3 Basa de, Yusuf nafad'e relo-relo 'od'i-'a'a na ra nae, “We! Od'i-'a'a' ra, e. Au ia Yusuf, hei toronoo ma. Ama' fe'e masod'a', to?”

'od'i-'a'a na ra rena ta'o naa ma, ramatau rala seli, losa nda 'ola-'ola' rala saa sa boe.

4 Boe ma Yusuf no'e se nae, “Wee! 'Ima deka-d'eka ia dei.”

Ara reu deka Yusuf. Ma ana 'ola' selu' nae, “Au ia Yusuf, fo ma'ahulun hei seo neu atahori Masir ra. 5 Mema' hei seo hendi au ena. Te 'afi' mimitau, ma 'afi' mireresi esa fee sala' neu esa fai. Matetun, Lamatualain mana noo au ia 'uma 'u'uhulu' mia hei e. 'Ona' naa, Ana fee masod'a' neu atahori hetar huu au. Fo ara 'afi' mate ndoes.

6 Ndoe-la'as fe'e lao' too rua ia. Fe'e hela too lima fai. Atahori nda 'a'ali rae sa, nda sela nggari sa, de nda hambu mbule-b'oa' saa sa boe. 7 Noo dala' fo hita nda tahine' sa ia, Lamatualain noo au 'u'uhulu' hei. Naa fo hambu ruma mia hei ma umbu-ana ma ra, rasod'a.

8 Matetun, nda hei tataom de au sia ia sa, te Lamatualain tatao na. Naa de au dad'i fetor sia Masir ia. De au dad'i malangga mana tao ues sia mane' a ume panggat na. Nda hambu atahori lena' au sa.

9 De ia naa, hei bali' lai-lai leo, fo mifad'e au 'o'ola ngga ia neu ama' mae, ‘Ama' anan Yusuf fe'e masod'a'. Ana dad'i atahori malangga sia Masir. Ana no'e ama' Masir neu lai-lai. 10 Dei fo ama' leo sia Masir sia mamana' esa naran Gosen, deka noo e. Mamana' naa malole' ma loa'. De ama' bisa na'ab'oi bib'i lombo ma ra sia naa, ma basa hiek noo sapi ra. Ana o no'e fo ama' muu moo umbu-ana ma ra, ume isi ma ra, noo basa hata-heto ma ra fo leo sia 'a naa. 11 Mete ma ama' sia Gosen, na, ana na'ab'oi ama' sia naa. Ndoe-la'as fe'e too lima fai. Dei fo ana tao fo ama' noo bob'onggi' ma ra, basa banda ra nda kuran saa sa boe.’”

12 Yusuf nafad'e basa boe, ana 'ola' fai nae, “Ia naa, hei mita ena, to? Ma ho, Benyamin, mita, to? Au ia, mema' Yusuf. 13 De mifad'e hita aman mae, au koasa ngga monae' sia Masir. Boe ma dui basa-b'asa saa fo hei mita' ia neu ama'. Basa fo, moo ama' lai-lai ia nema leo!”

14 Basa boe ma, ana holu 'od'in Benyamin, de rua se nggae. 15 Ana o holu 'od'i-'a'a na ra, de 'id'u se esa-esa'. Dei de, ara fe'e 'ola-'ola' roo e.

16 Basa naa ma, mane' a noo basa pagau na ra rena Yusuf 'od'i-'a'a na ra rema, de basa se ramaho'o. 17 De mane' a 'ola' noo Yusuf nae, “Yusuf, e! Mufad'e 'od'i-'a'a ma ra fo ara fua are na ra reu keled'ei leo, fo rendi Kana'an neu. 18 Denu se rema roo amam, noo basa bob'onggi na ra, fo ara lali ia rema leo. Dei fo fee se rae meulau' sia Masir, fo ara rasod'a sia naa, ma raa rae mina na. 19 Boe ma nafad'e se, fo rendi mema' kareta hira mia ia, fo fua neu anad'iki' ra roo ama ma. 20 'Afi' du'a-du'a' hata-heto' fo sira nda bisa rendi' ra sa, huu basa malole' mana sia Masir ia, dei fo sira hambu se.”

21 Mane' a 'ola' basa ma, Yusuf fee se kareta hira ma lepa-nggees, tungga mane' a parenda na. De 'od'i-'a'a na ra^a ra'alilinu' fo bali' tungga mane' a parenda na. 22 Yusuf o fee se, bua-b'a'us feu' pasan be'e esa'. Te ana fee Benyamin doi fula' natun telu, ma bua feu' pasan lima. 23 Ana haitua fee aman sud'i 'a saa meulau' mia Masir, de fua neu keled'ei mone sanahulu. Ana o fee selu', are, roti, ma nanaat mata'-mata', sia keled'ei ine sanahulu fai, fo dad'i lepa-nggees bali' Masir rema. 24 Basa ma, ana fee se bali', ma nafad'e se nae, “Hei 'afi' mireresi sia dala', e!”

25 Boe ma ara lao bali' risi' aman sia Kana'an. 26 Losa naa ma, rafad'e aman rae, “Ama', e! Anam Yusuf fe'e masod'a'. Ana dad'i atahori monae', de parenda sia Masir!”

Yakob rena ma, ana titindindii ma nda namahere 'o'ola na ra sa. 27 Te ara rafad'e basa Yusuf 'o'olan ma, Yakob nita kareta fo Yusuf haitua nema nae fua noo e nisi' Masir, dei de fe'e namahere na. 28 Ana 'ola' nae, “Awii! Au ana ngga fe'e masod'a', o! Ta'o naa dei de au fe'e 'umuho'o na. Au musi 'uu se'u-'ita dei, dei fo au fe'e mate noo malole ena.”