Yusuf 'a'a na ra bali' Masir reu, roo 'od'in Benyamin
43
Lele' naa, ndoes-la'as sia Kana'an boe fua. 2 Yakob noo ume isi na ra rab'asa' hendi nanaat fo ma'ahulun, ana na ra rendi mia Masir. Boe ma ana nafad'e se nae, “Ana ngga ra, e. Malole lena' hei bali' Masir mii, fo hasa selu' nanaat fee nggita dei.”3 Te Yahud'a nataa nae, “Ama'! Fai' naa, fetor naa fee nesenened'a' neu hai nae, mete ma hai nda moo ama' ana murim sa, na, hai 'afi' mitud'u mata ma ra neu e. 4 De ama' musi mbo'i 'od'i Benyamin, fo tungga hai dei. Naa fo hai fe'e mii hasa nanaat fee ama' ena. 5 Te mete ma ama' nda fee Benyamin neu sa, na, hai o nda mii sa boe. Te atahori Masir naa 'ola' ta'o naa ena na!”
6 Boe ma Yakob 'o'ola' se nae, “Ta'o bee de hei mifad'e atahori naa, mae hei 'od'im fe'e hela esa fai. Hei sangga mi'isususa 'a au!”
7 Te ara kokoe rae, “Ama', e! Atahori naa 'aka' natane nakandoo 'a, fo nae bub'ulu' hita bob'onggi' na ra. Ana natane nae, ‘Ta'o bee? Hei amam fe'e masod'a', do? Hei fe'e ma 'od'i tou' fai, do? De hai fe'e mae saa fai!’ Naa de hai o 'ola' noo matetu' boe. Te see nita' nae ana nae denu hai mendi 'od'i' neu sia naa?”
8-9 Boe ma Yahud'a 'ola' fai nae, “Ama'! Mbo'i ana' naa neu noo hai leo. Au helu, mete ma dad'i saa-saa neu e, na, au nggati 'ala e. Mete ma au nda 'oo bali' e masod'a' neu ama' sa, na, ama' fua sala' neu au losa mate. Dad'i ama' mbo'i 'ana' naa leo, te hai mae lao ia ena. Malole lena' hai mii lai-lai, fo ata 'afi' mate ndoes. 10 Sob'a hai nda mihani doon basa ia sa, naa hai bali' lao rua ena.”
11 Boe ma aman nae, “Mete ma ta'o naa, na, hei tao ta'o ia. Mendi hita raen buna-b'oa malolen, 'ona' a oni oe', bumbu-b'umbu, hau raa ma'ameni', mod'o salap, kanaria noo hau deke' lain ra. Mendi basa se fee neu fetor Masir a, fo mae ia hita lepa-nggee na. 12 Hei o mendi doi' ded'esin lao rua, huu hei musi fee bali' doi' fo hei hambu mia karon ma ra fai' naa. Mbei ma atahori naa ra mana mbed'a' rasala'. 13 Moo hei 'od'im boe, te bali' lai-lai e. 14 Au hule-hule' fo Lamatualain Koasa Manaselin, tao fetor a kasian hei. Naa fo ana nau fee bali' Benyamin noo Simeon, fo basa hei bali'. Te, mete ma ana ngga ra mopo se, na, au lemba sususa' naa sambe mate.”
15 Basa naa de, ara reu rad'uru lepa-nggees ma ha'i doi', fo rendi Masir neu. De ara lao roo Benyamin. Ara losa naa de, reu risi' Yusuf. 16 Yusuf nita Benyamin noo 'a'a na ra ma, ana denu malangga mana tao ues na nae, “We! Moo atahori ia ra risi' ume ngga. Mii tati sapi esa, fo dode-nasu malad'a-malad'a'. Te dei fo, ara raa reo-rendu' roo au.”
17 Boe ma, malangga mana tao ues tao tungga Yusuf parenda na. De ana noo se risi' Yusuf ume na.
18 Ara lao boe ma, 'a'a na ra ramatau rala seli. Sia dala' talad'an ara 'ola-'ola' rae, “We! Ta'o bee de ana denu roo nggita tisi' ia. Se'u-se'u te nae tao na'asususa' nggita, huu doi' fo ara tao bali' sia hita karon na ma'ahulu na. Ara roo nggita ia tema, fo 'aib'oi' ma, to'u nggita, fo tao dad'i ate na. Ma rambas rala hita keled'ei na ra.”
19 Naa de, deka-d'eka Yusuf umen ma, ara 'ola' roo malangga mana tao ues a rae, 20 “Ama'! Hai mo'e ma'af, te ma'ahulun hai 'ima hasa nanaat sia ia ena boe. 21-22 Hai bali' kambo' mii, de hai hahae mia dala'. Mae sunggu' ma, hai sefi karon fo mae hani banda ra. Naa te hai hambu bali' esa-esa' doi' are ma ra, mia karon rala. Hai nda mihine seka mana tao neu naa sa. De ia naa, hai mendi bali' basa doi' naa ra. Dad'i ama' 'afi' mumunasa o. Hela fo ama' nahine, ia naa hai o mendi doi' lena' fo mae hasa selu' nanaat feu'.”
23 Basa ma, malangga mana tao ues' a nataa nae, “Hei nee-nee 'a. 'Afi' mimitau. Mbei ma hei Lamatualain ma, mana fee nggi papala-b'ab'anggi' sia karon naa ra. Fai' naa, au simbo 'ala basa hei doi ma ena. Hei nda mihuta saa sa boe!” Boe ma ana mbo'i Simeon fee neu se.
24 De basa se risi' Yusuf umen rala. Malangga mana tao ues a fee se oe safe ei na ra. Ana o hani keled'ei na ra boe. 25 Boe ma, nafad'e nae, “Dei fo hei mia reorendu' moo malangga.” Ara fe'e rahati Yusuf neneman ma, ara ha'i mema' lepa-nggees na ra.
26 Lele' Yusuf losa, ma basa se sende' lulu-langga na ra sia mata na. Dei de, ara fee lepa-nggees ra reu e. 27 Yusuf natane se nae, “Ta'o bee? Basa hei malolole, do? Hei amam lasi' naa, 'ona bee? Ana malole, do?”
28 Ara rataa rae, “Ama' ate lasim, fo hai ama bonggim, malolole.” Basa de, ara be'utee fee had'at neu e.
29 Yusuf mete ndule basa se, de nita 'od'in Benyamin. Ana nae, “Ooo! Ia eni, hei 'od'i murim fo hei dui fai' naa, do?”
Boe ma ana 'ola' noo Benyamin nae, “Ana ngga, e! Au hule-hule' fo Lamatualain pala-b'anggi fee nggo papala-b'ab'anggi' nae'.”
30 Nita Benyamin ma, Yusuf nae 'a natud'u susuen ena. Huu ana sue 'od'in naen seli. Ana nda nae 'a na'atataa' nala ralan sa ena. De ana lai-lai lao hela se nisi' kaman rala. Ana nggae mesu'ud'u-faruka sia naa. 31 Nggae basa, dei de neu narou mata na. Ana na'amamate' ralan, de neu nandaa noo se fai. Basa de, ana denu pagau na ra reu ralalau mei a.
32 Ara tao fee Yusuf naa mia mei mesa' ne. 'Odi-a'a na ra raa sia mei fea'. Atahori Masir mana tao ues na ra raa sia mei fea' boe, huu atahori Masir ra melumud'u raa ra'ab'ue roo atahori Ibrani ra.b 33 Malangga mana tao ues a fee Yusuf 'od'i-'a'a na ra 'endo' matambambali' roo e. Ana fee se 'endo' teri-teri tungga sira too na ra, mia 'a'a' losa 'od'i muri' a. Rita ta'o naa ma, ara titindindii. 34 Yusuf denu pagau na ra ha'i nanaat fee 'od'i-'a'a na ra mia mei na. Basa se simbo ona-ona esa'. Te ara tao fee Benyamin, lena' 'a'a na ra lao lima. De basa se raa-rinu losa ra'ab'eta rala seli.