2b Lele' naa, Yakob anan esa mia saon Rahel, naran Yusuf. Ana too sanahulu hitu ma, noo 'a'a na ra reu ranea hiek-lombo ra. 'A'a na ra, ana' mia Yakob sao na ra, Bilha ma Silpa. Te Yusuf ia, mana nendi-nendi' ded'eat fee aman, so'al 'a'a na ra.

3 Lele' bonggi Yusuf, te Yakob lasi' ena. Naa de ana sue Yusuf lena' anan laen ra. Lao esa, Yakob soo bad'u naru meulau' esa,^a fee Yusuf. 4 'A'a na ra rahine aman sue Yusuf lena' ma, ara ramanasa rala e seli. Ara nda nau 'ola-'ola' malolole roo e sa ena.

5-7 Tetemba' esa ma, Yusuf nalamein. De nafad'e meit naa neu 'a'a na ra nae, “Wee! Hei rena dei! Au 'ulumein 'ae basa nggita pa'a are-gandum sia osi rala. Au are ngga nambarii' ndoos. Te hei are ma ra rambarii' ndule au are ngga, ma be'utee neu are ngga.” 'A'a na ra rena rala ma, boe ramanasa e.

8 Boe ma ara 'ai Yusuf rae, “Woi! Mbei ma ho mae dad'i hai malangga mana parendam, do?” Ara ramanasa rala e seli, huu nafad'e meit naa.

9 Basa naa ma, Yusuf nalamein selu' fai. De ana nafad'e 'a'a na ra nae, “Wee! Au 'ulumein selu' fai. Au 'ita relo, fulan, ma nduu' sanahulu esa. Basa se be'utee malolole neu au.” 10 Yusuf dui basa meit naa neu aman noo 'a'a na ra ma, aman 'ai e nae, “Meit saa ka naa! Ho du'a mae au 'oo inam, ma 'a'a ma ra 'ima 'id'u eim, do? Ho seli, ma!” 11 De Yusuf 'a'a na ra rambed'a' rala' roo e. Te aman dud'u'a meit naa nakandoo 'a.

12 Fai' esa ma, Yusuf 'a'a na ra rendi aman hiek-lombo na ra losa deka noo kambo Sikem. 13 Nda doo' sa ma, aman nae, “Yusuf, e! 'A'a ma ra ranea hiek-lombo deka noo Sikem. De muote fo muu se'u se dei.”

Yusuf nataa nae, “Malole papa.”

14 Boe ma aman nae, “Muu dei, fo se'u 'a'a ma ra roo hiek-lombo ngga ra. Ara 'ona bee naa, bali' 'uma mufad'e au.”

Boe ma, Yusuf lao hela rae Hebron moon, de nakandoo Sikem neu. 15 Losa-losa' ma, ana sangga se ndule moo' a. Basa ma, nandaa noo atahori esa. De atahori naa natane e nae, “Ho sangga saa?”

16 Yusuf nataa nae, “To'o. Au sangga 'a'a ngga ra. Ara mboo hiek-lombo sangga uru deka-d'eka ia. To'o nita se boe, do?”

17 Boe ma, atahori naa nafad'e nae, “Ara nda sia ia sa ena. 'Oi rae reu sia deka-d'eka kambo Dotan.”

Boe ma, Yusuf neu tungga 'a'a na ra, losa nita se sia Dotan. 18 Lele' Yusuf fe'e sia doo-d'oo', te ara rita e ena. Boe ma ara ma'ira' rae tao risa e. 19 Esa nafad'e esa nae, “Mete dei. Malangga meit a nema ena! 20 Ata tao tisa e leo, do? Basa fo honda hendi' e nisi' oe mates rala neu. Dei fo tafad'e ama' tae banda fui ra raa hendi e. Basa fo ata mete meit na ra, ta'o bee!”

21 Lele' 'a'an Ruben rena nala ma, ana sangga dala' fo nae fee ne nasod'a. De ana 'ai 'od'i na ra nae, “Wee! Ata 'afi' tao tisa e! 22 Malole lena' ata tumbu' e nisi' oe mates ia rala. Sia ia mamana ma'ab'ambi', de atahori nda rahine sa. Sad'i 'afi' tasai' raa na.” Ana 'ola' ta'o naa, huu ana nae mbo'i Yusuf, fo denu e bali'.

23 Lele' Yusuf losa ma, 'a'a na ra to'u rala e, de sid'a hendi bad'u naru meulau na. 24 Basa ma, ara lea dud'ui e, de tumbu' e oe mates rala neu.

25 Basa boe ma ara bali' reu raa. Ara fe'e raa, 'aib'oi' ma, rita nononggo' esa nema. Nononggo' naa, banda onta na ra fua bua danggan, 'ona' hau ma'ameni', bumbu-b'umbu, ma mod'o mata'-mata'. Tao-tao te nononggo' naa atahori Ismael mia kambo Gilead rae reu sia doo-d'oo' sia nusa Masir.

26 Basa ma, Yahud'a nafad'e 'od'i-'a'a na ra nae, “Wee! Malole lena' ta'o ia. 'Afi' tisa e. Te sosoan saa? Mae 'ona bee o, nda bisa ta'afuni' tala raan sa. 27 Malole lena' ata seo hendi' e neu atahori Ismael ra. Mae tao ta'o bee mbali e o, basa nggita ama' esa. De 'afi' ta'ahina e!” Boe ma, basa se tungga 'o'ola na.

28 Boe ma, nandaa noo atahori mana danggan naa ra^b tungga naa, Yusuf 'a'a na ra lea e mia oe rala. De ara seo e neu atahori Ismael naa ra, felin doi fula' rua nulu.^c Basa ma, ara rendi Yusuf Masir neu.

29 Ara seo Yusuf, te Ruben nda bub'ulu' sa. Naa de, lele' ana bali' nisi' oe mata' a neu, ma ana nggengger nala seli, huu Yusuf nese ena. De ana sisid'a bad'un sia aon, huu ralan susa nala seli. 30 Boe ma ana bali' nisi' 'od'i na ra nae, “Ad'uu! Ana' a nese ia ena. Ia naa, au 'ae tao ta'o bee fai?”

31 Basa ma ara hala hiek esa, de ha'i Yusuf bad'u meulaun, de boro' e neu raa'. 32 Boe ma ha'i rala bad'u fo 'aka' raa' naa, de rendi fee aman, ma rafad'e rae, “Papa! Hai here mala bad'u ia. Mete sob'a. 'Afi' losa 'od'i Yusuf ena na.”

33 Yakob mete nita bad'u a ma, nahine neu' ena. Ana nataa nae, “Ad'uu! Mema' ia ana ngga bad'u na. Mita' mae banda fui ra raa e sia bee ena. Awee! Au ana ngga mate ena!”

34 Basa ma, Yakob sisid'a bad'un, de 'olu karon 'ab'as, huu ana susa nala seli.^d Boe ma ana nggae nakandondoo' a anan doon seli. 35 Basa ana toun ma ana ina na ra rema rad'ad'ale, te nda rala e sa. Ana nae, “Hoko'! Au susa losa mate. Au nda bisa lilii' ana' ia sa.” De Yakob susa nakandoo 'a, huu nasaned'a anan Yusuf mana mate' a.

36 Lele' Yakob fe'e susa 'ona' naa, te atahori danggan naa ra^e losa Masir ena. De reu seo Yusuf neu malangga esa, naran Potifar. Eni, mane Masir a malangga nanea na.