1-2 Sod'a-mole' mia au, Yohanis, naeni Yesus Kristus atahori ded'enu na.

Sia susura ia, au sura' so'al saa mana nae dad'i. Au bub'ulu' ia ra ta'o ia: Lamatualain mana nafad'e mema' neu Yesus Kristus. Boe ma Lamatualain denu Yesus Kristus nafad'e Lamatua' atahori ded'enu na ra. De Yesus denu aten esa mia sorga, fo nakambembela natud'u basa ia ra neu au, fo au sura' mema'. Te nda doo' sa te, basa ia ra dad'i. De hei musi rena malolole Lamatualain Ded'ea-'o'olan fo Yesus nafad'e' ia.

3 Basa atahori mana baca susura ia losa atahori bisa rena e, na, sira 'onton seli. Ma atahori mana rena isin noo tao tungga hehelu-fufulin, na, sira o 'onton boe. Te fain deka-d'eka nema ena.

4 Sod'a-mole' mia au fee Lamatua' jama'at kahitu na ra sia profinsi Asia.

Au 'o'e fo Lamatualain natud'u rala malolen fo ama bisa misod'a noo mole-d'ame. Te Lamatualain sia eni' a ma'ahulu na. Ana sia lele' ia, ma nakandoo losa doo ndu'u-d'oo na. Au o 'o'e Dula-d'ale Meumaren natud'u rala malolen fo ama misod'a noo mole-d'ame. Au 'ita Dula-d'alen, 'ona' dula-d'ale' hitu mbali Lamatualain kad'era parenda na.^{a b} 5 Au o 'o'e fo Yesus Kristus natud'u rala malolen fo misod'a noo mole-d'ame. Ana 'ola' 'a tungga ndoon saa fo Lamatualain nafad'e neu E. Dalahulun Ana mate ena, te Lamatualain nasod'a bali' E, fo Ana dad'i atahori ma'ahulu' mana masod'a bali' mia mamates. Dei fo Ana dad'i Mane' mana ator basa mane' sia raefafo'.

Huu Yesus sue basa nggita, naa de Ana fee raa na nandali soa' neu nggita losa Ana mate. Ma mamaten soi dala' fo mbo'i nggita mia sala-kilu ta ra koasa na.^c 6 Boe ma Ana so'u hita dad'i rauinggun, fo ata ue-tao fee Aman Lamatualain. Yesus Kristus mema' mandete-masa'a', ma koasan nda manab'asa' sa. Naa teb'e'!^d

7 De milaa matam fo mete malolole. Ia naa Yesus noo aman sia sorga. Nda doo' sa te, Ana 'onda nema sia lelee' rala. Dei fo basa atahori sia raefafo' rita E. Atahori mana mbau risa e, o rita E boe. Dei fo basa atahori sia raefafo' ia fale rala na ra ma nggae ei-ei huu rahine E. Basa ia ra mema' dei fo dad'i. Teb'e ta'o naa.^e

8 Lamatualain nae,

9 Huu basa hita tamahere bela' tae, Yesus naa, hita Manen, naa de au o dad'i hei toronoom ena boe. Atahori ruma ramanasa, huu hita tungga Yesus, de ara tao doid'oso basa nggita. Te Yesus tao manggatee hita rala na ra, fo ta'atataa' takandoo 'a. Huu au 'ufad'e basa atahori so'al Lamatualain Ded'ea-'o'olan, ma 'unori Yesus dalan, naa de hambu atahori rasapaa. Ia naa ara to'u rala au ma nggari hendi' au 'isi' pulu ia, fo naran Patmos. 10 Lao esa ma, nandaa noo fai hule-o'e', Lamatualain Dula-d'alen dai au. 'Aib'oi' ma, au rena hara' esa nameli nahere' mia dea ngga. Liin 'ona' a ma'oa e. 11 Hara' naa denu au nae, “Yohanis! Au 'ae 'utud'u mata' esa neu nggo. Basa saa fo mita' ia, ho musi sura'. Basa naa, musi haitua neu jama'at kahitu' ra, naeni jama'at sia kota Efesus, kota Smirna, kota Pergamus, kota Tiatira, kota Sardis, kota Filadelfia, noo kota Laodikia.”

12 Au rena ta'o naa ma, heo' dea ngga 'ae mete seka mana 'ola' naa. Te au 'ita lambu ana' hitu nenenenggunggua' sia mamana lambu nenetao' mia lilo. 13 Ma Atahori esa nambarii' sia lambu ra talad'a na ra. Matan 'ona' Atahori Matetu' a. Ana pake bad'u naru' esa losa ein, noo filu' lafe lilo' esa sia tenda na.^g 14 Langga fulun, muti meu hie' 'ona' 'ab'as.^h Mata deken, mbila 'ona' ai e.ⁱ 15 Ei na ra, mbila kara-kara 'ona' riti fo atahori lalangge sia ai a. Haran, monae' 'ona' ree ra rakaruruluk.^j 16 Sia lima 'onan, Ana to'u nduu' hitu. Mia bafan, fela tafa' tande' dea-rala' esa dea nema. Matan naronda 'ona' relo reorendu'.

17 Lele' au 'ita Atahori naa, boe ma au 'u'uloli 'ona' atahori mana mateleko', sia ein mata'. Te Ana keis au nendi' lima 'onan, ma 'ola' nae, “Ana ngga, e! 'Afi' mumutau! Te basa-b'asa ia ra lao' mia Au, eni' a mia fefeun losa bab'asa na.^k 18 Dalahulun Au mate, te ia naa mete dei. Au 'usod'a bali' ena, ma Au 'usod'a 'ukundoo losa bab'asa na. Au mana to'u nggoe' fo soi mamana atahori mates ra, fo fee se rasod'a bali'. 19 Ho musi sura' mala basa saa fo mita' ra ena, ma sura' basa saa fo mana nae dad'i' ra boe. 20 Au 'ufad'e 'u'uhulu' sosoan ta'o ia: lambu lilo kahitu' naa ra sosoan, naeni jama'at hitu. Ma nduu' hitu fo mita sia lima 'ona ngga naa, naeni ate hitu mia sorga rendi hara-lii' mia Lamatua' fee neu jama'at ra.”