3 Yohanis
Sod'a-mole'
1
Toronoo Gayus fo au sue teb'e-teb'e' a. Sod'a-mole' mia au, Yohanis, mana malalao nggarei'.a2 Au hule-o'e fo Lamatualain nanea nggo, naa fo aom 'afi' hambu hed'is, ma ralam malole' boe. 3 Hambu toronoo' ruma, rema dui au 'oi, ho tungga mukundoo Lamatualain dala masod'a ndoo-tetu na. Au rena 'ala ta'o naa ma, rala ngga namaho'o nala seli. 4 Huu Au 'umuho'o 'ala seli mete ma rena 'oi, ana ngga ra rasod'a tungga dala ndoo-tetu' a ena.
Yohanis koa Gayus, huu nalalao ue-tataon noo malole'
5 Toronoo susue'! Mulalao Lamatualain ue-tataon noo malole' ena, lele' simbo malolole toronoo ma ra mana lao' sia bee-b'ee ralalao Kristus ue-tatao na. Mae nda fe'e muhine se sa o, simbo se noo malole'. 6 Atahori mana bali' rema, dui neu atahori sarani' ra sia ia 'oi, simbo mala sira noo malole' ma sue se boe. Lele' ia, au 'o'e fo tulu-fali mukundoo atahori 'ona' naa ra, te naa tao Lamatualain ralan namaho'o. 7 Ara 'aka' lao' sia bee-b'ee fo ranori atahori so'al Yesus Kristus. Te ara nda simbo tutulu-fafali' saa sa boe mia atahori nda mamahere' ra sa. 8 De mema' nandaa ena, mete ma hita mana tulu-fali se. Huu noo ta'o naa, hita talalao Lamatualain ue-tataon ta'ab'ue too se.
Diotrefes, mana tao nemue-neanggi' a
9 Fe'esa'an au haitua susura fee atahori sarani' sia mamanam ena, te Diotrefes so'u aon 'ona' moko-monaen e. Ma nda nau rena au sa. 10 De mete ma au 'eti sia naa, dei fo au 'ufad'e relo-relo so'al saa fo ana tao' ra. Huu ana 'ola' peko-leleko', fo nae na'atutud'a' hai. Lelenan fai, ana 'oi hendi Lamatua' atahorin mana reu sia naa. Boe ma ana 'aka' dunggu-mbau toronoo' mana sia naa ra, fo 'afi' simbo atahori naa ra. Ma mete ma atahori mana sia naa ra rae tulu-fali mana nema dui-b'engga' ra, na, ana 'oi hendi se mia atahori sarani' ra.
Demetrius nalalao Lamatualain ue-tataon noo malole'
11 Toronoo susue', e! Musi tao tungga atahori mana tao dala malole' ra. 'Afi' tungga atahori mana tao dala de'ulaka'. Huu atahori mana tao dala malole', sira Lamatualain atahori na. Te atahori mana tao de'ulaka', nda rahine Lamatualain sa.
12 Conto 'ona' Demetrius e. Basa atahori koa-b'o'u e, huu ana tao tungga Lamatualain dala masod'a ndoo-tetu na. Au o koa e boe, ma ho bub'ulu' mae au nda mana leleko' sa.
Yohanis nate'e susura na
13 Fe'e hambu dala' hetar fai, au 'ae 'ola' 'oo nggo, te au nda nau sura' neu susura sa. 14 Huu au hule-hule' fo nda doo' sa ena, ata tandaa fo ru'a nggita 'ola-'ola' neu' ena.
15 Ba'u 'a naa ena dei. Toronoo' mana sia ia ra haitua hara sod'a-mole'. Tulun fee au hara sod'a-mole ngga neu toronoo' mana sia naa ra, esa-esa' noo nara na.
Sod'a-mole',
Yohanis