Rena amam Isra'el 'o'ola na.

3 Ruben! Ho ia, au ana ulu ngga! Au teteas ngga, ma lima 'ona ngga. Atahori fee had'at lena' neu nggo. 4 Te ralam nda matetu' sa, nda mita' mae hihii-nanaum bee sa boe, 'ona' tasi' reen neu-nema. 'Aib'oi' ma, muu sunggu' moo sao ngga Bilha, de munggenggeo amam koi na. Naa de, ho panggat 'a'am mopo e.

5 Simeon ma Lewi! Hei ru'a nggi 'ona esa', huu ama 'aka' mae mitati, tao mi'isususa' atahori. 6 Hei ma'ahee tati mi'etu' sapi ra ei ua na ra, fo ara sorereo reu' a mamana na ra. Hei de'ulaka ma ra fai, hei miminasa seli ma henggu nisi ma ra, losa misa atahori ra. Naa de, au nda nau rena hei 'o'ola ma ra sa. Au o nda nau sambor 'oo hei ded'eam sa. 7 De ia naa, au sumba-ndoo nasab'orii ma ra, huu naseli' ena. Ma nasa ma ra nda mi'ena susue-lalai' mbei sa boe. Dei fo mesa' nggi lemba-d'oi de'ulaka ma ra naa. Lamatualain mbia-nggari tititi-nonosi ma ra, fo ara leo nggari-nggari sud'i 'a bee reu sia rae Isra'el.

8 Yahud'a! Naram sosoan nae ‘koa-kio’. Dei fo 'od'i-'a'a ma ra koa ma fee had'at neu nggo. Boe ma ho tuni-ndeni musu ma ra, losa ara nda boti' rala langga na ra sa. 9 Ho 'ona' a meo-aku tena' manaseli', fo bisa sangga nanaat ao ma. Ho o 'ona' a meo-aku mone mana lea aon fo nae sunggu', de nda hambu atahori rambarani reti ngganggu sa. Ho o 'ona' Meo-aku ine mana nanea anan, de nda hambu atahori rambarani reti ngganggu sa. Atahori o ramatau nggo, de nda rambarani tao mata'-mata' neu nggo sa. 10 Dei fo ho ia, to'u parenda'. Tititi-nonosi ma ra o to'u parenda' tungga-tungga, losa esa mana na'ena hak manaseli', 'endo' to'u parenda' naa. Ma basa leo ra ramahere ma rena E.^a 11 Dei fo musod'a noo nemeho'ot. Hii saa, na, 'aka' a sia. Mae tao saa o, dad'i' a. Banda ma ra noo osi ra mbule-b'oa na ra o naen seli, losa le'a-nggari. 12 Ho nanaa-nininu ma ra malad'a-malad'a', ma nda basa-b'asa sa.

13 Sebulon! Ho rae-oe ma ra loan seli, deka noo 'a tasi', natoo' noo kota Sid'on. 'Ofai mia bee-b'ee rema nggari nafu' noo leo nee-nee sia namo ma.

14-15 Isaskar! Ho ia, 'ona' banda keled'ei ma'ad'ere', huu langga fatum nda nenelab'an sa. Mete ma keled'ei lu'u sia dala' talad'an,^b esa o nda bisa nafefela' e sa boe, fo lao' nakandoo fai. Mete ma keled'ei nita kambo malole' sia seri' naa, na, nda denu sa o, lemba nala ne'efufuan fo lao neu' ena. Ho o 'ona' naa boe.

16 Dan! Naram sosoan ‘mana nggero’. Ho ia, moo tititi-nonosi ma ra, dei fo mi'etu' Isra'el ra ded'ea na ra ma nda misila'e esa sa boe. 17 Ho ia 'ona' mengge marasot mana sunggu' sia dala' suu na. Mete ma atahori sae ndara tungga naa, 'aib'oi' te, ho 'ero ndara ei tinggan, losa atahorin tud'a.

20 Aser! Dei fo osi ma ra mbule-b'oa na ra malolen seli. Losa ho bisa tao koki malad'a' mata'-mata', fo mane-mane' ra rema hasa sia nggo.

21 Naftali! Ho ia, 'ona' banda rusa ine mana nela fui', huu nda hambu atahori ralalao nggo sa. Ho o bonggi mala ana ma ra 'aka' a meulau' ra boe.

22 Yusuf! Ho 'ona' hau huu malongge' mana nasod'a deka noo oe mata'. Ho dana ma ra nama risi' lutu naru'.^c 23 Hambu atahori fua rala mera na ra neu nggo, 'ona' musu a busu nggo. 24 Te Lamatualain fo au 'umuhere' a, tulu-fali nggo. Ana tao limam ma'ad'ere', fo busu lab'an bali' se. Mae mia doo-d'oo' o, ho musenggi' se, huu Lamatualain tulun nggo. Koasan mema' manaseli' teb'e. De au 'umuhena E, huu Ana mana nanea au. 25 Dei fo Ana nanea nggo. Ana fee nggo papala-b'ab'anggi' mia lalai ma raefafo'. Ana o fee papala-b'ab'anggi' fo bonggi ana' ao meulau' hetar. 26 Mbuku-lete' ra nda mopo sa. Ma au papala-b'ab'anggi ngga ia, nae' lena' basa papala-b'ab'anggi' mia mbuku-lete' ra! Basa papala-b'ab'anggi' ia ra, nenembori-mbo'a' neu nggo, huu ho manaseli' lena' 'od'i-'a'a ma ra.

27 Benyamin! Mbaranim 'ona' busa fui mana ndoe'. Fe'e fefetu', te ana neu sombu nala nanaan ena. Te mete ma tetemba', ana neu bab'anggi sisa-sisa na ra fee ana na ra. Tititi-nonosi ma ra o manaseli' 'ona' naa boe!”