Lamatualain cap nala atahori rifon natun esa haa nulu haa (144.000)
7
Basa naa ma, au 'ita Lamatualain aten haa mia sorga rambarii' sia raefafo' a ani-mata haa na ra fo ra'anggee anin. De anin nda bisa fuu sia tasi, mad'a' ata, ma hau-hau huu' ra sa.a 2 Lamatualain fee se koasa fo ara tao ralutu mad'a' ata noo tasi' a. Basa ma Au 'ita selu' ate laen esa mia sorga, nema mia rulu nema. Ana nendi cap mia Lamatualain mana masod'a losa doo ndu'u-d'oo na. Ana nameli nafad'e ate kahaa' ra nae, 3 “Helafi' dei! 'Afi' tao milutu mad'a' ata, tasi' a ma hau-hau huu' ra. Helafi' fo hai cap mala Lamatualain atahori ded'enu na ra ree na ra dei.”b4 Basa ma ara rafad'e au rae, ate naa cap nala Lamatua' atahori na ra ena. Ded'esi na ra, atahori rifon natun esa haa nulu haa (144.000), mia basa leo Isra'el. Naeni:
5 hambu atahori rifon sanahulu rua (12.000) mia leo Yahud'a;
atahori 12.000 mia leo Ruben;
atahori 12.000 mia leo Gad;
6 atahori 12.000 mia leo Aser;
atahori 12.000 mia leo Naftali;
atahori 12.000 mia leo Manase;
7 atahori 12.000 mia leo Simeon;
atahori 12.000 mia leo Lewi;
atahori 12.000 mia leo Isaskar;
8 atahori 12.000 mia leo Sebulon;
atahori 12.000 mia leo Yusuf;
ma atahori 12.000 mia leo Benyamin.
Atahori meumare' ra koa-kio Lamatualain noo Lombo Ana' a
9 Basa ma, au 'ita atahori hetar losa nda nenereken nala sa. Ara rema mia basa leo ra, basa nusa' ra, ma basa ded'eat sia raefafo'. Basa se ra'ab'ue mbali kad'era parenda' noo Lombo Ana' a. Ara pake bad'u muti' ma to'u palam roo' sia lima na ra. 10 Basa ma, ara so'u sosod'at de koa-kio randaa rae,
“Hai koa-kio Lamatualain,
mana 'endo' sia kad'era parenda' ia.
Hai o so'u minanaru Lombo Ana' ia boe!
Sira ia, mana fee hai masoi-masod'a'.
Sira ia, mana soi dala masod'a' fee hai.”
11 Ara 'ola' basa ta'o naa, ma Lamatualain ate na ra mia sorga mana rambarii' rereo' kad'era parenda' a, sende' lulu-langga na ra losa mata na ra dai rae a mbali kad'era parenda monae' naa. Malangga-malangga naa ra, roo banda manaseli kahaa' naa ra, tao ta'o naa boe. Basa se be'utee neu Lamatualain, 12 ma sod'a rae,
“Teb'e! Naa teb'e!
Hai o koa-kio Lamatualain boe!
Hai o so'u minanaru Lamatua' naran boe!
Lamatualain dud'u'an, tanden seli.
Lamatualain koasan, monae' seli.
Lamatualain deren, manaseli'.
Hai mo'e makasi neu Lamatualain nekendoo 'a.
Hai fee had'a-hormat neu Lamatualain nda neme'etu' sa.
Teb'e ta'o naa!”
13 Ara koa-kio basa ta'o naa, ma esa mia malangga karua nulu haa' naa ra natane au nae, “Atahori nae' mana pake bad'u muti' naa ra ho muhine se, do? Ara mia bee rema?”
14 Te au 'utaa 'ae, “Hoko', Papa. Au nda 'uhine se sa. Papa lebe nahine se.”
Boe ma ana nafad'e au nae, “Sira, atahori mana kalua mia doid'oso monae' ena.
Sira, atahori mana pake Lombo Ana' a raan,
fo safe bua-b'a'u na ra,
noo tao ramuti' bad'u na ra.c
15 Huu naa, ara rambarii' sia Lamatualain kad'era parendan mata'.
Ara tao mata' neu Lamatualain hatu' rerelon sia ume hule-o'e na.
Lamatualain noo se nakandondoo 'a.
Lamatualain nanea se nakandondoo 'a.
16 Dei fo ara nda med'a ndoe sa ena.
Dei fo ara nda med'a ra'amad'a sa ena.
Dei fo relo a nda haa se sa ena.
Dei fo rou na ra nda kufa dai matob'i' sa ena.d
17 Lombo Ana' mana deka kad'era parenda' naa,
dei fo dad'i manatad'a na ra.
Dei fo ana mboo nendi se,
reu rinu sia oe mata' mana nendi masod'a'.
Dei fo Lamatualain o 'ose hendi susa-sona na ra,
fo ara nda 'afi' nggae sa ena.”e