Yusuf nafad'e mane Masir a meit na sosoan
41
Seli too rua ma, mane Masir a nalamein nae, eni nambarii' sia loe Nil suu na. 2 'Aib'oi' ma, nita sapi mbaruna' hitu. Rou na ra manggamomou'. Ara dea rema mia loe a, de raa uru sia naa. 3 Boe ma, sapi hitu fai, dea rema mia loe a. Ao na ra nggod'a' ra. Ara rambarii' deka roo sapi maao kahitu' ra. 4 Basa ma, sapi nggod'a kahitu' ra 'od'o hendi sapi maao' ra. Boe ma mane' a nggengger de fela.
5 Nda doo' sa ma, ana sunggu' nasambeta fai, de nalamein. Ana nita are mbule maisi' hitu dea rema mia are huu meulau' esa. 6 Basa ma, nita selu', are mbule laka' hitu, loe-lesu rae reu, huu dai ani matob'i'. 7 Boe ma basa are mbule laka' ra 'od'o hendi are mbule maisi kahitu' ra. Basa naa ma, mane' a fela. Dei de ana nahine, eni nalamein fai.
8 Fefetun ma, mane' a med'a nda malole' sa. De ana parenda atahori ra reu ro'e basa mana tiro-ura ra ma atahori mahine' ra sia Masir. Basa de ana dui meit na neu se, te nda hambu esa nahine meit naa sosoan sa boe.
9 Basa ma, pagau mana ator mane' a nininun, nasaned'a Yusuf. De nafad'e mane' a nae, “Ama mane'. Au musi 'utaa sala. 10 Ma'ahulun, lele' ama' namanasa au 'oo nonoo ngga, de tao hai bui rala mii, 11 tetemba' esa ma, hai ru'a nggi milimein. Esa-esa' noo meit na, ma meit naa ra, esa-esa' noo sosoa na. 12 Sia bui rala o hambu atahori Ibrani esa fe'e soru'. Malangga bui a so'u e dad'i malangga mana ator sia bui. Hai dui meit ma ra neu e. Boe ma ana nafad'e meit naa ra sosoa na ra. 13 De ama mane' so'u bali' au. Te nonoo ngga, na, nenehukun mate. De basa naa ra, dad'i 'ona' atahori Ibrani naa 'o'ola na!”
14 Mane' a rena nala ma, ana denu atahori lai-lai reu ha'i Yusuf mia bui a. Yusuf neu 'eu timi fulun, tao nameu aon, ma nggati bua-b'a'un, de neu nandaa noo mane' a. 15 Ana losa, boe ma mane' a 'ola' nae, “Ta'o ia. Au 'ulumein, te nda hambu atahori esa nahine meit naa sosoan sa boe. Te hambu atahori rafad'e au rae, ho muhine.”
16 Boe ma Yusuf nataa nae, “Ama mane'. Au o nda 'uhine saa sa boe. 'Aka' a Lamatualain mana nahine teb'e meit ma sosoa na. Tantu Ana nau nafad'e dala malole' neu ama mane'.”
17 Boe ma, mane' a dui nae, “Sia meit ngga, au 'umburii' sia loe Nil suu na. 18 Hambu sapi maao' hitu, rou na ra manggamomou'. Ara dea rema mia loe a, de raa uru sia loe suu na. 19 Basa ma sapi laen hitu rema. Te sapi naa ra nggod'a rui'. Sia rae Masir ia, au nda fe'e 'ita sapi nggod'a' 'ona' naa ra sa! 20 De au titindindii' a. Huu 'aib'oi' ma, sapi nggod'a kahitu' ra, 'od'o hendi sapi maao kahitu' ra. 21 Ara 'od'o basa ma, ao na ra nggod'a' fe'e naa ena. Boe ma au fela boe.
22 Basa ma, au sunggu' 'usumbeta, de 'ulumein fai. 'Ita are mbule maisi' hitu, dea rema mia are hau' esa. 23 Boe ma, 'ita are mbule laka' hitu, loe-lesu rae reu, huu dai ani matob'i'. 24 Boe ma are mbule laka' ra, 'od'o hendi are mbule maisi kahitu' ra. Ma au fela boe. Basa ma au dui meit naa ra reu atahori mahine' ra. Te nda hambu esa nahine sosoan sa boe.”
25 Dei de Yusuf nafad'e nae, “Ama mane'. Meit karua' naa ra sosoan 'aka' esa. Lamatualain nafad'e mema' ama mane', saa fo Eni nae tao. 26 Meit naa ra sosoan ta'o ia: sapi kahitu maao' naa ra, ma are mbule maisi kahitu' naa ra, naeni fula-fai betas too hitu. Sosoa na ra 'aka' esa' a. 27 Boe ma, sapi nggod'a kahitu' ra, ma are mbule laka kahitu' naa ra, fula-fai ndoe-la'as too hitu.
28 Noo ta'o naa, Lamatualain nafad'e mema' saa fo Eni nae tao' a. Naa, 'ona' au 'ola' faa' ra. 29 Dei fo hita hambu fula-fai betas too hitu ndule mamana' sia nusa Masir. 30-31 Basa fo hita hambu fula-fai ndoe-la'as too hitu. Fula-fai ndoe-la'as naa manaseli', losa nda hambu nanaat sia nusa' ia sa. Basa atahori ndoe rala seli, de nda 'afi' rasaned'a fula-fai betas naa sa ena.
32 Dad'i ama mane' nalamein lao rua naa ra, sosoan nae, Lamatualain nafad'e mema' saa fo Eni nae tao' naa. Nda doo' sa te, saa fo Ana ator nala naa, sangga rae dad'i ena.
33 Huu naa, au 'o'e ta'o ia: malole lena' ama mane' sangga atahori mahine' esa mana bisa tao mata' nala' noo malole'. Basa na so'u e fo tao malolole nusa' ia. 34 Fula-fai betas too hitu naa, malole lena' ama mane' so'u atahori laen fai, fo rad'uru nanaa lena' ra. Nanaa lena' naa ra, banggi neu bab'anggi' lima fo mbed'a' bab'anggi' esa. 35 Ara musi tungga ama mane' parendan, fo reu ha'i are mia basa kambo' sia Masir. Fo ara mbed'a' are naa ra sia soka-pole' ra fo nenea malolole. 36 Naa fo too hitu ndoe-la'as losa, te hita fe'e ta'ena nanaat. Ator ta'o naa fo nda hambu atahori mate ndoes sa.”
Mane' a so'u Yusuf dad'i fetor na sia rae Masir
37 Mane' noo pagau monae na ra rena Yusuf 'o'olan, ma ara tungga e. 38 Mane' a 'ola' nae, “Lamatualain Dula-d'alen koasan, sia Yusuf ena. Naa de, ata nda bisa hambu atahori laen lena' e sa ena.”
39 Boe ma mane' a 'ola' noo Yusuf nae, “Lamatualain nafad'e basa ia ra neu nggo. Ia naa, hai fe'e bub'ulu' ho mahine'. Ma dud'u'am lena' basa atahori. 40 Naa de, ia naa au so'u nggo dad'i lima 'ona ngga, fo dad'i malangga sia ume panggat ngga. Ma dei fo basa rauinggu ngga ra tungga parenda ma. Te 'aka' a au fo lena' nggo.”
41-42 Basa naa ma, mane' a 'olu hendi ndeli stempel na, de 'olu neu Yusuf lima 'u'u na. Boe ma 'ola' nae, “Noo ndeli ia, au so'u nggo dad'i fetor ngga sia basa nusa Masir ia.” Boe ma ana 'olu bad'u naru meulau' esa neu Yusuf, ma bo'olii rante lilo' neu boto na.
43 Basa ma, ana fee kareta ndara nomer karuan neu Yusuf fo sae. Atahori rela ra'ahulu' reu mata' ma nggasi rasafafali rae, “Wee! Soi dala', o! Fee had'a-hormat!a Hambu moko-monaen nema tungga ia.” Noo ta'o naa, mane' a so'u Yusuf dad'i fetor sia nusa Masir.
44 Basa naa ma, mane' a 'ola' noo Yusuf nae, “Ta'o ia. Ho bub'ulu' mema' mae au ia mane'. Ma au 'ufad'e basa atahori sia Masir ia 'ae, mete ma ho nda munggolo' sa naa, ara nda bole tao saa sa boe.”
45 Basa naa ma, mane' a bab'ae Yusuf, naran Safnat Panea, tungga atahori Masir ra nara na. Ana na'asasao' Yusuf noo ina' esa, naran Asnat. Yusuf ama arin, naran Potifera. Eni malangga agama sia kota On.b Noo ta'o naa, Yusuf dad'i atahori monae' sia nusa Masir.
46 Lele' mane' a so'u Yusuf, te ana too telu nulu ena. Basa ma, ana neu lao ndule basa mamana' sia nusa Masir. 47 Sia too hitu fula-fai betas naa, osi ra nanaa na ra naen seli. 48 Yusuf denu rad'uru nanaa lena' ra, de mbed'a' se. Are mia mamana deka kota bee, na, mbed'a' se sia soka-pole' sia kota naa boe. 49 Losa are fo ana nad'uru' naa, naen seli. 'Ona' sara'ae' sia tasi suun, de nda hambu atahori uku rala sa ena.
50 Fula-fai ndoe-la'as nda fe'e losa sa te, Yusuf saon Asnat bonggi ana tou' rua ena. 51 Yusuf 'ola' nae, “Lamatualain tao au lilii' doid'oso ngga lele' au lao hela ama ngga ume na.” Naa de ana bab'ae ana ulun, naran Manase (liin nae 'a 'ona' ded'ea laen, fo sosoan 'oi, ‘lilii'’).
52 Lele' ana hambu ana karuan, ma ana 'ola' fai nae, “Au hambu doid'oso' nae' sia mamana' ia. Te Lamatualain fee papala-b'ab'anggi', ma au o hambu ana' sia ia boe.” De ana bab'ae ana' naa, naran Efraim.c
53 Boe ma fula-fai betas too hitu a basa ma, 54 fula-fai ndoe-la'as too hitu losa, nandaa noo saa fo Yusuf nafad'e ma'ahulu na. Sia mamana' laen, atahori ndoe, te basa mamana' sia Masir, hambu nanaat. 55 Doo-d'oo ma, atahori Masir ra o ndoe boe. De ara reu ro'e nanaat sia mane' a. Boe ma ana denu se risi' Yusuf, fo tungga 'a Yusuf parenda na.