Yakob nandaa noo 'a'an Esau
33
Fai' naa, Yakob nita Esau nema noo nononggo' atahori natun haa (400). Ma ana bab'anggi ana na ra fee se esa-esa' risi' ina na ra. 2 Ana ator sao tias na ra roo ana na ra lao risi' mata'. Basa de, Lea noo ana na ra, dei fo Rahel noo anan Yusuf ra'ab'ui oe-oe'. 3 Te Yakob lao na'ahulu' basa se. Lele' ara rae deka roo 'a'an ma, ana sende' lulu-langgan ma be'utee losa rae a, lao hitu.4 Esau nita 'od'in ma, ana nela' neu nandaa noo e. Ana holu ma 'id'u e, de ru'a se nggae. 5 Lele' Esau nita ina' naa ra roo ana na ra, ma natane nae, “Basa atahori ia ra, seka?”
Yakob nataa nae, “Naa ra, atahori fo Lamatualain fee au, naeni 'a'a aten ia.”
6 Basa naa ma, Yakob sao tias na ra roo ana na ra, rema raloe ao na ra mbali Esau. 7 Basa de, Lea noo ana na ra, rema raloe ao na ra mbali Esau. Dei de Yusuf noo inan Rahel rema ra'ab'uit, raloe ao na ra mbali Esau.
8 Boe ma Esau natane nae, “Banda nononggo' fo ho haitua' ra, masud na saa?”
Yakob nataa nae, “Ta'o ia, 'a'a! Au fee basa naa ra neu 'a'a, naa fo 'a'a simbo au noo rala teme-ao'.”
9 Te Esau nataa nae, “Od'i'! Au su'i ngga o nae' boe. De 'afi' fee au saa boe.”
10 Ma Yakob nataa nae, “'A'a 'afi' ta'o naa! 'A'a musi simbo fo dad'i bukti 'a'a simbo au noo lima rua. Te au 'ita 'a'a humek faa' ra ma, 'ona' au 'ita Lamatualain humek. 11 De au hule noo had'a-hormat fo simbo au fefee ngga ia. Lamatualain malolen seli neu au, naa de Ana fee basa saa fo au parluu' ra.” Yakob kokoe nakandoo 'a, de nau nda nau sa o, Esau simbo nala se.
12 Basa naa ma, Esau 'ola' nae, “Mete ma ta'o naa, na, miote fo ata lao leo! Dei fo au 'oo nggi.”
13 Te Yakob nataa nae, “'Afi', 'a'a! 'A'a mete neu' ena. Ana' ra fe'e anad'iki' ri, de nda fe'e lao' be'i sa. Ma banda mana bonggi feu' ra o, hetar boe. Mete ma hita ta'asusuu' se lao' lai-lai, sia fai esa rala, na, banda ra bisa mate basa se. 14 De malole lena' 'a'a se lao mi'ihulu'. Dei fo basa hai lao' koe-koe mi'ib'uit. Losa naa fo, au 'eti se'u 'a'a sia Seir.”
15 Boe ma, Esau 'ola' fai nae, “Mete ma ta'o naa, na, au lao hela atahori ngga ra ruma roo nggo fo ratud'u nggi dala'.”
Te Yakob nae, “'Afi' tao ia-naa, 'a'a! Sad'i au bub'ulu' 'a'a simbo au ena, na, au 'umuho'o.”
16 Esau rena nala ma, ana lao hela se, de bali' Seir neu. 17 Te Yakob lao Sukot neu. Sia naa, ana tao ume, ma lalaet fee banda na ra. Naa de, ara bab'ae mamana' naa, naran Sukot (sosoan nae, ‘ume ne'etataa'’).
18 Neu mate'en ma, Yakob se losa noo masod'a' mia Padan Aram risi' kambo Sikem sia nusa Kana'an. Boe ma ara raririi lalaat, de leo deka kambo' naa. 19 Rae fo Yakob naririi lalaat naa, ana hasa na'etu' mia Hemor, Sikem ama na. Ana bae noo doi fula' natun esa. 20 Sia naa, ana lutu mbatu mei tunu-hotu'. Ana bab'ae mamana' naa, naran El-Elohe-Isra'el. Sosoan ‘Lamatualain naa, Isra'el Lamatualain na’.