Segel kahitun — Lamatualain ate na ra simbo rala ma'oa hitu
8
Basa ma, Lombo Ana' naa sefi segel kahitun a. 'Aib'oi' ma, basa mana sia sorga ra nda ra'aunda' sa. Nda hambu esa nahara sa losa mbei ma banggi rua jam esa. 2 Boe ma au 'ita ate hitu mia sorga. Ara rambarii' rakandoo 'a sia Lamatualain matan, fo rae mete-se'u E. Esa-esa' simbo ma'oa na.3 Ma au 'ita ate esa fai mia sorga. Ana nambarii' sia mei tutunu-hohotu' a mata' fo ara tunu-hotu hau raa ma'ameni'. Ana to'u manggo lilo' esa fo ara biasa tao hau raa ma'ameni' neu. Basa ma ara fee ne hau raa ma'ameni' nae-nae boe, fo ana na'ab'ue noo Lamatualain atahori na ra hule-o'e na. Basa ma ana nendi manggo lilo' naa 'ona' tutunu-hohotu' mana ma'afoo meni', fo tao neu mei lilo' sia kad'era parenda' a mata'.a 4 Boe ma ana ded'e hau raa ma'ameni' a. Ma ma'amenin hene nisi' Lamatualain matan, na'ab'ue noo basa hule-o'e' mia Lamatualain atahori na ra.
5 Basa ma ate a ha'i ai mia mei a, de tao nasofe manggo lilo' a. Boe ma ana honda manggo a raefafo' nema. 'Aib'oi' ma, au 'ita ndelas a had'ok na'atutute' dii-'ona sia raefafo'. Basa ma, ndelas ndukurulu lii monae' na'atutute, noo rae a nanggenggo monae'.b
6 Basa ma ate kahitu' mia sorga ra rahehere rae fuu ma'oa na ra.
Fuu ma'oa kaesan — sela-nggari' ra kad'e
7 Lele' ate kaesan fuu ma'oan, ma 'ud'a es noo ai nab'ali noo raa' mbori raefafo' nema losa hau-b'eb'a noo sela-nggari' ra nenehotu'. Basa uru mod'o' sia bee-b'ee o nenehotu' boe. 'Ona' hita banggi raefafo' dad'i bab'anggi' telu, na, bab'anggi' esa nenehotu'. Ma 'ona' hita banggi basa hau huu' noo sela-nggari' sia raefafo' dad'i bab'anggi' telu, na, bab'anggi' esa nenehotu'.c
Fuu ma'oa karuan — tasi' isi-oen mate
8 Lele' ate karuan fuu ma'oan, ma hambu saa o monaen ba'u 'ona' lete monae' esa mbila nenenggari' tasi rala neu, losa bab'anggi' esa mia tasi' a bab'anggin telu dad'i raa'. 9 Basa ma, esa mia bab'anggi' telu mia basa banda mana masod'a' sia tasi ra, mate se. Ma esa mia bab'anggi' telu mia basa 'ofa' mana laa-laa' sia tasi' a o, rambalutu hendi se boe.
Ma'oa katelun — oe ra meru
10-11 Lele' ate katelun fuu ma'oan, ma nduu monae' esa tud'a mia lalai, 'ona' ob'or monae' esa mbila. Nduu' naa, naran ‘Meru’. Lele' ana tud'a ma, oe sia loe noo oe mata' ra meru. Atahori mana rinu oe naa, hetar mate. 'Ona' a hita banggi basa loe noo oe mata' sia raefafo' neu bab'anggi' telu, na, bab'anggi' esa meru.d
Ma'oa kahaan — relo, fulan noo nduu' ra dad'i ma'ahatu'
12 Basa ma, ate kahaan fuu ma'oan. 'Aib'oi' ma relo, fulan noo nduu' ra nenehemba', boe ma ara dad'i ma'ahatu'. De nandaa noo fai rerelon, bab'anggi' esa mia fai rerelon bab'anggi' telu, dad'i ma'ahatu', huu relo a nda naronda matetu' sa ena. Ma nandaa noo fai tetemba', bab'anggi' esa mia fai tetemba' a bab'anggin telu dad'i ma'ahatu kib'u-kib'u', huu fulan ma nduu' ra nda raronda matetu' sa.e
13 Basa de au boti' mata ngga, ma 'ita mbui marambua esa natambembele sia lalai. Ana nggasi nae, “besa-b'esa, o! Calaka monae' dei fo dai basa atahori mana masod'a' sia raefafo'. Huu hela fe'e ate telu sia sorga nda fe'e fuu ma'oa na ra sa.”