Malutu'”.
12 Noo ta'o naa, calaka kaesan, seli ena. Te besa-b'esa, o! Huu hela fe'e calaka rua fai.
Fuu ma'oa kaneen — doid'oso' mata' telu sia raefafo'
13 Basa ma ate kaneen fuu ma'oa na. Ma 'ita mei lilo' mana matambambali' noo Lamatualain, fo ara ded'e rendi' neu hau raa ma'ameni' a. Hambu hara' kalua mia mei a sura na ra haa' se.h 14 Hara' naa nafad'e neu ate mana fe'e fuu basa ma'oan nae, “Hambu ate haa nenefutu' doo' ena sia loe monae' esa, naran Efrat. Muu mbo'i se leo!” 15 Boe ma ana neu mbo'i se, fo ara reu tao risa atahori nandaa noo too, fula, fai, ma lii' fo Lamatualain na'etu' basa ena. 'Ona' hita banggi atahori sia raefafo' neu bab'anggi' telu, na, dei fo mate hendi bab'anggi' esa. 16 Ara rafad'e au rae, ana bua naa ra, sold'ad'u mana sae ndara na ra, juta natun rua. 17 Basa ma au 'ita sold'ad'u naa ra roo ndara na ra. Sold'ad'u naa ra bab'aa tenda na ra rendi' bab'aa tenda' dula' telu naeni mana mbila kara-kara', mod'o' makahahad'o', ma huni-b'aleran. Ndara naa ra langga nara 'ona' singa langga na. Ai noo masu' ma baleran nasapupura' mia ndara ra bafa nara, 18 fo fee doid'oso' mata' telu sia raefafo'. Doid'oso' mana kalua mia ndara ra bafa na ra, risa esa mia bab'anggi' telu, mia basa atahori sia raefafo'. 19 Ndara ra reu tao doid'oso atahori ra rendi' bafa ma 'iko na ra. Sia 'iko na ra, hambu langga' 'ona' mengge langga'.
20 Te fe'e hambu atahori ruma sia raefafo', nda hambu doid'oso' naa ra sa. Mae ta'o naa o, ara nda nau nggari hendi tatao-nono'i de'ulaka na ra sa. Ara songgo nitu rakandoo 'a, ma songgo saa fo ara tao mia lilo, doi fula', riti, fatu ma hau. Mae sud'i 'a saa naa ra nda bisa rita sa, nda bisa rena sa, ma nda bisa lao' sa, te ara songgo se nda raloe' sa!i 21 Ara o nda nau raloe' mia sala-kilu' laen na ra sa boe, 'ona' a risa atahori, pake nenori ma'ahatu', hohongge ma ramana'o.