Mane' a fee Yusuf bob'onggi na ra rae
47
1-2 Basa ma, Yusuf noo toronoo na ra lima reu risi' mane' a. Ana nafad'e nae, “Ama mane'! Au ama ngga noo 'od'i-'a'a ngga ra rema mia Kana'an ena. Ara rema rendi banda hiek-lombo, sapi, ma sud'i 'a saa na ra. Basa se sia Gosen ena.” 3 Boe ma mane' a natane nae, “Hei ue-tataom saa?”
Rataa rae, “Hai manatad'a 'ona' hai bei-ba'i ma ra. 4 'Ale' ia, sia rae Kana'an ndoe-la'as naseli' de nda hambu nanaat ma uru sa ena. Naa de, hai 'ima sia nusa' ia fo leo mi'itataa'. Hai o mendi banda ma ra boe. De hai mae mo'e ama mane', fo hai leo sia Gosen, fo mi'ib'oi banda ra sia naa.”
5 Boe ma mane' a nafad'e hihii-nanaun neu Yusuf nae, “Ia naa, amam noo 'od'i-'a'a ma ra sia ia ena. 6 De ara bole tao nusa' ia 'ona' sira nusa na. Au 'uhine ngga, Gosen naa, mamana malole' sia nusa' ia. De malole lena' ara leo sia 'a naa leo. Ma mete ma sira rahine tao mata' neu banda noo malole', na, 'ona' bee na ara tao mata' neu banda ngga ra sia naa boe.”
7 Basa naa ma, Yusuf noo aman nisi' mane' a. De Yakob hule-o'e neu Lamatualain, no'e papala-b'ab'anggi' fee mane' a.
8 Basa ma mane' a natane e nae, “Ama' too hira ena?”
9 Yakob nataa nae, “Au 'usod'a too natun esa telu nulu ena, te au nda leo sia mamana' esa' a sa. Au bei-ba'i ngga ra o 'ona' naa boe. Te au too ngga mema' e'eku' lena' se. Te sofe' noo doid'oso'.” 10 Basa de Yakob natea mane' a. Ana nda fe'e lao sa, te ana no'e Lamatualain fee papala-b'ab'anggi' neu mane' a fai.
11 Yusuf tungga mane' a 'o'olan, de natud'u mamana' fee se sia Gosen. Mamana' naa malole'. (Dei de ara bab'ae mamana' naa ‘Rameses’.) Basa de Yusuf aman noo 'od'i-'a'a na ra leo rakandoo sia naa. 12 Yusuf o banggi-b'ae nanaat fee aman, 'od'i-'a'a na ra, roo basa sao-ana na ra, tungga sira ume isi na ra ded'esi na ra.
Ndoe-la'as sia rae Masir
13 Lele' naa, ndoe-la'as manaseli', de sia bee-b'ee nanaat nese. Mia Masir losa Kana'an atahori ra masaloe ena. Ara nda tao rala saa-saa sa boe, huu ndoe rita 'a mamate na ra. 14 Naa de, atahori mia basa mamana' sia Masir noo Kana'an, rema hasa nanaat sia Yusuf. Ana nad'uru doi' ra, de neu mbed'a sia mane' a ume na. 15 Doo-d'oo ma, atahori Masir roo Kana'an ra doi na ra basa se ena. De ara nda hasa rala nanaat sa ena. Ara risi' Yusuf, ma ro'e rae, “Ama fetor, e! Fee hai nanaat dei, fo hai 'afi' mate ndoes. Te basa hai doi ma ra ena.”
16 Yusuf nataa nae, “Mete ma mema' hei doi' nese ena, na, ta'o ia: fee banda ma ra fo nggati noo nanaat.” 17 De ara fee banda na ra reu Yusuf, fo nggati noo nanaat. Ara fee ndara, hiek-lombo, sapi noo keled'ei na ra. Noo ta'o naa, ara rasod'a too' naa, huu Yusuf tao ta'o naa.
18 Manafali ma, ara rema risi' Yusuf rae, “Ama fetor, e! Hai 'ola' noo matetu'. Hai doim noo banda ma ra, ama' nggati mala basa se ena. Nda 'afi' hela saa sa boe. Hela' a hai aom noo rae ma. 19 Dad'i 'afi' hela hai mate. Mete ma hai mate, seka mana tao mata' neu rae ra? Malole lena', ama fetor ha'i mala hai dad'i ate. Ha'i mala hai raem dad'i ama' 'enan boe. Ma fee fini-nggees fo hai sela fee ama'. Hai beb'engge ma, noo rae a, ama' nggati noo nanaat. Sad'i hai 'afi' mate!”
20 Huu ndoe-la'as boe fua, naa de basa atahori Masir ra seo hendi' rae na ra. De Yusuf hasa nala basa rae sia Masir, dad'i mane' a ena na. 21 Naa de, basa rauinggu Masir ra dad'i mane' a ate na.a 22 Te Yusuf nda hasa malangga agama ra raen sa, huu mane' a fee se nanaat nakandoo 'a. Naa de, ara nda parluu seo rae na ra sa.
23 Lele' naa, Yusuf 'ola' noo manggaraun na ra nae, “Ia naa hei dad'i mane' a ate na. Basa hei raem, au hasa 'ala fee mane' a ena. De mala fini-nggees ia ra, fo mii sela neu rae ra leo. 24 Dei fo 'oru, na, banggi neu lima. Bab'anggi' esa mendi fee neu mane' a. Hela bab'anggi' haa, hei tao neu fini, ma moo ume isi ma ra mia.”
25 Ara rataa rae, “Ama' fee hai masod'a' ena. Huu naa, hai mo'e makasi. Hai mae dad'i mane' a ate nara.”
26 Yusuf tao hohoro-lalane' naa dad'i 'ad'at sia Masir. Mia basa are fo manggaraun ra 'oru, ara banggi neu lima. Bab'anggi' esa fee neu mane' a. Ma bab'anggi' haa, ara soa. 'Aka' a malangga agama ra rae nara, mane' a nda hasa sa. 'Ad'at naa, fe'e sia losa fai' ia.
Yusuf helu-fuli na'oi Yakob sia bei-ba'i na ra mamana rates na
27 Eni' a lele' naa, atahori Isra'el ra leo rakandoo sia Masir, sia rae Gosen. Ara ramasu'i, ma tititi-nonosi na ra boe ramaheta.
28 Yakob fe'e nasod'a too sanahulu hitu fai sia Masir. De ana too natun esa haa nulu hitu. 29 Fai mamaten deka-d'eka boe, ana no'e Yusuf de nafad'e nae, “Ana Yusuf, e! Au du'a-d'u'an nda doo' sa ena, Lamatualain no'e bali' au. Dad'i au 'o'e, mete ma sue au, na, te'a fo 'afi' mu'oi au sia rae Masir ia. 30 Musi mendi bali' au ao-sisi ngga, nisi' bei-ba'i ta ra mamana na. Mu'oi au sia naa, huu naa, au hihii ngga.”
Yusuf nataa nae, “Malole, ama'! Mete ma ama' nau ta'o naa, na, au tungga 'a.”
31 Boe ma Yakob 'ola' nae, “Te, mete ma ta'o naa, na, 'oras ia ho te'a dei, mae ho tungga ama' hihii na.”
De Yusuf te'a tungga Yakob 'o'ola na. Basa naa ma, Yakob sende' lulu-langgan neu koi ata de hule-o'e no'e makasi neu Lamatualain.