3 De Yusuf 'a'a kasanahulu na ra, raote rae reu hasa nanaat sia Masir. 4 Te Yakob nda nau mbo'i Yusuf 'od'i murin Benyamin fo neu noo se sa. Ana du'a nae, “'Afi' losa ana' a hambu sususa' fai!” 5 Huu atahori sia bee-b'ee rena 'oi hambu nanaat sia Masir, naa de atahori hetar reu hasa sia naa. Fula-fai ndoe-la'as o losa rae Kana'an ena boe. De Yakob ana na ra^a o tungga reu hasa sia naa boe.

6 Lele' naa, Yusuf dad'i fetor sia Masir. Mete ma atahori rema mia bee-b'ee hasa are, Yusuf mana seo neu se. Naeni de, lele' 'a'a na ra losa, ma ara reu sende' lulu-langga na ra fee had'a-hormat neu e, losa langga na ra dai rae a. 7-8 Lele' ana nita se ma, nahine se ena. Te Yusuf tao aon 'ona' atahori Masir, de ara nda rahine e sa. Ana natane se noo deres nae, “Hei ia, mia bee 'ima?”

Boe ma ara rataa rae, “Hai mia Kana'an. Hai mae 'ima hasa nanaat sia ama fetor.”

9 Boe ma Yusuf nasaned'a meit na. De ana na'atatau' se nae, “Au nda 'umuhere sa! Ne'o basa hei ia ra mana maku-ma'u. Hei 'ima mae mihine nusa Masir had'a-dalan, fo mitati moo hai, to!”

10 Te ara rataa rae, “Hoko', ama'! Hai ama' atahori ded'enu mara' a. Teb'e-teb'e' hai mae 'ima hasa nanaat. 11 Basa hai ama' esa. Hai nda maku-ma'u sa, ama'! Hai atahori malole'.”

12 Te Yusuf boe 'ola' nahere' nae, “Hee! Ombo koson! 'Afi' pepeko-leleko' au. Mema' hei ia ra, mana maku-ma'u' ra. Hei 'ima mae mihine nusa' ia had'a-dala na ra!”

13 Ara rasapaa rae, “Hoko', ama'! Hai ama' ded'enu mara' a. Hai 'ima mia rae Kana'an. Hai 'od'i-'a'a atahori sanahulu rua. Basa hai ama' esa. Hai 'od'i murim leo nahani noo hai amam, ma esa nese ena.”

14 Yusuf nataa se nae, “Hoko'! Saa fo au 'ola' faa' ra, teb'e! Hei ia ra mema' mana maku-ma'u'. 15 De hei musi fee bukti dei, fo au 'uhine 'o'olam naa, mema' teb'e, do hoko'. Au sumba! Mete ma 'od'i murim nda nema sia ia sa, na, ama nda lao hela nusa' ia sa! 16 Dad'i ama pili atahori esa fo neu nala 'od'i murim ia nema. Ma hela laen ra. Au 'ae 'ita hei 'o'olam naa, teb'e do hoko'. Mete ma hoko', na, mema' hei mana maku-ma'u.” 17 Boe ma Yusuf denu tao se bui rala reu fai telu.

18 Fai katelun ma, Yusuf neu 'ola' noo se sia bui a nae, “Au ia, 'umutau neu Lamatualain ma tungga hihii-nanau na. Au nau mbo'i nggi, naa fo misod'a. Te hambu dala' esa. 19 Mete ma hei 'ola' noo matetu', na, ama musi fee bukti neu au dei. Eni dalan ta'o ia: au tao esa sia bui rala. Laen ra bali' fo mendi nanaat fee ume isi ma ra. Te ara rahani nggi ena. 20 Basa naa, na, mendi 'od'im nema, fo dad'i bukti hei atahori malole'. Fo au 'afi' hukun isa nggi.”

Ara rena ta'o naa, ma ra'ahei'. 21 De ara esa 'ola' noo esa rae, “Ia naa ata hambu bala-b'ae' mia tatao ta ra ena, fo tao neu hita 'od'i na. Ata tita ana doid'oso nala seli. Ana no'e tulun te, ata nda taoafi' sa. Naa de, ia naa ata doid'oso 'ona' ia ena.”

22 Boe ma Ruben fee nesenened'a' neu se nae, “Wee, 'od'i' ra, e! Ma'ahulun, au 'ai nggi ena, fo 'afi' tao saa-saa neu ana' naa boe, to? Te ama nda taoafi' neu 'o'ola ngga sa. Naa de, ia naa ata lemba Yusuf raan ena.” 23 Ara 'ola-'ola' ra'o naa, te nda rahine rae Yusuf nahine sira ded'ean sa. Huu Yusuf 'ola-'ola' noo se nendi' ded'ea Masir, dei fo mana 'ola-'olan 'ola' nisi' ded'ea Ibrani.

24 Rena ara 'ola-'ola' ra'o naa, ma Yusuf fela hela se, de neu nggae sia mamana' laen. Ana nggae basa dei de, bali' nisi' se. De ana denu ara futu Simeon mia 'od'i-'a'a na ra mata na.

25 Basa naa ma, Yusuf parenda atahori nara, fo 'ombo are nisi' 'a'a na ra karon na ra rala. Ma mbed'a' bali' doi na ra risi' karon bafa na ra. Ana o denu tao fee se lepa-nggees boe. De atahori na ra tao tungga Yusuf parenda na. 26 Basa de, Yusuf 'a'a na ra rafufua' karon are ra risi' keled'ei ata. De ara lao bali'.

27 Mia dala' talad'an, ara hahae ao na ra. Boe ma, esa sefi karon na talin, fo nae fee keled'ein naa. Te nita doin sia are ata. 28 Ana nggengger nala seli. Boe ma ana randu 'a'a na ra nae, “Awii! Mete dei! Hita soe ena. Ara mbed'a' bali' doi ngga sia karon rala.”

Ara rita ta'o naa ma, bingun ma ramatau rala seli. De ara 'ola-'ola' rae, “Lamatualain tao saa neu nggita fai ia?”

29 Boe ma, ara lao rakandoo. Losa Kana'an ma, ara dui aman, basa saa mana dad'i neu se. 30 Ara rafad'e rae, “Papa, e! Fetor Masir a, manaseli teb'e'. 'O'olan nda noo had'at sa. Ana napepenggo hai 'oi, hai mana maku-ma'u nusa' naa. 31 Te hai mitaa mae, ‘Hoko'! Hai 'ola' noo matetu'. Hai ia ra nda mana maku-ma'u sa. 32 Hai atahori malole'. Basa hai, 'od'i-'a'a atahori sanahulu rua mia ama' esa. Te esa nese ena, ma muri' a leo noo hai amam sia Kana'an.’

33 Boe ma, fetor a nae, ‘Au 'ae sob'a, hei ia ra ndoos, do hoko'! Hei esa musi leo sia ia. Laen ra bali' mendi are fee ume isi ma ra, fo ara 'afi' mate ndoes. 34 Ama musi mendi 'od'im nema dei. Noo ta'o naa, dei fo au bub'ulu' hei ia ra nda mana maku-ma'u sa, te mema' hei atahori ndoos. Boe ma, au mbo'i toronoom mia bui a. Ma mbo'i nggi, fo sud'i 'a bee mii, sia nusa' ia.’”

35 Dui basa ma, ara bonggar karon na ra isi na. 'Aib'oi' ma rita doi na ra, fe'e sia karon rala. De Yakob noo ana na ra ramatau rae mate.

36 Boe ma, Yakob 'ola' noo se nae, “Hei ia ra tao mimopo' ana ngga ra. Yusuf nese ena. Simeon o nese boe. Ia naa ama mae mendi Benyamin fai, do? Hei ia ra teb'e-teb'e' mae tao doid'oso au, ma!”

37 Boe ma Ruben 'ola' noo aman nae, “Papa, e! Fee Benyamin neu au. Au mana 'unea e. Au helu, dei fo au 'endi bali' e nisi' papa. Te mete ma hoko', na, tao misa ana mone karua ngga ra.”

38 Te Yakob 'ola' nae, “Hoko'! Hei nda bole moo Benyamin sa. 'A'an Yusuf mate ena. Hela' a mesa' ne. Mete ma ana ta'o esa sia dala', na, hei tao au susa losa mate.”^b