Yakob no'e papala-b'ab'anggi' fee Yusuf ana na ra, Efraim noo Manase
48
Nda doo' sa ma, atahori rema rafad'e Yusuf rae aman namahed'i. De noo ana na ra ru'a se, Manase ma Efraim, reu se'u ba'i Yakob na. 2 Yakob rena Yusuf se rema ma, ana na'amamate' aon 'endo' sia koi.3 Ana nafad'e Yusuf nae, “Ana Yusuf, e! Lamatualain mana Koasa Manaseli' a natud'u aon neu au mia kambo Lus sia rae Kana'an. Sia naa, Ana helu au, 4 nae, ‘Dei fo au fee umbu-ana ma ra ramaheta, fo tititi-nonosi ma ra dad'i leo monae'. Ma dei fo Au fee nusa' ia neu tititi-nonosi ma ra, fo dad'i sira hata-heton losa doo' ndu'u-d'oo na neu.’
5 De ia naa, anam Efraim noo Manase, hak na ra ta'o ia: au 'uma sia Masir ia, te ru'a se sia ena. Mae 'ona' naa o, ia naa, au tao se dad'i ana ngga ra, 'ona' a Ruben ma Simeon. 6 Te mete ma ho hambu ana' fai, naa ho ana ma ra. Au nda tao se 'ona' au ana ngga ra sa. De ara simbo hata-heto' mia 'a'a na ra Manase noo Efraim. 7 Au tao ta'o naa, fo musuned'a ina ma Rahel. Lele' hai bali' mia Mesopotamia misi' Kana'an, ina ma bonggi de mate mia dala' talad'an deka kambo Efrata sia rae Kana'an. Lele' naa, au susa 'ala seli. De au 'u'oi e sia dala' suun nae nisi' kambo Efrata.” (Kambo' naa 'ale' ia, ara bab'ae naran, Betlehem.)
8 Yakoba 'ola' basa ma, ana boti' matan, nita Yusuf ana na ra sia naa. Natane Yusuf nae, “We! Seka ana nara ia ra?”
9 Yusuf nataa nae, “Ana' ia ra, Lamatualain fee au sia Masir ia.”
Yakob 'ola' nae, “Mete ma ta'o naa, naa moo se deka roo au, fo au hule-o'e Lamatualain fee papala-b'ab'anggi' neu se.” 10 Yakob lasi' ena, de mata na ra poke ena. Naa de ana nda nita malole sa. Boe ma Yusuf noo ana nara reu deka-deka Yakob, de ana holu ma 'id'u se. 11 Ana 'ola' noo Yusuf nae, “Doo basa ia, au du'a 'ae au nda 'undaa 'oo nggo sa ena. Te ia naa, Lamatualain tao lena' naa fai, sambe au o fe'e 'ita ana ma ra.”
12 Basa naa ma, Yusuf na'ad'od'oo' ana na ra mia Yakob,b de sende' lulu-langgan ma be'utee losa rae, mia aman mata na. 13 Basa ma Yusuf fela, ma no'e nala ana na ra de fee se rambarii' deka roo ama na. Ana ulun, Manase, neu Yakob bob'oa 'onan, ma ana karuan, Efraim, neu Yakob bob'oa dii na. 14 Yakob loo liman fo hule-o'e fee se, te ana lali lima 'onan neu Efraim langgan, ma lima diin neu Manase langga na. 15 Ana hule-o'e no'e Lamatualain pala-b'anggi fee Yusuf nae,
“Ho ba'i Isak ma
noo aman Abraham,
ru'a se tungga Lamatualain hihii-nanau na.
Lamatualain o na'ab'oi au mia fe'e soru ngga losa 'oras ia.
16 Ana mbo'i au mia basa de'ulaka' ra.c
De au o 'o'e fo Ana pala banggi fee ana' ia ra roo tititi-nonosi na ra.
Boe ma, mete ma ara hule-o'e neu Lamatualain,
ara 'afi' lilii' 'ingga ba'i Abraham, ba'i Isak, ma au nara ngga.
Hela fo tititi-nonosi na ra boe ramaheta,
fo dad'i leo monae' sia raefafo' ia.”
17 Yusuf nita aman tao lima 'onan neu Efraim langgan, ma ana to'u aman liman, de lali nisi' Manase langga na. 18 Nafad'e aman nae, “Ama', e! 'Afi' tao ta'o naa. Te Efraim 'od'i'. Eni nda ana ulu' sa. Ama' musi tao lima 'onam sia Manase langgan ata. Huu naa, ana ulu' a hak na.”
19 Te aman Yakob nda nau sa. De ana' 'ola' nae, “Ana ngga, e. Au mema' 'uhine. Te dei fo Manase dad'i manaseli', ma tititi-nonosi na ra o ramaheta losa dad'i leo monae'. Te 'od'in Efraim, dei fo lena' e fai. Tititi-nonosi na ra, naen seli losa ara dad'i leo manaseli' hetar fai.”
20 De ana nafad'e ana karu'a' ra nae, “Dei fo mete ma atahori Isra'el ro'e Lamatualain pala banggi fee atahori, ara 'ingga hei ru'a nggi nara ma ra boe. Ara ro'e rae, ‘Hule-hule' a Lamatualain pala banggi fee nggo, 'ona' a Ana fee Efraim noo Manase.’”
Noo ta'o naa, Yakob 'ingga Efraim naran na'ahulu' 'a'an Manase nara na.
21 Boe ma Yakob nafad'e Yusuf nae, “Ana ngga, e! Nda doo' sa, te au mate ena. Te dei fo Lamatualain tulu-fali hei, ma noo bali' nggi misi' bei-ba'i' ma ra nusa na. 22 Te ia naa, au fee nggo lena' 'od'i-'a'a ma ra. Au fee selu' nggo mbuku' sia rae Kana'an fo dalahulun au ha'i mia atahori Amori lele' au 'utati 'oo se.”