Lamatua' Yesus haitua hehelu-fufuli' fee jama'at sia Sardis
3
Boe ma Atahori Matetu' a tute selu' 'o'olan fai nae, “Yohanis. Ia naa ho musi sura' susura laen fai, liin ta'o ia:‘Soa' neu jama'at sia kota Sardis:
Susura ia, mia Au, naeni Yesus. Lamatualain Dula-d'alen sia Au. Dula-d'ale' naa mata-aon hitu. Au o manato'u nduu' hitu sia lima ngga boe. Rena 'o'ola ngga ia.
Au 'ita tatao ma ra sia Sardis ena. Atahori ruma 'oi hei teb'e-teb'e' misod'a tungga hihii ngga, tao-tao te tatao-nono'i ma ra nda ratud'u rae hei mi'ena masod'a' sa. 2 De fela leo. Tao manggatee selu' hei nemehere ma ra fo mana nae 'a mate ena. Te Au paresa' basa saa fo hei tao' naa, te nda hambu esa matetu' sia Lamatualain matan sa boe. 3 De 'afi' lilii' basa nenori matetu' fo hei rena ma simbo mia dalahulu na. Tungga teb'e-teb'e' Lamatualain hihiin, ma lao hela sala ma ra fo tungga bali' Lamatualain. Mete ma hei nda fela lai-lai fo tao ta'o naa sa, na, 'aib'oi' ma Au 'uma 'ona' na'o e, fo hei nda med'a mala sa.a
4 Te fe'e hambu hei ruma sia Sardis misod'a noo ndoos, 'ona' atahori mana nda ranggenggeo bua na ra sa. Huu masod'a na ra ndoos, dad'i dei fo ara randaa lao' ra'ab'ue roo au pake bua muti'. 5 Atahori mana ma'atataa' tungga Au losa mate, dei fo ana o pake bua muti' boe. Au nda nggaris hendi naran mia susura mana sura' basa atahori mana dei fo rasod'a rakandoondoo 'a roo Lamatualain. Dei fo Au o 'utaa se sia Ama ngga matan, ma sia ate na ra sia sorga 'ae, eni, Au atahori ngga boe.b
6 Dad'i, rena malolole saa fo Lamatualain Dula-d'alen nafad'e neu jama'at na ra.’”
Lamatua' Yesus haitua hehelu-fufuli' fee jama'at sia kota Filadelfia
7 Atahori Matetu' a 'ola' nakandoo nae, “Yohanis. Ia naa ho musi sura' susura laen fai, liin ta'o ia:
‘Soa' neu jama'at sia kota Filadelfia:
Susura ia, mia Au, Yesus. Au ia, fo atahori ro'e rae, ‘Meumare'’ ma ‘Ndoos’. Au mana to'u mane Daud nggoe na. Mete ma Au soi lelesu a, na, nda hambu esa o tatana nala e sa boe. Mete ma Au 'ena, na, nda hambu esa o soi nala e sa boe.c
8 Au bub'ulu' basa saa fo hei tao' ra. Au o 'uhine hei kokoe-nanasi ma ra mbei 'a. 'Ona' mae ta'o naa o, hei nda mifinii Au sa, ma hei tungga mikindoo 'a nenori ngga. Misined'a malolole, te Au soi lelesu fee nggi ena, nda hambu esa 'ena nala sa boe.
9 Rena malolole! Te hambu atahori mana 'ombo-koson rae, sira Lamatua' atahori matetu na. Tao-tao te mana pepeko-leleko' ra, tungga 'a nitu malangga na. Te dei fo hei mete neu' ena. Au tao se losa ara rema sende' lulu-langga na ra neu mata ma ra, ma rataa rae, mema' Au sue nggi.d 10 Huu hei tungga parenda ngga fo mi'itataa' tungga Au mikindoo 'a, naa de 'unea malolole nggi mia doid'oso' fo Lamatualain nae haitua sob'a neu atahori sia raefafo'.
11 Nda doo' sa te Au 'uma ena. De to'u mihere' Au nenori ngga fo hei simbo mia dalahulu na. Te 'afi' losa hambu ruma rambas rala hei papala-b'ab'anggi ma fo Lamatualain nae fee hei' a. 12 Atahori mana ma'atataa' tungga Au losa mate, dei fo ana leo nakandoo noo Lamatualain, 'ona' rii monae' esa nenesela' sia Lamatualain ume na. Dei fo Au sura' Lamatua ngga naran noo Lamatualain kotan naran sia atahori naa ao na. Kota naa, ara ro'e rae, ‘Yerusalem Feu'’, dei fo Lamatualain na'onda' e mia sorga nema. Dei fo Au o sura' nara feu ngga sia atahori naa ao na boe.e
13 Dad'i, rena malolole saa fo Lamatualain Dula-d'alen nafad'e neu jama'at na ra.’”
Lamatua' Yesus haitua hehelu-fufuli' fee jama'at sia kota Laodikia
14 Boe ma Atahori Matetu' naa tute 'o'olan nae, “Yohanis. Ia naa ho musi sura' susura ma'ab'ui' a, liin ta'o ia:
‘Soa' neu jama'at sia kota Laodikia:
Susura ia, mia Au, Yesus, fo atahori ro'e rae, ‘Matetu'’. Au ia, soa 'a 'ola' teteb'es Lamatualain Ded'ea-'o'ola na. Lamatualain pake Au fo tao basa saa fo Ana tao' ra.f
15 Au 'ita hei tao saa sia Laodikia. Te hei ia ra, ta'o bee, e?! Matob'i' o hoko'; ma ma'sufu' o hoko' boe. Mete ma matob'i', na, malole lena' matob'i teb'e-teb'e'. Mete ma ma'asufu', na, malole lena' ma'asufu teb'e-teb'e'. 16 Te huu hei rala ma ra neneb'ab'anggi', de Au 'ae 'usupura' hendi nggi mia bafa ngga, 'ona' atahori rasapura' miru.
17 Hei 'ola' koao mae, ‘Hita ia, atahori mamasu'i'. Hita tasod'a malolole, nda parluu saa-saa sa ena boe!’ Tao-tao te rala ma ra ma'ateme', de nda mihine bee malole' saa boe. Naeni de hei dad'i 'ona' atahori mana to'a-taa' ma ma'ahola' ra. 18 Dad'i malole lena' 'ima hasa mala lilo mbilas mia Au, naa fo ama dad'i atahori mamasu'i teb'e-teb'e'. Ma hasa mala bua muti' fo tatana ma'ahola ma ra. Ma hasa mala mod'o mata' fo 'o'ose neu mata ma ra, naa fo ama mita bali' noo manggarelo'.
19 Mete ma atahori fo Au sue' ra tao sala', Au 'ai ma hukun se, naa fo ara dad'i malole'. De hei musi tao mitetu rala ma ra fo teb'e-teb'e' hei dere fiti-fiti tungga Au.g
20 Rena malolole, te Au 'umburii' sia lelesu mata' ena, ma Au o 'o'e-'o'e' fo 'ae maso'. Mete ma hambu atahori rena hara ngga, ma nema soi lelesu, na, Au maso' rala 'uu, fo hai 'endo' mia mi'ib'ue. 21 Atahori mana ma'atataa' tungga Au losa mate, dei fo Au fee ne hak, fo 'endo' parenda na'ab'ue noo Au. Te Au o 'u'utataa' tungga 'oo Ama ngga, naeni de ia naa Au 'endo' parenda 'u'ub'ue 'oo E.
22 Dad'i, rena malolole saa fo Lamatualain Dula-d'alen nafad'e neu jama'at na ra.’”