Yusuf nafad'e atahori bui rua meit na ra sosoa na
40
1-3 Sia bui naa, hambu atahori rua, ma'ahulun ara dad'i malangga mana ator sia mane Masir ume panggat na. Esa, ator mane' a nininun, ma esa ator mane' a roti na. Lao esa ara tao rasala' mane' a. Naa de mane' a namanasa, losa tao se bui rala reu. De ru'a se sia mamana' esa roo Yusuf. 4 Boe ma, malangga bui a parenda Yusuf tao mata' neu ru'a se. Ara leo sia naa losa too esa do rua.5 Tetemba' esa, pagau karua' ra ralamein. Esa-esa' noo meit na. Meit naa ra esa' noo sosoa na. 6 Mbila' neu ma, Yusuf nema ma nita ru'a se mata na ra susa. 7 Ana natane se nae, “Ta'o bee de mata ma ra nda matetu' sa?”
8 Ara rataa rae, “Temba' a hai milimein, te hai nda bub'ulu' sosoan sa.”
Boe ma Yusuf 'ola' nae, “Nda hambu atahori esa nahine meit ra sosoan sa, 'aka' a Lamatualain. Hei dui sob'a dei. Dei fo au sangga sosoan mia Lamatualain.”
9 Basa ma, atahori mana tao mata' neu mane' a nininun, dui nae, “Ta'o ia. Sia meit ngga, au 'ita hau huu anggor esa, 10 masarangga' telu. Hau huu' naa naroo neu' ena, nab'una, ma nab'oa latu nggingginu'. 11 Basa ma 'ita, au to'u mane' a nggalaa nininu na. Ma au ha'i 'ala boa anggor de 'ee oen nisi' mane' a nggalaa na. Basa de, au loo fee mane' a fo ninu.”
12 Lele' Yusuf rena na'o naa, ma ana nafad'e nae, “Ama'. Meit naa sosoan ta'o ia: masarangga' telu naa, sosoan fai telu. 13 Sia 'a fai telu rala ia, mane' a fee ama' kalua mia bui ia. Basa ma ana so'u bali' ama', fo ator selu' nininun 'ona' ma'ahulu na. 14 Mete ma ama' ua-nalem malole' ta'o naa, na, 'afi' lilii' au, o! Mete ma ama' sue au, tulun mufad'e mane' a, fo ana tao au dea' 'uu mia mamana' ia dei. 15 Te tungga matetun, ara ha'i ra'asususa' au mia atahori Ibrani ra kambo na. Sia ia, au nda tao de'ulaka' saa sa boe. Tao-tao te, ara tao au bui rala 'uu ena, 'ona' au, atahori de'ulaka'.”
16 Atahori mana tao roti a rena nala meit a sosoan meulaun ta'o naa ma, ana dui Yusuf nae, “Od'i', e. Au o 'ulumein ta'o ia: au suu boa telu. 17 Sia boa ata ka, hambu mane' a kokis na mata'-mata'. Te mbui' ra rema de bito hendi basa se, mia langga ngga ata.”
18 Yusuf rena nala ma, nataa nae, “Ama' meit na, sosoan ta'o ia: boa katelu' naa ra, sosoan fai telu. 19 Sia 'a fai telu rala ia, mane' a denu atahori rema tati hendi ama' langga na. De ara londa ama' aom neu rii. Boe ma mbui' ra rema bid'o rab'asa ama' ao-sisi ma.”
20 Seli fai telu ma, nandaa noo mane' a fai bob'onggin, ana tao fefeta monae' fee basa pagau na ra. Ana parenda se reu kalua pagau karua' ra dea reu. 21 Basa ma, ana so'u bali' pagau mana ator mane' a nininun, neu bali' panggat fefeun, fo ana ator bali' mane' a nininu na.
22 Te pagau mana ator mane' a rotin, ara londa risa e, 'ona' a Yusuf 'o'ola na.
23 Te pagau mana ator nininu' a, nda nasaned'a Yusuf sa. Ana lilii' hendi e.