Yusuf noo malangga Potifar sao na
39
1-2 Lele' naa, atahori Ismael ra roo Yusuf Masir neu. Sia naa, hambu atahori moko-monaen esa, naran Potifar. Eni, malangga mia basa sold'ad'u mana ranea sia mane Masir ume panggat na. Boe ma Potifar hasa nala Yusuf mia mana danggan naa ra, fo dad'i ate sia ume na. Sia naa, LAMATUALAIN tulu-fali Yusuf, de ue-tatao na ra basa se dad'i noo malole'. 3 Malanggan nita e tao ues malolen seli, ma nahine teb'e nae LAMATUALAIN tulu-fali Yusuf. 4 Naa de malanggan hii ma namahere e. De ana so'u e dad'i mandor sia ume na. Ana fee ne mana ator umen ma basa hata-heto na. 5 Eni' a Yusuf dad'i mandor sia naa, Lamatualain o fee papala-b'ab'anggi' neu malanggan, atahori Masir naa. Ume isi na ra, hata-heton, osin, noo ue-tataon o dad'i malole' boe. 6 Huu Potifar mete Yusuf tao mata' neu basa ue-tataos ra noo malole', naa de ana nda 'afi' du'a saa sa boe, nahine' a naa 'a.Lele' naa, Yusuf ia meulaun seli. 7 Ana nda fe'e leo doo' sia naa sa te, Potifar saon ralan tud'a noo e. Boe ma ana kokoe Yusuf fo nae sunggu' noo e.
8 Te Yusuf nda nau sa. De nataa nae, “'Afi' ta'o naa, mama! Te malangga ngga Potifar fee au koasa fo ator basa ue-tataos ra. 9 Sia ume ia, nda hambu atahori esa to'u koasa lena' au sa. Malangga fee au ator basa ume isi' a, 'aka' a mama fo au nda 'u'ena hak ator sa. Ta'o bee de au tao de'ulaka' 'ona' naa! Naa o au lab'an Lamatualain hihii na.”
10 Te mae 'ona' naa o, tungga-tungga fai, na, malangga saon 'aka' kokoe nakandoo 'a. Te Yusuf nda taoafi' neu e sa.
11 Lao esa ma, Yusuf ume rala neu, fo nae mete ues na ra. Fai' naa, atahori nese ume. 12 Boe ma malangga saon nema lea Yusuf bad'un, de nae, “'Uma leo! Ia naa hela' a hita ru'a nggita ena. 'Uma fo teu sunggu'.”
Te Yusuf nda nau sa. De ana nalelea, losa bad'un lufa hendi' e. Boe ma ana nela dea neu. Te ina' naa fe'e to'u nahere' bad'u na.
13 Lele' Potifar saon nita Yusuf nela hela bad'un ma, 14-15 ana no'e atahori mana tao ues na ra, de nafad'e nae, “Wee! 'Ima mita dei! Faa' ra tou Ibrani naa, maso' au kama ngga. Ana nae bod'e au, te au nggasi 'uhere'. Mete sie, ana hela bad'un, de nela dea neu. Au sao ngga nendi atahori ia nda nahine had'at sa de tao na'amamae' a hita!”
16 Boe ma Potifar saon to'u bad'u naa losa saon bali'. 17 Saon bali' ma, ana dui nae, “'A'a, e! Atahori Ibrani fo 'a'a noo' a, faa' ra ana mia au kama ngga rala, nae parkosa au. 18 Te au nggasi 'uhere' 'o'e atahori ra. De ana nela, lao hela bad'u na.”
19 Lele' Potifar rena saon dui na'o naa, boe ma namanasa nala seli. 20 Ana denu reu to'u Yusuf, de tao e nisi' mane' a buin rala.
21 Te LAMATUALAIN nda lilii' Yusuf sa. De Ana tulun e, losa malangga bui a o hii Yusuf, 22 ma namahere e boe. De ana fee ne ator basa atahori bui ra, ma basa ue-tataos sia naa ra. 23 Huu naa, malangga nda tao mata' neu saa-saa sia bui rala sa ena. LAMATUALAIN tulu-fali Yusuf nakandoo 'a, de basa ue-tataos ra dad'i noo malole'.