Yakob losa to'o Lab'an na ume na
29
Basa ma, Yakob lao nakandoo seri' rulu neu. 2 Fai' esa, ana nita oe mata' esa deka kambo' esa. Deka-d'eka naa, hambu hiek-lombo nononggo' telu, nea-nea rae rinu sia naa. Te fatu monae' esa tatana nala oe mata' a. 3 Mia doon neu, lele' basa hiek-lombo ra ra'ab'ue ena, dei fo manatad'a ra lali dinggo' fatu a, fo hando oe fee se rinu. Ara rinu basa fo, tatana bali' oe mata' a.4 Yakob natane manatad'a ra nae, “Hei mia bee 'ima?”
Ara rataa rae, “Hai mia kambo Haran ia.”
5 Yakob natane selu' nae, “Mihine to'o Lab'an ngga, do? Eni, Nahor ana na.”
Ara rataa rae, “Hai mihine.”
6 Ma Yakob natane fai nae, “Ana malolole, do?”
Ara rataa rae, “Tou lasi' a malolole. Sob'a mete dei. Naa, eni ana feton, naran Rahel. Ana mboo nendi hiek-lombo na ra rema rinu sia ia. De muhani e.”
7 Basa ma Yakob 'ola' nae, “'Oras ia, fe'e rerelo'. Malole lena' banda bee ra'ab'ue sia ia ena, na, hei fee se rinu leo. Basa fo, mboo mendi se nembe reu, fo raa selu uru.”
8 Te ara rareresi rae, “Wee, nda bisa ta'o naa sa! Hai musi mihani manatad'a ra basa se mboo rendi banda ra ra'ab'ue sia ia dei, fo hai fe'e lali dinggo' fatu a, fo hani se.” 9 Yakob fe'e 'ola-'ola' noo atahori naa ra ma, Rahel losa noo aman hiek-lombo na ra. Eni mana biasa mboo banda naa ra.
10 Lele' Yakob nita Rahel noo hiek-lombo na ra ma, ana neu lali hendi oe mata' a tatana na. De hani to'on banda na ra. 11 Basa ma, ana neu holu ma 'id'u Rahel, de nggae. 12 Ma ana dui Rahel nae, “Od'i'! Au ia, ho amam feton Ribka ana na.” Boe ma, Rahel nela bali' neu nafad'e ama na.
13 Lele' Lab'an rena Rahel dud'uin so'al Yakob, eni feton Ribka anan ma, ana nela' neu soru e. Ara randaa ma, Lab'an holu ma 'id'u e. Basa ma, noo Yakob ume neu, de Yakob dui basa' e neu e. 14a Ma Lab'an 'ola' nae, “Mema' teb'e! Ru'a nggita bob'onggi'!”
Yakob sao nala Lea ma Rahel
14b Lele' Yakob leo noo se losa fula esa ena ma, 15 Lab'an 'ola' noo e nae, “Ta'o ia, Yakob! Au nda nau ho tao ues mud'a' fee au sa, huu ru'a nggita bob'onggi'. Ho mo'e nggad'i' ba'u saa?”
16 Lab'an ana feton rua. 'A'a ka, naran Lea, ma 'od'i ka, naran Rahel. 17 Lea, matan mana male-male',a te Rahel matan ma aon meulaun seli. 18 Yakob ralan tud'a noo Rahel, de nataa Lab'an nae, “Au tao ues fee to'o too hitu, sad'i to'o fee au sao 'ala Rahel.”
19 Ma Lab'an nataa nae, “Au nau! Malole lena' au fee Rahel sao nggo, fo au bob'onggi ngga. Naa fo, atahori fea' 'afi' sao rala e. De leo sia 'a ia, fo tao ues fee au.” 20 Boe ma Yakob tao ues too hitu, fo bisa sao Rahel. Huu ana sue nala Rahel seli, naa de, too hitu naa ra, ana med'a 'ona' fai hira' a.
21 Basa too hitu naa ra ma, Yakob fee nesenened'a' neu Lab'an nae, “To'o! Au tao ues fee to'o too hitu ena. De fee au sao 'ala Rahel leo.”
22 Boe ma, Lab'an feta lemba-d'od'e se, de narolo basa atahori mana sia naa ra. 23-27 Tetemba' naa, Lab'an nda fee Rahel sa, te ana fee Lea nisi' Yakob lalaan rala neu. De Yakob sunggu' noo e. Mbila fefetun ma, Yakob fe'e bub'ulu' nae, eni sao Lea. De ana neu natane Lab'an nae, “Saa de to'o 'e'ed'ik au? Au tao ues too hitu, fo 'ae sao Rahel! Ta'o bee de nggati noo Lea?”
Ma Lab'an nataa nae, “'Afi' mumunasa ta'o naa! Tungga hai 'ad'at ma, 'od'i' nda sao na'ahulu' 'a'a' sa. Malole lena' ta'o ia! Muhani lemba-d'od'e' ia losa fai hitu basa dei. Basa fo, ho sao Rahel, sad'i ho tao ues fee au too hitu fai.” Boe ma Lab'an fee ate inan, naran Silpa, fo dad'i Lea ate na.
28 Yakob o nau boe. Naa de, lele' fefeta fai kahitu' a basa ma, Lab'an na'asasao' Rahel noo Yakob. 29 Boe ma Lab'an fee ate inan esa fai, naran Bilha, fo dad'i Rahel ate na. 30 Basa ma, Yakob sunggu' noo Rahel. Ana sue Rahel lena' Lea, de tao ues selu' too hitu fee ama ari na.
Yakob ana na ra
31 LAMATUALAIN nahine Yakob sue Rahel lena' Lea. De Ana fee Lea bonggi, te Rahel nda bonggi sa. 32 Lea nairu, de bonggi ana tou' esa. Boe ma ana bab'ae naran, Ruben (sosoan nae, ‘mete, hambu ana’).b Huu ana nae, “LAMATUALAIN mema' nita au sususa ngga. Naa de, ia naa sao ngga nau tao mata' neu au ena.”
33 Basa ma, Lea nairu selu', de bonggi ana tou' esa fai. Boe ma ana bab'ae naran, Simeon (sosoan nae, ‘atahori rena ena’). Huu ana nae, “LAMATUALAIN rena ena 'oi, au sao ngga nda tao mata' neu au sa. Naa de, Ana fee selu' au ana' esa fai.”
34 Basa ma, Lea nairu selu', de bonggi ana tou' esa fai. Boe ma ana bab'ae naran, Lewi,c huu ana nae, “Noo ana' ia, au ded'ea ngga basa ena. Au sao ngga musi nenepa'a' noo au, huu au bonggi fee ne ana tou' telu ena.”
35 Basa ma, Lea nairu fai, de bonggi ana tou' esa. Boe ma ana bab'ae naran, Yahud'a, (mbei ma sosoan nae, ‘koa-kio’). Huu ana nae, “Oe' ia, au 'ae koa-kio LAMATUALAIN!” Basa ma, Lea nda bonggi sa ena.