Yakob noo bob'onggi na ra ra'alilinu' fo rae Masir reu
46
Basa naa ma, Yakoba na'alilinu' sud'i 'a saa na ra, de lao hela Kana'an. Losa kambo Berseb'a, ma ana hala banda tao tutunu-hohotu' fee Lamatualain, fo mia dalahulun aman Isak namahere' a. 2 Tetemba' esa, ana nalamein. Sia meit naa, ana rena Lamatualain no'e nae, “Wei! Yakob! Yakob! Fela fo rena dei!”
Boe ma ana nataa nae, “Ta'o bee?”
3 Lamatualain nae, “Au ia, Lamatualain fo amam namahere mia ma'ahulu na. 'Afi' mumutau Masir muu. Te dei fo Au tao tititi-nonosi ma ra dad'i leo monae' sia naa. 4 Au 'oo nggo Masir muu boe. Ma dei fo Au 'oo bali' tititi-nonosi ma ra risi' Kana'an fai. Lele' ho mate, na, anam Yusuf sia bob'oa ma.”
5 De Yakob noo ana na rab lao hela kambo Berseb'a. Ara fua e noo sao-ana na ra reu kareta, fo mane Masir haitua' ra. 6-7 Ara rendi hata-heto na ra, ma basa banda mana dad'i sira 'enan mia Kana'an. Noo ta'o naa, Yakob noo ana mone na ra, ana feton, ma basa umbu ma sufe na ra, lao Masir reu.
Yakob bob'onggi na ra mana tungga Masir reu
8 Yakob noo bob'onggi na ra mana lao Masir reu, naeni:c
10 Simeon noo ana na ra Yemuel, Yamin, Ohad, Yakin, ma Sohar. Noo Saul, fo Simeon anan mia saon ina Kana'an a.
11 Lewi noo ana na ra Gerson, Kehat, ma Merari.
12 Yahud'a noo ana na ra Sela, Peres ma Sera. Yahud'a ana laen na, Er ma Onan, mate se mia Kana'an. Ana o noo Peres ana na ra Hesron ma Hamul.
13 Isaskar noo ana na ra Tola, Pua, Ayub ma Simron.
14 Sebulon noo ana na ra Sered, Elon ma Yahleel.
15 Basa se, Yakob noo Lea ana na ra. Ara bonggi se mia Mesopotamia. Ara o ma ana ina' esa, naran Dina. Dad'i Yakob noo Lea tititi-nonosi na ra, basa se atahori telu nulu telu.
16 Boe ma, Yakob ana na ra mia saon laen ra fai, naeni:
Gad noo ana na ra Sifion, Hagi, Suni, Esbon, Eri, Arod'i ma Areli.
17 Aser noo ana na ra Yimna, Yiswa, Yiswi, Beria, noo sira feton, naran Sera.
Ma Beria ana na ra Heber noo Malkiel.
18 Basa se, atahori sanahulu nee. Sira, Yakob noo saon Silpa umbu-ana na ra. Silpa naa, ate fo Lab'an fee neu anan Lea, Yakob sao ulu na.
19 Boe ma, hambu Yakob saon esa fai, naran Rahel. Ana bonggi ana' rua, nara na ra Yusuf noo Benyamin. 20 Lele' naa, Yusuf sao nala Asnat mia Masir. Ama arin, malangga agama sia kambo On, naran Potifera. Yusuf noo Asnat ana na ra, Efraim noo Manase.
21 Benyamin o tungga Masir neu noo ana na ra Bela, Beker, Asib'el, Gera, Naaman, Ehi, Ros, Mupim, Hupim ma Ared.
22 De Yakob noo saon Rahel tititi-nonosin, atahori sanahulu haa.
23 Ma Yakob saon fe'e esa fai, naran Bilha. Ana na ra, Dan noo Naftali.
Dan o tungga Masir neu noo anan Husim.
24 Ma Naftali noo ana na ra Yasel, Guni, Yeser ma Silem.
25 Yakob noo Bilha tititi-nonosin, atahori hitu. Bilha naa, Rahel aten fo ana hambu ma aman Lab'an.
26 Dad'i Yakob tititi-nonosi na ra fo mana risi' Masir reu a, atahori nee nulu nee. Nda fe'e ana mone-ana feto feu na ra sa. 27 Tamba Yusuf noo anan rua fo bonggi se sia Masir, de reken naa Yakob noo basa bob'onggi na ra mana leo sia Masir, atahori hitu nulu.
Yakob nandaa bali' noo anan Yusuf
28 Ara rae deka Masir ma, Yakob denu anan Yahud'a lao' na'ahulu', neu no'e Yusuf, nema nandaa noo e sia Gosen. Ara losa Gosen boe ma, 29 Yusuf sae karetan, de neu nandaa noo aman sia naa. Ara randaa ma, Yusuf holu aman, de nggae doon seli.
30 Yakob 'ola' noo Yusuf nae, “Ana Yusuf, e! Ia naa, au 'ita nggo ena. Ma bub'ulu' ho fe'e masod'a'. Naa de, mae au mate 'oras ia o, malole.”
31 Basa de, Yusuf nafad'e basa 'od'i-'a'a na ra nae, “Au musi 'uu 'ufad'e mane' a, 'ae bob'onggi ngga ra rema mia Kana'an ena. 32 Dei fo au 'ufad'e 'ae hei ia, atahori mana ma'ab'oi bib'i lombo ma sapi. Naa de hei mendi banda ma hata-heto ma ra mia Kana'an. 33 Mete ma mane' a no'e hei, ma natane ue-tatao ma ra saa, 34 na mitaa mae, basa hai mana mi'ib'oi banda mia anad'iki' 'ima, 'ona' hei bei-ba'i ma ra boe. Noo naa, dei fo ana fee hei leo sia Gosen.” Yusuf nafad'e ta'o naa, huu atahori Masir ra melumud'u leo ra'ab'ue roo atahori manatad'a ra.