Susura ia, mia Au, naeni Yesus. Au mana to'u nduu kahitu' sia lima 'ona ngga. Au mana lao rereo' mete lambu lilo kahitu' naa ra esa-esa'. Rena 'o'ola ngga ia.

2 Au 'ita masod'a ma ra sia kota Efesus ena. Hei soa 'a tao-ues mita' mamate ma ra fee neu Lamatualain. Mete ma hambu atahori de'ulaka' sia talad'a ma ra, hei nda mbo'i e sa. Ma mete ma atahori rema 'e'ed'ik 'oi, eni Lamatua' ded'enun, hei soa 'a paresa' malolole masod'an, fo bub'ulu' mae atahori mata' naa, atahori mana peko-leleko' do hoko'. Basa ma hei tola, fo 'afi' rena e. 3 Mae atahori tao ra'asususa' nggi huu mimihere Au, te hei mi'itataa' mikindoo, nda mi'id'ed'ea' sa.

4 Te Au 'ita hei tud'a sia dala' esa. Fe'esa'an hei fe'e mulai mimihere Au, hei esa sue esa. Te ia naa hei nda 'ona' naa sa ena. 5 De musi misined'a lele ulu' naa. Te ia naa, mi'id'od'oo' mia tatao-nono'i lele ulu' naa ena. Naa de, musi miloe' mia sala-singgo ma ra ia, fo sue-lai esa noo esa 'ona' ma'ahulu na. Te mete ma hoko', dei fo Au 'uma ha'i 'endi bali' lambu lilo' a mia nggi. 6 Te rala ngga namaho'o mbei ena, huu hei nda simbo Nikolai nenorin fo ana ded'enu na ra tao tungga 'a. Au o nda simbo tatao na ra sa boe.^a

7 Dad'i, rena malolole saa fo Lamatualain Dula-d'alen nafad'e neu jama'at na ra. Atahori mana ma'atataa' tungga Au losa mate, dei fo Au fee 'isin, fo ana naa boa' mia hau huu' mana sia Lamatualain osi na. Te atahori mana naa hau boa' naa, ana hambu masoi-masod'a ndoo-tetu' nda mana 'etu' sa.’”^b

Susura ia mia Au, naeni Yesus. Basa' e lao' mia Au, eni' a mia fefeun losa bab'asa na. Fe'esa'an Au mate, te ia naa 'usod'a bali' ena. De rena 'o'ola ngga ia.^c

9 Au 'ita hei misod'a doid'oso sia kota Smirna. Tungga atahori dud'u'an, hei mana to'a-taa'. Tao-tao te tungga Lamatualain, hei mamasu'i'. Atahori ruma rataa rae sira Lamatua' atahorin, te ara mana 'ola' ra'amuti hei nara malole ma ra. Sira ia, nda Lamatua' atahori na ra sa. Ara 'ona' jama'at esa mana tungga-tungga 'a nitu ra malangga na. 10 Dad'i rena malolole. 'Afi' mimitau mete ma hei fe'e hambu sususa-sosona'. Sad'i ama bub'ulu', nitu ra malanggan nae sangga atahori fo tao hei ruma bui rala mii losa fai sanahulu. Hihiin, hei misid'ea lao hela Au. Mae ara rae tao risa hei o, 'afi' lilii' Au boe. Te atahori mana ma'atataa' tungga Au losa mate, dei fo Au bala-b'ae papala-b'ab'anggin, fo nasod'a nakandoo na'ab'ue noo Au.

11 Dad'i, rena malolole saa fo Lamatualain Dula-d'alen nafad'e neu jama'at na ra. Atahori mana ma'atataa' tungga Au losa mate, ana nda doid'oso sia tasi ai mana mbila roo-roo' mana nda naloe' sa. Noo ta'o naa, ana nda mate lao karuan sa.’”^d

Susura ia, mia Au naeni Yesus. Au mana to'u fela tafa tande' dea-rala'. Rena 'o'ola ngga ia.

13 Au 'uhine hei kota Pergamus ma ena. Mana to'u parenda' sia naa, naeni nitu ra malangga na. Mae 'ona' naa o, hei to'u mihere' nara ngga ma mimihere mikindoo neu Au. Dalahulun atahori ngga esa sia naa, naran Antipas. Ana soa 'a nanori dala masod'a ngga noo matetu' te ara tao risa e. Mae ta'o naa o, hei nda mifinii Au sa.

14 Te Au 'ita hei tud'a sia dala' esa-rua. Hambu hei ruma hii 'a tungga Balaam nenori na. Ma'ahulun Balaam nanori Balak fo kokoe-nanasi atahori Isra'el ra losa ara ralena-langga Lamatualain hihii na. Ana kokoe-nanasi se fo reu songgo, raa nanaa sosonggo', ma reu hohongge.^e 15 Hambu atahori hira mia hei e boe o tungga Nikolai nenori na.^f 16 De musi miloe' mia sala-singgo ma ra. Mete ma hoko', nda doo' sa fai, te Au 'uma 'ungguruli hei 'endi' ded'ea-'o'ola tande', mana nahina 'ona' fela tafa'.

17 Dad'i, rena malolole saa fo Lamatualain Dula-d'alen nafad'e neu jama'at na ra. Atahori mana ma'atataa' tungga Au losa mate, dei fo Au fee ne naa roti manna mia sorga fo mana nenembed'a' malolole'. Dei fo Au o fee ne fatu muti' esa nenesura' nara feu na. 'Aka' a mesa' ne bub'ulu' nara' naa, atahori fea' nda bub'ulu' sa.’”^g

Susura ia, mia Au, Yesus, naeni Lamatualain Ana na. Au mata ngga mbila 'ona' ai, Ei ngga mbilas mbila 'ona' riti nenelalangge' sia ai rala. Rena 'o'ola ngga ia.

19 Au 'ita masod'a ma ra ena. Hei sue teb'e Au ma mimihere teb'e-teb'e' neu Au. Hei tungga parenda ngga, de mii mete-se'u atahori. 'Ona' mae atahori tao ra'asususa' nggi o, hei mi'itataa' mikindoo. Au o bub'ulu' 'ae, ia naa, hei ue-tao manggate lena' fee Au.

20 Te hei tud'a sia sala' esa rala: hei simbo noo malole' ina' fo naran Isabel, mana so'u-so'u' aon nae, eni Lamatualain mana 'ola-'ola na. Basa ma hei mbo'i e fo nanori sala Au atahori ngga ra. Huu nenori mana pepeko-lelekon naa, de Au atahori ngga ra tungga hohongge, ma raa nanaa sosonggo'. 21 Au 'ai 'usufafali ina' naa ena, fo lao hela sala naa. Te ana nda nau sa.

22 De mete malolole. Te ia naa Au 'u'etu' fo hukun e noo hed'is esa, losa ana nda fela hela mamana susunggun sa. Mete ma basa atahori mana hohongge roo e, nda lao hela ina de'ulaka' naa sa, na, nda doo' sa te Au hukun se boe. 23 Dei fo Au tao 'isa ina de'ulaka' naa ana na ra. Noo ta'o naa, basa hei mana mamahere' ra mihine mae, Au bub'ulu' basa atahori rala na ra. Dei fo Au bala-b'ae nggi tungga tatao-nono'i ma ra.^h

24 Te hei laen mana sia Tiatira ra, nda tungga ina' naa nenori de'ulakan sa. Hei nda simbo nenori ma'afuni' fo ara rae, ‘nitu ra nenori ma'ahatun’. Huu naa, Au nda parluu 'ai nggi sa ena, 25 sad'i ama to'u mihere' nemehere ma ra losa Au 'uma. 26-28 Atahori mana ma'atataa' tungga Au losa mate, dei fo Au fee ne koasa. Koasa naa, koasa monae' 'ona' Au hambu mia Ama ngga, fo parenda basa atahori sia raefafo' noo lima besi'. Mete ma hambu ruma lab'an e, dei fo ana tao nambalutu se, 'ona' atahori tao rafanggi' hura rae.ⁱ Dei fo Au fee nduu fefetu' neu nggi.

29 Dad'i, rena malolole sa fo Lamatualain Dula-d'alen nafad'e neu jama'at ra.’”