Yusuf mok lilo fulan mopo
44
Ara raa basa ma, Yusuf na'a'u'utu' malangga mana tao ues na nae, “We! Muu 'ombo are neu atahori ia ra karon na ra losa sofe se. Ma tao bali' doi na ra nisi' esa-esa' karon na rala. 2 Boe ma ha'i mala au mok lilo fula ngga, fo tao nisi' ana muri' a karon na.” De ana neu tao tungga Yusuf parenda na.3 Mbila fefetu anan, Yusuf mbo'i se lao bali' rendi nanaat noo keled'ei na ra. 4 Ara nda fe'e ra'ad'oo' kambo' sa ma, Yusuf nafad'e malangga mana tao ues na nae, “Muu tungga atahori naa ra lai-lai. Mete ma hambu se, na, mufad'e ma'o ia: ‘Ta'o bee de rala ma ra de'ulaka' mbali tou lasi' a? Losa hei balas malolen moo de'ulaka' ta'o ia. 5 Ta'o bee de loi mendi malangga mok lilo fula na? Hei nda bub'ulu' sa, do? Naa nda 'aka' a mok nininu' sa. Ana o sangga atahori ua-nale na ra nendi' mok naa. Naa mok mahine'! Hei tatao ma ra ia, de'ulakan seli ma!’”
6 Basa de, malangga mana tao ues neu tungga de hambu se. Ana nafad'e se tungga Yusuf 'o'ola na.
7 Ara rataa rae, “Ama' masud na ta'o bee ia? Hai sumba. Hai nda tao de'ulaka' ta'o naa sa. 8 Ama' bub'ulu', to? Doi-d'oi' mana mia karon rala fai' naa, hai fee bali' neu ama', to? De ta'o bee de hai loi malangga lilo fulan mia umen fai. Hoko', o! 9 Ama' paresa' neu' ena. Hambu sia seka karon na, naa hukun misa e leo. Ma hai ruma dad'i ate ma.”
10 Boe ma malangga mana tao ues a nae, “Hoko'! Ta'o ia. Mete ma hambu mok sia seka, na, ana dad'i au ate ngga. Ruma bali'.”
11 Ma ara ra'onda' karon naa ra lai-lai, de sefi se. 12 Malangga mana tao ues a paresa' lutu'-lelo' karon naa ra esa-esa', mia 'a'a ka karon na, losa 'od'i' a ena na. De ana hambu mok lilo fula' mia Benyamin karon na.
13 Boe ma Benyamin 'a'a na ra rala na ra rambalulutu. De ara fua bali' karon naa ra keled'ei ata reu, ma bali' kota reu.
14 Lele' ara losa Yusuf umen, te ana fe'e sia naa. De ara sende' lulu-langga na ra neu mata na. 15 Yusuf bua se nae, “He! Ta'o bee de hei tao 'ona' ia neu au. Hei nda mihine mae atahori monaen 'ona' au ia, bisa sangga atahori rahasian 'endi' mahine' sa, do?”
16 Yahud'a nataa nae, “Awii! Lamatualain natud'u hai sala ma ra ena. Hai mae saa fai, ama'? Hai mae misila'e aom, 'ona bee fai. Mete ma ama' nae hela hai 'od'i murim ia, na, malole lena' ama' hela basa hai. Ha'i mala basa hai dad'i ate ma.”
17 Yusuf nataa nae, “Hoko'! Hambu mok a sia seka e, na, eni mana dad'i au ate ngga. Hei ruma, nenembo'it. Bali' misi' amam leo!”
Yahud'a no'e mbali Yusuf fo eni nggati Benyamin
18 Yahud'a neu deka-d'eka noo Yusuf, de 'ola' nae, “Ama fetor! Au bub'ulu' ama' koasan 'ona' mane' a boe. Huu naa, de 'afi' mumunasa au dei. Au 'o'e 'ola-'ola' mbei 'oo ama'. 19 Ma'ahulun ama' natane hai mae, ‘Hai amam noo 'od'im esa fe'e sia, do?’
20 De hai mitaa mae, ‘Hai amam lasi' ena. Boe ma 'od'i murim, esa. Lele' bonggi e, hai amam lasi' ena. 'A'a bonggin esa' a, te ana nese ena. Ru'a se inan mate ena. De ia naa, hela' a mesa' ne. Naa de, hai amam sue nala e seli.’
21 Basa de, ama' denu hai moo e, fo mita e. 22 Te hai mitaa mae, ana' naa nda lao hela aman sa. Mete ma ana lao hela e, na, hai amam mate neu' ena.
23 Boe ma ama' nataa nae, ‘Mete ma hei nda mendi 'od'im sa, na, hei nda bisa mita mata ngga sa ena.’
24 Basa de hai bali'. Mifad'e basa ama' 'o'olan neu hai ama ma. 25 Doo-d'oo ma, hai nanaa ma ra basa boe. De hai amam denu 'ima hasa selu' nanaat fai. 26 Hai mitaa selu' mae, ‘Ama', e! Hai nda mii sia naa sa. Te fetor a, nafad'e ena, mete ma hai nda moo 'od'i muri' a sa, na, hai sud'i mindaa moo e. Dad'i hai 'od'i murim musi tungga, dei fo hai fe'e lao ena.’
27 Hai amam 'ola' fai nae, ‘Hei bub'ulu', to? Au sao ngga Rahel, anan 'aka' rua' a. 28 Ana ulu' a nese ena. Banda fui ra raa hendi ena. Naa de, losa fai' ia au nda 'undaa 'oo e sa. 29 Mete ma hei ha'i mala ana muri' ia mia au fai, boe ma ana ta'o esa naa, hei boe tao mi'isususa' au lasi' ia, de au mate neu' ena.’
30-31 De 'ona' naa, ama fetor. Mete ma au bali' 'isi' ama ngga, nda 'oo bali' 'od'i muri' ia sa, na, hai amam mate neu' ena, huu ralan esa noo 'ana' naa. Ana namalasi seli ena, naa de mete ma hai boe tao mi'isususa' e, na, ana mate neu' ena. 32 Boe ma au o helu ama ngga, au mana 'oo bali' 'ana' naa. Au helu 'ae, mete ma nda 'oo bali' 'ana' ia sa, naa au tanggon sala' losa mate.