Yahud'a noo ana feto feun Tamar
38
Basa naa ma, Yahud'a lao hela 'od'i-'a'a na ra, de neu leo noo nonoon Hira sia kambo Adulam. 2 Sia naa, hambu ama' esa, atahori Kana'an, naran Sua. Yahud'a hii Sua ana feton esa, de ru'a se sao. De ana bonggi ana tou' hira matutungga'. 3 Ana kaesan, ara bab'ae naran, Er. 4 Boe ma karuan, ara bab'ae naran, Onan. 5 Ma katelun, naran Sela. Bonggi Sela ma, ara lali risi' kambo' laen, naran Kesib.6 Lele' ana kaesan, Er, na'amoko boe, ma Yahud'a neu natane fee ne ana feto' esa, naran Tamar. De ru'a se sao. 7 Te Er naa, de'ulakan seli. Naa de, Lamatualain hukun nisa e. Naa de ana mate nda hela ana' sa.
8 Basa ma, Yahud'a denu ana karuan nae, “Onan! 'A'am mate ena, te nda maana' sa. De ia naa, tungga atahori lasi' ra, na, musi nggati 'a'am fo sao mala sao na. Fo fee 'a'am tititi-nonosi'.”
9 Onan nahine 'ad'at naa ena. Te ana nda nau fee tititi-nonosi' neu 'a'an Er sa. De mete ma ana sunggu' noo Tamar, na, ana nggari hendi fini a, naa fo Tamar nda bonggi sa. 10 Onan tataon 'ona' naa, tao fee Lamatualain namanasa nala seli. Naa de Lamatualain o hukun nisa e boe.
11 Lele' Yahud'a bub'ulu' ana na ra ru'a se mana sao Tamar mate ena, ma ana namatau. Ana du'a, 'afi' losa ana murin Sela sao nala Tamar, ma ana o mate boe. Naa de, nafad'e ana feto feun Tamar nae, “Ana ngga, e. Malole lena' bali' misi' ina-ama ma ra leo. Dei fo ana ngga Sela na'amoko, fo bali' 'uma sao mala e.” Boe ma Tamar bali'.
12 Doo-d'oo ma, Yahud'a saon mate. De ana susa losa fai sususa' basa.a Basa naa ma, ana no'e nonoon Hira, de ru'a se kambo Timna reu. Sia naa, atahori ra ra'ab'ue nggute bib'i lombo fulu', fo seo.
13 Boe ma atahori rafad'e Tamar rae, “Ama arim, lao Timna neu tungga fefeta nggute bib'i lombo fulu'.”
14 Lele' naa, Yahud'a ana murin Sela na'amoko ena. Te Tamar nahine nae ama arin nda nau fee eni sao nala Sela sa. Boe ma Tamar sangga dala' fo no'e hak na. De ana 'olu hendi bua ina falun, ma nggati bua meulau'. Ana lalaa langgan ma mboti matan nendi' lafe ana'. De neu 'endo' sia kambo Enaim lelesu inen, sia dala' nisi' Timna neu. 15 Lele' Yahud'a tungga lelesu ine' a, ma nita ina' esa. Nae ne'o ina dala', huu Tamar koao noo bua-b'a'un, ma mboti mata na. 16 Yahud'a nda bub'ulu' nae, naa eni ana feto feun sa. Dad'i ana neu deka-d'eka ina' naa, de natane nae, “Wee! Mete ma au 'oo ho, na, mo'e ba'u saa?”
Tamar nataa nae, “Neu. Mia 'a ama' hihii na.”
17 Yahud'a nae, “Ona bee, au fee hiek esa, do?”
Tamar nataa nae, “Malole, ama'. Sad'i fee au to'u saa dad'i neu nemehere' dei. Losa sud'i 'a fai hira' fo ama' haitua hiek a nema o, neu.”
18-19 Boe ma Yahud'a natane nae, “Au fee saa dad'i neu nemehere'?”
Tamar nataa nae, “Ama' fee hela cap fo mana doko-d'oko', noo talin sia boto ma. Ma lao hela teteas boe.” Rena 'ona' naa, ma Yahud'a fee basa sud'i 'a saa naa ra reu e.
De ru'a se reu sunggu' ra'ab'ue. Basa ma, Tamar bali'. Ana 'olu hendi bua-b'a'u meulaun noo lafe ana' a, de pake bali' bua-b'a'u ina falu na. Nda bub'ulu' sa te, Tamar nairu ena.
20 Nda doo' sa ma, Yahud'a no'e tulun nonoon Hira nae, “Mendi hiek ia fee neu ina dala' mana sia Enaim dei, fo ha'i mala bali' au sud'i 'a saa ngga ra fo ana to'u' a.” Hira neu losa naa ma, natane neu-nema, te nda nandaa noo ina' naa sa. 21 Boe ma natane atahori mana sia naa ra nae, “Wee! Hei mita ina dala' fo la'efaa naa ana 'endo' sia lelesu ine' ia, do? Ana sia bee?”
Te rataa rae, “Ama', ina dala' nese ia.”
22 De Hira bali' nisi' Yahud'a. Ana nafad'e nae, “Au nda 'undaa 'oo ina' naa sa. Au sangga-sangga, te atahori rae, ina dala' nese naa.”
23 Yahud'a nataa nae, “Hela sud'i 'a saa naa ra, fo ana soa se. Sad'i atahori 'afi' tao ra'amamae' nggita. Au 'ae bae, te nda tandaa too e sa na.”
24 Seli fula telu ma, atahori reu rafad'e Yahud'a rae, “Ana feto feum Tamar tao aon dad'i ina dala'. De ia naa ana nairu ena.”
Yahud'a rena nala ma, namanasa nala seli. De ana parenda atahori na ra nae, “Mii lea moo ina' naa nema, fo lalangge e horis!”
25 De reu lea rendi Tamar. Ma ana ha'i cap noo teteas a. Boe ma ana denu se reu rafad'e ama arin nae, “Papa, tulun paresa' sud'i 'a saa ia ra dei. Cap ma teteas ia tenu-'enan, mana tao au uiru.”
26 Yahud'a nita sud'i 'a saa naa ra ma, nahine neu' ena, nae eni 'ena na. De nafad'e nae, “Mema'! Ina' naa nda sala sa. Mana sala' a, au. Matetun, au musi 'u'usasao' e noo ana ngga Sela. Te au nda nau sa. Mbo'i e neu!” Boe ma, Yahud'a nda na'ab'ue noo Tamar sa ena.
27 Tamar fula-fai bob'onggin losa ma, ana bonggi ana dua'. 28 Lele' ana bonggi, ma ana' esa liman na'ahulu' dea nema. De mana na'ab'ob'onggi' a pa'a ab'a mbilas neu lima na. Ana nae, “Ia, kaesa na.” 29 Te ana' naa lea bali' lima na. De nonoon dea nema na'ahulu'. Mana na'ab'ob'onggi' a nafad'e neu ana' naa nae, “Wee! Mema' ho ma'ad'ere', o! Naa de, mukuseseti mu'uhulu' dea 'uma!” Ara bab'ae ana' naa, naran Peres (sosoan nae, ‘nakaseseti dea nema’). 30 Dei de, 'od'in mana nenepa'a' noo ab'a mbilas a dea nema. Ara bab'ae naran, Sera (sosoan nae, ‘mbila raa-raa’).