3 Basa ma, LAMATUALAIN 'ola' noo Yakob nae, “Ia naa, fain losa ena. Ho musi bali' misi' ina-ama ma ra. Dei fo Au 'oo nggo.”

4 Basa ma, Yakob denu reu ro'e Rahel noo Lea, fo rema randaa roo e sia moo' mamana banda ra. 5 Boe ma nafad'e se nae, “Fai ma'ab'uin ia, au mete hei amam matan nasat, ma nda malole noo au 'ona' fai ma'ahulun sa ena. Te Lamatualain fo ama ngga namahere' a, noo au. 6 Hei ru'a nggi bub'ulu', doo basa ia, au tao ues 'ita' mamate ngga fee hei ama ma! 7 Te 'ona' naa o, ana 'e'ed'ik au lao hetar ena. Ana nggati au beb'engge ngga losa lao sanahulu. Mae 'ona' naa o, Lamatualain nanea nahere' au. 8 Lele' hei amam 'ola' nae, ‘Banda kokoto' ra, seb'a neu nggo,’ boe ma, banda ra bonggi, na, basa se kokoto'. Fai' laen, ana 'ola' fai nae, ‘Ia naa, banda 'e'eta' ra seb'a neu nggo,’ boe ma banda ra bonggi, na, 'aka' a 'e'eta' ra. 9 Lamatualain tao ta'o naa, fo Ana ha'i nala ama ma banda na ra, fo fee neu au.

10 Lao esa, lele' banda ra fula-fai rahoon, au 'ulumein, 'ae basa banda mone mana mahoo' ra, 'aka' a kokoto' ma 'e'eta'. 11 Au 'ulumein 'ona' a Lamatualain aten mia sorga no'e au nae, ‘Wee! Yakob!’

De au 'utaa 'ae, ‘Ta'o bee, Lamatua'?’

12 Ma ana nafad'e nae, ‘Mete dei! Basa banda mone mana mahoo' ra, 'aka' a kokoto' ma 'e'eta' ra. Au mana tao basa naa ra, huu Au 'ita Lab'an tataon neu nggo. 13 Au ia, Lamatualain mana natud'u aon neu nggo mia Betel. Sia naa, ho muririi fatu, ma mbori mina neu ata, de be'utee neu Au. Boe ma ho pa'a hehelu-fufuli' moo Au sia naa. Ia naa, ho musi lao hela nusa' ia, fo bali' misi' ina-amam nusa na.’”

14 Boe ma Lea noo Rahel rataa rae, “Neu! Hai tungga 'a! Hai nda 'afi' mi'ena hata-heto' saa-saa mia ama Lab'an sa ena. 15 Doo basa ia ena, tou lasi' a tao hai 'ona' atahori fea'. Ana seo hendi hai ma naa hendi hai felim ena. 16 Basa hata-heto' fo Lamatualain ha'i mia ama Lab'an, ia naa dad'i hita too tititi-nonosi' ta ra hata-heton ena. De mete ma Lamatualain nae ta'o bee, na, tungga 'a!”

17-18 Basa naa ma, Yakob mbed'a'-nggao sud'i 'a saa na ra, de nafufua' sao-ana na ra reu banda onta ata. Ana o mboo nendi basa banda na ra, ma nendi sud'i 'a saa na ra fo ana hambu mia Padan Aram, fo bali' Kana'an reu.

19 Lele' naa, Lab'an neu nggute bib'i lombo ra fulu na ra. De Rahel namana'o nendi aman paton sosonggo na. 20 Basa ma, Yakob se lao nee-nee' a, nda rafad'e ama arin sa. 21 Ana ha'i nendi basa hata-heto na ra, ma lao haelalai tungga loe Efrat, mbali lete Gilead reu.

22 Seli fai telu ma, Lab'an hambu hara' 'oi, Yakob se rela ena. 23 Ana na'ab'ue atahori na ra, de reu 'oi tungga ana mone feu na. Ara 'oi tungga se basa fai hitu, dei de hambu se mia lete-lete' mana sia Gilead.

24 Tetemba' naa, Lamatualain natud'u aon neu Lab'an mia meit rala. Ana nae, “Lab'an! Mete ma 'ola' moo Yakob, na, munea mulolole bafa ma.”

25 Tetemba' naa, Yakob naririi lalaat sia lete Gilead. Ma Lab'an se o raririi sira lalaa na ra nda na'ad'od'oo' noo naa sa.

26 Basa ma, Lab'an nema nandaa noo Yakob. Ana 'ola' nae, “Hee! Yakob! Ta'o bee de ho mela mendi au ana feto ngga ra neu' ena ta'o ia? 'ona' a rambas mala se mia musu a. 27 Hie' o ho mela nee-nee' a, nda mutea au sa boe! 'Ona' ho mufad'e au noo malolole, na, au tao fefetas, fo roo nggi moo lii-lii' ra,^a basa fo mbo'i nggi lao. 28 Ho salam esa fai, ho nda fee au 'id'u umbu-ana ngga ra sa, dei fo mbo'i nggi sa. Tataom ia, nggoa'! 29 Au bisa tao de'ulaka neu nggo noo mud'a'! Te temba' a, Lamatualain fo amam namahere' a, 'ai au nae, mete ma au 'ola' 'oo nggo, na, musi 'unea bafa ngga malolole. 30 Mema' ho mae lao o nda saa sa boe, huu hii mae' a bali' ena. Te saa de ho fe'e mumuna'o mendi au paton sosonggo ngga ra?”

31 Yakob nataa nae, “To'o 'afi' mumunasa au! Au lao nee-nee, huu 'umutau, 'afi' losa to'o 'ai hela ana ngga ra, na, ta'o bee?” 32 Te Yakob nda nahine nae saon Rahel ha'i nendi paton naa ra sa. De ana nae, “To'o! Paton naa ra sangga neu' ena! Mete ma hambu sia see, na, hukun misa e. Lengga-ofe basa e! Mete ma to'o hambu bua pusaka laen ma ra, na, ha'i mala bali' se. Hela fo basa atahori ia ra, dad'i sakasii.”

33 Boe ma Lab'an neu lengga-ofe esa-esa' lalaa na. Na'ahulu' mia Yakob lalaa na. Basa de, mia Lea lalaa na. Dei de ate ina karua' ra lalaa na ra. Te nda nita paton naa ra sa. Dei de, ana nisi' Rahel lalaa na. 34 Te Rahel funi paton naa ra sia banda onta lalakan rae'. De ana 'endo' neu lalakat naa ata'. Lab'an lengga-ofe lutu'-lelo' sia Rahel lalaa na, te nda nita sa.

35 Ma Rahel 'ola' noo aman nae, “Papa 'afi' mumunasa. Au nda bisa 'umburii' sa, huu au hambu hed'i ina'.” Boe ma Lab'an sangga fai, te nda nita paton naa ra sa.

36 Boe ma Yakob namanasa, de bua Lab'an nae, “Au tao sala' saa 'oo to'o? De to'o nema 'oi tungga au, 'ona' au atahori de'ulaka'! 37 To'o lengga-ofe basa sud'i 'a saa ra ena. De to'o hambu saa? Tao sob'a se reu mata' ia fo basa nggita mete! Naa fo atahori ia ra ra'etu', sud'i 'a saa naa ra, seka ena na. 38 Au dad'i to'o kulin, too rua nulu ena. Au 'unea to'o banda na ra, esa nda hendir sa boe. Ma au nda 'ua esa sa boe! 39 Mete ma banda fui ra tao risa to'o bandan esa, au nda 'ufad'e to'o sa, te au nggati. Ma mete ma atahori ramana'o to'o bandan, na, to'o fee au nggati, mae au nda sala sa. 40 Rerelo', na, relo a haa au. Ma tetemba', na, au ma'arini huu ma'asufu' a. Au be'e nda bisa sunggu' sa, huu 'unea to'o banda na ra. 41 Mema' ta'o naa, losa too rua nulu (20). Au tao ues too sanahulu haa (14), de hambu to'o ana feto na ra. Basa ma, tao ues too nee fai, de hambu banda ngga ra. Tao ues doo basa naa, te to'o nggati mu'umimina' au seseb'a ngga lao sanahulu. 42 Andi' a Lamatualain, fo ba'i Abraham noo ba'i Isak ramahere' a. 'Ona' Ana nda nanea au sa, na, to'o denu 'oi hendi au ena, noo lima rou'. Te Lamatualain nda na'apopoke' matan neu au sususa ngga sa, ma Ana nita basa ue-tatao ngga ra. Naa de, temba' a, Ana nema 'ai to'o.”

43 Lab'an rena Yakob 'ola' ta'o naa ma, ana nataa nae, “Ta'o ia! Ana ina karua' naa ra, au ana ngga ra. Ara bonggi rala ana' naa ra, au umbu ngga ra. Basa banda ia ra, au ena ngga ra. Basa ho mita' ra, mema' au ena ngga. Te au 'ae tao saa? Au nda bisa 'ai se sa. 44 De malole lena', ru'a nggita pa'a hehelu-fufuli', fo musi tasod'a tungga e.”

45 Basa ma, Yakob ha'i fatu monae' esa, de naririi e neu naa, dad'i tanda. 46 Ana o denu atahori na ra, reu kumbu fatu, fo ra'atotod'o' se. Basa ma, ara 'endo' raa deka fatu naa ra. 47 Basa ma Lab'an bab'ae fatu mana ma'atotod'o' naa ra, Yegar Sahaduta. Te Yakob bab'ae naran, Galeed.^b

48 Boe ma Lab'an nae, “Fatu mana ma'atotod'o' ia ra dad'i sakasii neu ru'a nggita.” Naa de, mamana' naa, naran, Galeed. 49 Lab'an o bab'ae mamana' naa naran, Mispa ('ona' ded'ea laen esa, sosoan nae, ‘mamana nenea naru'’), huu ana 'ola' nae, “Dei fo LAMATUALAIN nanea ru'a nggita, fo mae ata esa na'ad'oo' noo esa o, ata 'afi' lilii' hehelu-fufuli' ia. 50 Mete ma ho tao de'ulaka' neu au ana ngga ia ra, do sao moo ina laen fai, na, au nda bub'ulu' sa. Te musuned'a! Lamatualain dad'i sakasii neu rua nggita. 51-52 Mete sob'a fatu mana ririi noo mana ma'atotod'o' ia ra. Musuned'a, fatu ia ra, o dad'i tatad'a'. Ho 'afi' lao seli fatu tatad'a' ia ra, fo tao de'ulaka' neu au. Ma au o 'afi' lao seli fatu ia ra, fo tao de'ulaka' neu nggo boe. 53 Ata tao hehelu-fufuli' ia, tendi' bei-ba'i ta ra Lamatualain na. Eni, ho ba'im Abraham, ma au ba'i ngga Nahor Lamatualain na. Dei fo Ana dad'i mana na'etu' hita ded'ea na.”

Yakob rena ta'o naa ma, ana so'u susumba mamates, nendi' Lamatualain naran fo aman Isak be'utee neu' a.

54 Basa naa ma, Yakob hala banda, de nendi dad'i tutunu-hohotu' fee neu Lamatualain sia lete' naa ata. Ana no'e basa atahori ra, de raa ra'ab'ue, ma be'e losa fefetu na.

55 Mbila fefetu anan ma, Lab'an neu holu ma 'id'u basa umbu-ana na ra. Ana 'ola' fee se papala-b'ab'anggi', de bali' nisi' nusa na.