5 Lele' Yakob rena atahori parkosa ana feton, te ana hie-hie' a, nda tao saa sa boe. Huu lele' naa, ana mone na ra ranea banda ra sia moo', de ana nahani losa basa se bali'.

6 Boe ma Sikem aman Hemor nisi' Yakob, fo nae natane Dina. 7 Ru'a se fe'e 'ola-'ola' ma, Yakob ana na ra bali' mia moo' a. Lele' ara rena 'oi Sikem parkosa sira feton Dina ma, rala na ra mera ma ramanasa rala seli. Ara rae, “Tataos mata' naa, nda nandaa sia Isra'el sa. Ata 'afi' simbo atahori mana tao de'ulaka' mata' naa.”

8 Te Hemor kokoe Yakob nae, “Toronoo' Yakob! Ana ngga Sikem ralan tud'a noo toronoo' ana feto ma. De au 'o'e fo ana ngga sao nala e. 9 Mete ma nau, na, hita ana na ra esa sao esa. Hei ana mone ma ra sao hai ana feto ma ra. Ma hai ana mone ma ra o sao hei ana feto ma ra boe. 10 Noo ta'o naa, ama leo mi'ib'ue moo hai sia ia. Ama hii ao ma ra sud'i 'a mae leo sia bee. Fo ama danggan, ma hambu su'i-b'etas sia ia.”

11-12 Basa naa ma, Sikem 'ola' noo Dina aman ma naa na ra nae, “Hei mae mo'e saa o, au tungga 'a. Mae mo'e doi tatana mamaet do, felis ba'u sa o, au bae. Sad'i fee au sao hei feto ma.”

13 Te Yakob ana na ra bub'ulu' 'oi Sikem parkosa sira feton Dina ena. De ara rataa 'e'ed'ik Sikem noo aman Hemor, 14 rae, “Hai nda bisa fee hai 'od'im sao atahori nda mana sunat saa! Naa, na'amamae' hai! 15 Te dala malolen ta'o ia: basa hei tou' moko-anak musi sunat 'ona' hai dei. 16 Mete ma hei tao ta'o naa, dei fo hita esa sao esa. Ma hai o bisa leo moo nggi sia ia, fo ata dad'i nusa' esa. 17 Te mete ma hei nda tungga hai hihii ma ra sa, ma nda sunat sa, dei fo hai mendi hai feto ma, fo lao hela mamana' ia.”

18 Boe ma, Hemor noo Sikem simbo 'o'ola na ra noo malole'. 19 Te Sikem nda 'afi' na'atataa' sa ena, huu ana hii nala Dina seli. Lele' naa, basa atahori sia nusa' naa fee had'a-hormat neu Sikem. 20 De Hemor noo Sikem risi' mamana ne'etu ded'eat sia kambo' a lelesu inen, de sangga dala' roo basa atahori mana sia nusa' naa. Ara 'ola' rae, 21 “Toronoo ngga ra, e! Atahori Isra'el ra hii rasod'a noo mole-d'ame roo nggita. Dad'i fee se leo ra'ab'ue roo nggita sia ia, huu nusa' ia loa' de dai basa nggita. Ara o nau hita sao sira ana feto na ra, ma sira o nau sao hita ana feto na ra boe. 22 Te ara ro'e 'aka' a dala anahiki' esa, mia hita e. Ara ro'e fo basa hita tou' ra musi sunat 'ona' sira boe. 23 Mete ma hita tasod'a ta'ab'ue ena, na, banda noo basa hata-heto na ra o dad'i hita pusakan boe. De malole lena' ata simbo hihii na ra fo basa nggita sunat. Nau, do?”

24 Basa atahori mana ma'ab'ue' sia naa ra, tungga Hemor noo Sikem 'o'ola na. De basa tou' mana sia nusa' naa sunat.

25 Fai katelun, lele' basa mana sunat ra bisu na ra fe'e rambeta ma, Dina naa na ra, Simeon noo Lewi, lesu rala fela-tafa na ra, ma maso' nee-nee risi' kambo' rala reu. De ara tao risa basa tou' ra. 26 Ara o risa Hemor noo Sikem boe. Basa de, roo bali' Dina lao hela Sikem ume na.

27 Basa ma, Yakob ana laen na ra kambo' rala reu, de rambas rala kambo' naa sud'i 'a saa na ra. Ara ramanasa, huu atahori parkosa sira feton sia naa. 28 Ara rambas rendi basa atahori ra saa-saa na ra mia ume rala, ma mboo rendi basa banda na ra mana sia moo' ra. 29 Ara o to'u rendi basa ina' ra roo ana na ra, ma rambas rala nusa' naa bua-b'a'u mafeli na ra boe.

30 Lele' Yakob bub'ulu' ana na ra tao ta'o naa ma, ana 'ola' noo Simeon noo Lewi nae, “Hei tao tatao nggoa' saa ia? Tao mi'isususa' au! Mete te, atahori Kana'an, atahori Peris, ma basa atahori ndule mamana' ia ra, ramanasa nggita. Atahori naa ra, hetar. Te hita atahori na ra, 'id'a' 'a. Mete ma ara taliono rema, na, lutu-'eto' nala basa nggita ena.”

31 Te ara rataa noo nasat rae, “Papa nau fo hai hela ara tao hai fetom dad'i ina dala', do?”