Yakob namatau nandaa noo 'a'an Esau
32
Basa ma, Yakob se lao' rakandoo. Ma Lamatualain ate na ra mia sorga rema randaa roo e. 2 Lele' ana nita se ma, 'ola' nae, “Ia, Lamatualain sold'ad'u na ra mamana hahae ao na ra!” Naa de, ana bab'ae mamana' naa, naran Mahanaim (sosoan nae, ‘mamana hahae ao' rua’).3 Basa naa ma, Yakob denu atahori na ra hira, lao ra'ahulu' risi' nusa Edom (nara laen na, Seir), fo rafad'e 'a'an Esau rae, eni nae nema. 4 Yakob denu se nae, “Mii mifad'e au 'a'a ngga Esau ta'o ia: ‘Malangga Esau! Malangga aten, 'od'i Yakob, fee had'a-hormat naen seli neu malangga. Mia lalao ngga dalahulun, losa fai' ia, malangga aten ia, leo sia to'o Lab'an ume na. 5 Ia naa, malangga aten ia, na'ena sapi, keled'ei, hiek-lombo, ma ate tou' ma ina' boe. Au fee atahori ia ra ra'ahulu', fo rafad'e malangga so'al 'u'uma ngga. Au 'o'e fo malangga simbo hai noo malole'.’” Yakob denu basa ta'o naa ma, atahori naa ra lao.
6 Ara bali' risi' Yakob ma, rafad'e rae, “Hai mindaa moo ama' 'a'an Esau ena. Ia naa, ana nema noo tou' natun haa (400), fo rae randaa roo ama'.”
7 Yakob rena nala ma, tendan rombe, huu namatau nala seli. De ana banggi atahori na ra noo banda na ra, neu nononggo' rua. 8 Ana du'a nae, “Mete ma Esau nema namue mana sia mata' ra, na, mana sia dea' ra bisa rela sangga masod'a'.”
9 Basa naa ma, Yakob hule-o'e nae, “Lamatualain, e! Lamatualain fo au ba'i Abraham noo ama Isak ngga be'utee' a. Rena au dei! Fai ma'ahulun, Lamatualain denu au bali' 'uma sia bob'onggi ngga ra, sia nusa' ia. Ma Lamatualain o helu nae, dei fo Lamatualain tao natetu basa ia ra. 10 Au nda 'undaa simbo Lamatualain susuen sa, ma Lamatualain mete-se'u na. Ma'ahulun, au nggani loe Yordan ia, au 'endi 'aka' a teteas. Te ia naa, au bali' 'uma 'endi atahori noo banda nononggo' rua. 11 Au 'umutau, 'afi' losa 'a'a Esau nema namue fo tao nisa basa hai. De au 'o'e Lamatualain fee masod'a' neu au, o basa sao-ana ngga ra, mia e. 12 Lamatualain o mana helu mae fee au papala-b'ab'anggi' naen seli, ma tao tititi-nonosi ngga ra boe ramaheta, 'ona' a sara'ae' sia tasi suun, losa atahori nda 'ito-reken rala sa.”
13 Basa ma, Yakob sunggu' sia mamana' naa. Mbila fefetun ma, ana ha'i banda nae fee hie' neu 'a'an Esau. 14 Ana tengga nala bib'i hiek ine natun rua (200), bib'i hiek mone rua nulu (20), bib'i lombo ine natun rua (200), bib'i lombo mone rua nulu (20), 15 banda onta ine telu nulu (30) roo ana na ra fe'e mana susu', sapi ine haa nulu (40), sapi mone sanahulu, keled'ei ine rua nulu (20), ma keled'ei mone sanahulu. 16 Ana banggi banda ra mata' esa-esa' noo nononggo na. Ma ana fee nononggo' esa-esa' noo manatad'a na. Ana nafad'e se nae, “Lao mi'ihulu'. Dei fo au tungga dea. Te ama musi minea fo nononggo' esa na'ad'oo' noo esa.”
17 Ma Yakob parenda manatad'a mia nononggo' kaesan nae, “Mete ma au 'a'a ngga Esau nandaa noo nggo, ma natane nae, ‘Ho mae bee muu? Ho ia, seka ate na? Banda ia ra, seka ena na ra?’ 18 na, musi mutaa mae, ‘Banda ia ra, malangga aten Yakob ena na. Ana haitua fee 'a'an, malangga Esau. Te ana fe'e tungga dea.’” 19-20 Yakob o fee parenda' 'ona' naa neu basa manatad'a laen ra nae, “Mete ma mindaa moo 'a'a Esau, na, fee banda naa ra reu e, dei fo mifad'e mae au fe'e tungga dea.” Yakob du'a nae, mete ma eni fee basa banda naa ra reu Esau, na, Esau ralan namaloa noo e. 21 Dad'i ana haitua banda ra ra'ahulu', te tetemba' naa, ana fe'e nahani sia naa.
Yakob napote noo Lamatualain
22 Tetemba' naa, Yakob fela, de ator sao na ra ru'a se, sao tias na ra ru'a se, ma ana na ra sanahulu esa, fo ara nggani ra'ahulu' risi' loe Yabok seri'. 23 Lele' ara losa seri' ma, ana haitua basa hata-heto na ra naa reu.
24 Te Yakob mesa' ne nahani sia naa. Boe ma, tou' esa nema, napote noo e losa deka manggarelo. 25 Tou' a med'a nae 'a kala ma, ana hemba Yakob so'e noon, de rui bob'onggon lao hela manggo na. 26 Boe ma, tou' a nae, “Mbo'i au, te mbeifen te, relo a tod'a ena.”
Te Yakob nataa nae, “'Ola' fee au papala-b'ab'anggi', dei fo au mbo'i nggo!”
27 Tou' a nataa nae, “Ho naram, see?”
Nataa nae, “Yakob.”
28 Te tou' a 'ola' nae, “Ho naram, nda Yakob sa ena. Eni' a lele' ia, atahori ro'e nggo rae Isra'el, huu mupote moo atahori ma Lamatualain, de mu'utataa' losa nenembo'it.” (Nara' Isra'el sosoan nae, ‘mana napote noo Lamatualain’.)
29 Ma Yakob natane nae, “Naram, see?”
Te tou' a nae, “Mutane nara ngga, tao saa?” Boe ma ana 'ola' fee papala-b'ab'anggi' neu Yakob sia naa.
30 Boe ma Yakob 'ola' nae, “Au 'ita Lamatualain matan, te au fe'e masod'a'.” Huu naa, ana bab'ae mamana' naa Peni'el, sosoan nae, ‘Lamatualain mata na’.