2 Boe ma, Yakob bua e nae, “Ho mae au ia, Lamatualain, fo bisa fee nggo ana', do?”

3 Basa ma, Rahel 'ola' nae, “Ta'o ia! Malole lena', 'a'a ha'i mala ate ngga Bilha. Muu sunggu' moo e, fo ana bonggi fee au ana'.”

4 Boe ma, ana fee Bilha neu saon, de Yakob sunggu' noo e. 5 Bilha o nairu boe, de bonggi ana tou' esa. 6 Rahel 'ola' nae, “Lamatualain rena au hule-o'e ngga. Naa de, Ana fee au ana tou' esa. Ana na'etu' au ded'ea ngga noo ndoo-tetu'.” Boe ma Rahel bab'ae ana' naa, naran Dan (sosoan ‘ne'etu' ded'eat’).

7 Basa ma, Bilha nairu selu', de bonggi ana tou' esa fai. 8 Ma Rahel 'ola' nae, “Au 'ukusosoek 'oo 'a'a ngga ena, ma au 'usenggi' e.” Naa de, ana bab'ae ana' naa, naran Naftali (sosoan ‘nekesosoek’ do ‘esa nda nau kala noo esa sa boe’).

9 Lele' Lea du'a nae eni nda bonggi sa ena ma, ana fee Yakob sao nala aten Silpa. 10 Boe ma Silpa bonggi nala ana tou' esa. 11 Lea 'ola' nae, “Au ua-nale ngga, malole ena.” Naa de, ana bab'ae ana' naa, naran Gad (sosoan ‘ua-nale malole'’).

12 Basa ma, Silpa bonggi nala ana tou' esa fai. 13 Ma Lea 'ola' nae, “Wee! Ia naa, au fe'e 'umuho'o ena! Mete te, basa ina' ra 'ola-'ola' rae, au 'onton 'ala seli.” Naa de, ana bab'ae ana' naa, naran Aser (sosoan ‘nemeho'o’).

14 Lao esa, nandaa noo fai 'etu-'oru are ma, Ruben lao lasi rala neu, de nita hau mod'o esa bisa tao atahori hambu ana'. De ana nendi fee neu inan Lea. Rahel nita ta'o naa ma, ana no'e Lea nae, “'A'a, e! Fee au mod'o fo Ruben nendi' a mbei dei.”

15 Te Lea nataa nae, “Wae! Ho ia, manaseli'! Rambas mala au sao ngga. Ia naa, mae rambas mala mod'o naa mia ana ngga fai, do? Ho, nda moo mamaem sa!”

Te Rahel 'ola' nae, “Ta'o ia, 'a'a. Mete ma au hambu mod'o naa, na, tetemba' ia, bole sunggu' moo Yakob.” Ma Lea nau boe.

16 Bob'on ma, Yakob bali' mia osi nema. Ma Lea neu nandaa noo e, de 'ola' nae, “'A'a! Tetemba' ia, 'a'a musi sunggu' moo au fai! Huu au bae basa 'a'a 'endi' ana ngga mod'on ena.” De tetemba' naa, Yakob sunggu' noo Lea.

17 Boe ma Lamatualain rena Lea hule-o'e na. Ana nairu, de bonggi ana tou' kaliman a. 18 Boe ma Lea bab'ae ana' naa, naran Isaskar (sosoan nae, ‘bae beb'engge'’). Huu ana nae, “Lamatualain bae basa beb'engge ngga ena, huu au fee Silpa sao nala sao ngga.”

19 Basa ma Lea nairu selu' fai, de bonggi ana tou' kaneen a. 20 Ana 'ola' nae, “Lamatualain fee papala-b'ab'anggi' malole' neu au ena. De ia naa, sao ngga musi fee had'a-hormat neu au, huu au bonggi fee ne ana mone' nee ena.” Naa de, ana bab'ae ana' naa, naran Sebulon (sosoan ‘fee had'a-hormat’).

21 Basa ma Lea o bonggi ana ina' esa, de bab'ae naran Dina.

22 Basa ma, Lamatualain nasaned'a Rahel, ma rena hule-o'e na. Naa de, Ana soi mamana ana na. 23 Boe ma, Rahel nairu, de bonggi ana tou' esa. Ana nae, “Lamatualain nggari hendi au rala mamaet ngga ena.” 24 Boe ma ana bab'ae ana' naa, naran Yusuf (mbei ma sosoan nae, ‘hela fo ana fee selu'’). Huu ana nae, “Au 'o'e fo Lamatualain fee selu' au ana tou' esa fai.”

25 Lele' Rahel bonggi nala Yusuf ena ma, Yakob 'ola' noo Lab'an nae, “Papa! Mete ma bisa, na, au 'ae bali' 'isi' nusa ngga dei. 26 Hela fee au bali' 'oo sao-ana ngga ra. Papa bub'ulu' au tao ues 'ita' mamate ngga fee nggo ena, de au bae 'etu se ena. Huu naa, ia naa au hak se ena.”

27 Boe ma, ama arin nataa nae, “Ana ngga, e! Rena dei. Au sangga basa ua-nale', de bub'ulu' 'ae Lamatualain fee papala-b'ab'anggi' neu au, huu ho. 28 De ia naa, ho mae mo'e ba'u saa o, au bae! Sad'i leo sia ia, ma tao ues mukundoo fee au.”

29 Ma Yakob nataa nae, “Papa mita noo matam ena, au tao ues noo manggate'. Naa de, banda ma ra boe ramaheta. 30 Lele' au nda fe'e 'uma sa, papa su'im nda hetar 'ona' ia sa. Te 'ale' ia, papa namasu'i ena. Lamatualain pala-b'anggi fee papa ena, huu au ue-tatao ngga. Ia naa, au 'ae ue-tao fee sao-ana ngga ra.”

31 Boe ma Lab'an natane nae, “De au musi bae nggo ta'o bee?”

Yakob nataa nae, “Papa sud'i fee au saa-saa boe. Dei fo au 'u'ub'oi 'ukundoo banda ma ra, sad'i au bisa tao dala' esa. 32 Fee au isin fo fai' ia boe, 'uu sia papa banda na ra, fo pili 'ala hiek-lombo. Bee nda kokoto' sa, ma nda 'e'eta' sa, naa ra, papa ena na. Te bee kokoto', ma 'e'eta', na, au 'ena ngga ra. Ma au o ha'i 'ala basa lombo nggeo' ra. Basa naa ra, bae neu beb'engge ngga.^a 33 Sia fai ma'ab'uin, dei fo papa nahine au ia ndoos, do hoko'. Sud'i 'a fai hira', na, papa bisa nema paresa' au banda ngga ra. Mete ma hambu hiek nda kokoto' sa, do nda 'e'eta' sa, do lombo muti', na, papa nahine au 'umuna'o banda ma ra.”

34 Boe ma Lab'an nau, de nae, “Naa o malole boe!” 35 Fai' naa boe, ma Lab'an tad'a fea banda kokoto', 'e'eta', ma lombo nggeo' ra. Ana denu ana na ra reu tao mata' neu banda naa ra. 36 Ma ara rendi se risi' mamana' esa doo-d'oon lao ei' fai telu mia Yakob e. Ma Yakob fe'e na'ab'oi ama arin hiek-lombo laen na ra.

37 Basa ma, Yakob tati nala hau mata' telu dana na ra, de ana fina se dud'ui' ra. 38 Basa de, ana mbed'a' hau naa ra, sia banda ra mamana nininu na. Banda ra hii 'a rahoo sia mamana nininu' naa. 39 Lele' banda naa ra rahoo sia hau mad'ud'ui' ra matan, na, dei fo ara bonggin ana na ra fulun kokoto' ma 'e'eta'.

40 Boe ma lele' Lab'an banda na ra rae rahoo naa, Yakob fee se mbali banda kokoto' ma 'e'eta' ra. De ana na ra o kokoto' ma 'e'eta' ra boe. Noo ta'o naa, de banda na ra boe ramaheta. Basa de, ana tad'a fea se mia Lab'an banda na ra. 41 Lele' banda ma'ad'ere' ra rahoo, na, Yakob tao hau mad'ud'ui' ra neu mata na ra, sia mamana nininu na. 42 Te mete ma banda mana male' ra rahoo, na, ana nda tao hau naa ra sa. De Lab'an hambu basa banda mana male' ra. Ma Yakob hambu basa banda ma'ad'ere' ra. 43 Noo 'ona' naa, Yakob namasu'i nala seli. Hiek-lombo, banda onta, keled'ei, noo ate na ra naen seli.