Yakob se rela risi' Betel
35
Basa naa ma, Lamatualain 'ola' noo Yakob nae, “Au ia, Lamatualain fo mana 'utud'u ao ngga neu nggo, lele' mela mia 'a'am Esau. Ia naa, ho lali Betel muu leo. Losa naa, na, muririi mei tunu-hotu' fee Au. Ma leo muu naa leo.”2-3 Basa ma, Yakob 'ola' noo basa ume isi na ra nae, “Ia naa, basa nggita tae lao Betel teu. Ma'ahulun, lele' au mia sususa' rala, Lamatualain tulu-fali au sia naa. Au 'ae uririi mei tunu-hotu' sia naa fai. Dad'i ia naa, nggari hendi basa paton sosonggo ma ra leo. Tao mimemeu ao ma ra, ma nggati bua-b'a'u ma ra, te ata tae be'utee neu Lamatualain.” 4 Boe ma ara fee basa paton sosonggo na ra ma basa 'a'andiki na ra.a De Yakob na'oi se sia hau huu ine' esa rae', deka noo kambo Sikem. 5 Lele' Yakob noo atahori na ra lao mia Sikem ma, Lamatualain fee nemetaus neu atahori ndule nusa' naa ra, de ara nda rambarani tao de'ulaka' neu Yakob se sa.
6 Naa de, Yakob noo basa atahori na ra, losa Betel sia rae Kana'an noo masod'a'. (Fe'esa'an, Betel naran Lus.) 7 Losa naa ma, Yakob lutu mbatu mei tunu-hotu'. Ana bab'ae mamana' naa, naran El Betel, (sosoan ‘Betel Lamatualain na’), huu ma'ahulun Lamatualain natud'u aon neu Yakob sia naa, lele' ana nela mia 'a'a na.
8 Deka noo kambo Betel, hambu hau huu ine' esa atahori rae, Alon Bakut. Sosoan ‘hau ngganggaet’. Ara bab'ae ra'o naa, huu lele' ina mana 'o'o Ribka, naran Debora mate, ara ra'oi e sia hau huu' naa rae'.
9 Lele' Yakob bali' mia Padan Aram ma, Lamatualain natud'u aon neu e fai, ma fee ne papala-b'ab'anggi'. 10 Lamatualain 'ola' nae, “Eni' a mia ia nema, naram nda Yakob sa ena. Te Au fee nara feum, naeni, Isra'el.b 11 Au ia, Lamatualain Mana Koasa Manaseli'. De bonggi mumuhefu leo! Mete te, nusa-nusa' ra rema mia tititi-nonosi ma ra. Ma bonggi mala mane-mane' ra boe. 12 Nusa' fo Au fee neu ba'im Abraham ma amam Isak, ia naa Au fee neu nggo moo tititi-nonosi ma ra.”
13-14 Lamatualain 'ola' basa na'o naa ma, Yakob naririi rii fatu' esa sia naa, dad'i nesenened'a' neu Lamatualain hehelu-fufuli na. Boe ma, ana mbo'a oe anggor noo mina neu fatu a ata, de be'utee neu Lamatualain. 15 Ana bab'ae mamana' naa, Betel.
Yakob saon Rahel bonggi de mate
16 Basa naa ma, Yakob se lao hela Betel. Lele' ara fe'e ra'ad'oo' roo Efrata (nara laen na, Betlehem), te Rahel nae 'a bonggi ena. Te ana bonggi susa. 17 Ana fe'e na'ananasa' nita mamaten ma, mana na'ab'ob'onggi' a nafad'e e nae, “Ina Rahel! Tao manggatetee ralam, huu ina' hambu ana tou' esa fai!” 18 Lele' Rahel hahaen nae 'etu ma, ana bab'ae ana' naa, naran Ben-Oni, (sosoan nae, ‘ana' mia doid'oso ngga’). Basa naa ma, ana mate boe. Te Yakob bab'ae ana' naa, naran Benyamin, (sosoan nae, ‘ana lima 'ona'’).
19 Basa ma, ara ra'oi Rahel sia dala' mana nae nisi' Efrata suun (ia naa, Efrata naran Betlehem). 20 Boe ma Yakob naririi fatu rates esa sia naa. Losa fai' ia, Rahel fatu rates na, fe'e sia.
Yakob ana na ra
21 Basa naa ma, Yakobc 'aka' lali-lali' nakandoo 'a. Lao esa, ana naririi lalaat sia ume kanaru ine' esa, naran Eder bob'oa na. 22 Lele' ara fe'e leo sia naa ma, Ruben sunggu' noo aman sao tias na, Bilha. Ma Yakob o bub'ulu' dala' naa boe.
Yakob ana mone na ra atahori sanahulu rua. Naeni,
23 Lea ana na ra, Ruben (fo Yakob ana ulun), Simeon, Lewi, Yahud'a, Isaskar, ma Sebulon.
24 Rahel ana na ra, Yusuf ma Benyamin.
25 Rahel aten Bilha ana na ra, Dan ma Naftali.
26 Ma Lea aten Silpa ana na ra, Gad ma Aser.
Ara bonggi basa ana' naa ra sia Padan Aram.
Yakob aman Isak mate