Ribka 'e'ed'ik nala Isak fo fee Yakob papala-b'ab'anggi'
27
Lele' Isak namalasi ma, mata na ra rangga, de no'e ana ulun, fo ana sue naseli' a nae, “Esau, e! 'Uma ia dei!”Esau nataa nae, “Ta'o bee, papa?”
2 Isak nafad'e nae, “Ta'o ia! Au lasi' ena. Nda bub'ulu' fai hira' naa au mate sa. 3 De ha'i tee-tande ma ra, fo muu sombu banda fui esa fee au dei. 4 Bali' naa, tunu-nasu malad'a-malad'a' tungga au hihii ngga, fo mendi nema. 'Ua basa fo, au fee nggo papala-b'ab'anggi'. Basa naa, au mate o, malole.”
5 Boe ma, Esau lao neu sombu banda. Te Ribka o rena Isak 'o'olan naa boe. 6 De neu nafad'e Yakob nae, “Wee, Yakob! Rena malolole! Faa' ra au rena amam 'ola' noo Esau ta'o ia: 7 ‘Muu sombu banda fui esa, fo tunu-nasu malad'a-malad'a' fee au. Au 'ua basa, dei fo au fee nggo papala-b'ab'anggi' sia LAMATUALAIN mata na.’ 8 De rena malolole! Tungga malolole parenda ngga ia. 9 'Oras ia, muu sia hita lalaet hiek-lombon, fo pili mala hie tena mbaruna' rua. Mbau se fo ha'i mala sisin, fo mendi fee neu au. Dei fo au tunu-nasu tungga amam hihii na. 10 Au tunu-nasu 'ala, na, mendi fee neu amam fo ana naa. Basa fo, ana fee nggo papala-b'ab'anggi', dei fo ana fe'e mate ena. Noo ta'o naa, ho mana hambu papala-b'ab'anggi' naa, te nda 'a'am sa.”
11 Boe ma Yakob 'ola' noo inan nae, “Te mama, e! 'A'a Esau aon mafulu', te au ao ngga manggamomou'! 12 'Afi' losa ama' nafaroe ao ngga ma, ana nahine au 'e'ed'ik e. Boe ma ana sumba-ndoon au!”
13 Te inan nataa nae, “Yakob, e! 'Afi' du'a saa boe. Fee nema, dei fo au tao dala na! Mete ma amam sumba-ndoon nggo, dei fo au lemba-d'oi! De muu ha'i hiek leo.”
14 Basa naa de, Yakob neu humu nendi hiek ra, de ana mbau, ma nendi fee neu ina na. Boe ma Ribka tunu-nasu tungga Isak hihii na. 15 Ribka o ha'i Esau bua-b'a'u meulaun, de fee neu Yakob pake. 16 Ma ana mboti Yakob liman noo nggara-b'oten nendi' hiek ra fulu na. 17 Ma ana fee Yakob nanaa malad'a' naa ra, noo roti fo ana tao' a.
18 Boe ma Yakob nendi nanaat naa fee neu ama na. Ana 'ola' nae, “Papa, e! Au 'uma ena.”
Isak nataa nae, “Hee? Ho seka?”
19 Boe ma Yakob nataa nae, “Au ia, papa ana ulun, Esau! Au tao tungga saa fo papa denu faa' ra. Fela fo mua leo. Au tunu-nasu 'ala sisi fo sombu 'endi mia lasi a. Mua, fo basa naa fee au papala-b'ab'anggi' leo!”
20 Ma Isak 'ola' nae, “Ho seli, o! Ho hambu banda fui lai-lai neu' ena!”
Yakob nataa nae, “Au hambu lai-lai, huu LAMATUALAIN fo papa be'utee neu' a, tulu-fali au.”
21 Boe ma Isak no'e Yakob nae, “'Uma deka-d'eka, fo au ufuroe sob'a nggo! Ho ia, teb'e Esau, do?”
22 Yakob neu deka-d'eka noo papan, ma lasi' a nafaroe e. De ana 'ola' nae, “Hara' ia, 'ona' Yakob hara na! Te lima' ia, 'ona' Esau lima na.” 23 Isak nda nahine anan Yakob sa, huu liman mafulu' 'ona' a Esau. Ana nae fee papala-b'ab'anggi' neu Yakob ma, 24 natane selu' fai nae, “Ho ia, teb'e-teb'e' Esau, do?”
Yakob nataa nae, “Teb'e papa!”
25 Boe ma, Isak 'ola' nae, “Loo sisi naa nema, te au 'ae 'ua ena. Basa fo, fee nggo papala-b'ab'anggi'.” Yakob loo sisi a neu e, ma fee oe anggor fo ana ninu. 26 Aman naa basa ma, ana 'ola' nae, “Ana ngga, e! 'Uma deka-d'eka ia, fo 'id'u au dei.”
27 Yakob neu deka-d'eka de 'id'u e, ma Isak hae nala Esau bua-b'a'un foo na. Basa de, ana 'ola' fee Yakob papala-b'ab'anggi' nae,
“Ana ngga foon, 'ona' nembe uru fo LAMATUALAIN tao e mori mod'o-mod'o.
28 Hela fo Lamatualain na'onda' dinis mia lalai a nema,
fo tao osi-lutu ma ra dad'i meulau'!
Hela fo Ana fee are na ra rambule-raisi nae',
ma hau anggor na ra rab'oa ranggi-ranggi.
29 Nusa' ra dad'i ho atem,
ma leo ra, be'utee fee had'a-hormat neu nggo.
Hela fo ho parenda basa toronoo ma ra,
ma ara sende' lulu-langga na ra sia mata ma.
Seka sumba-ndoon nggo, na, ara o simbo sumba-ndoon boe.
Ma seka fee nggo papala-b'ab'anggi', na, ara o simbo papala-b'ab'anggi' boe.”
Esau bali', ma no'e papala-b'ab'anggi' mbali Isak
30 Lele' Isak fee basa papala-b'ab'anggi' ma, Yakob lao hela e. Boe ma, 'a'an Esau bali' nendi banda fo sombu nala' a. 31 Ana tunu-nasu nala, de nendi fee aman, ma 'ola' nae, “Papa, e! Fela fo mua leo. Au tunu-nasu sisi fo sombu 'ala' a. Mua leo, fo basa naa, fee au papala-b'ab'anggi'.”
32 Isak rena nala ma, ana titindindii, de natane nae, “Hee! Ho see fai?”
Esau nataa nae, “Au, Esau! Papa ana ulu ma.”
33 Boe ma Isak ngge'e-ngge'e. Natane nae, “Seka mana nendi sisi faa' ra? Au 'ua basa, de fee ne papala-b'ab'anggi' ena. Nda bisa lea bali' sa.”
34 Rena aman 'ola' ta'o naa ma, Esau ralan mera, de nggae ma nggasi nahere' nae, “Ad'oo! Papa, e! Fee au papala-b'ab'anggi' boe!”
35 Te Isak nae, “'Od'im 'e'ed'ik nala au ena, ma namana'o nendi papala-b'ab'anggim ena.”
36 Boe ma Esau 'ola' nae, “Ana 'e'ed'ik nala au lao rua ena. Dalahulun, ana 'e'ed'ik nala au, de ha'i nala hak ulu ngga. Ia naa, papala-b'ab'anggi ngga fai. Mema' naran ‘Yakob’ naa, nandaa. Ama' fe'e mu'ena papala-b'ab'anggi' laen fee au, do?” (Naran Yakob sosoan nae, ‘to'u ei tingga'’. Ma sosoan laen na, ‘mana 'e'ed'ik’.)
37 Boe ma Isak nataa nae, “Au so'u e dad'i malanggam ena. Ma 'od'i-'a'a na ra, dad'i ate na ra. Au fee ne are na ra rambule-raisi nae', ma hau anggor na ra rab'oa ranggi-ranggi. Dad'i ana ngga, e! Hela fe'e papala-b'ab'anggi' saa fai, fo fee nggo?”
38 Esau rena nala ma, ana 'aka' a suu-noki aman nakandoo 'a nae, “Papa papala-b'ab'anggim 'aka' esa' a, do? Papa fe'e bisa sangga fee au papala-b'ab'anggi laen. Mae papala-b'ab'anggi anad'iki' o, neu!” Boe ma ana mulai nggae fai.
39 Boe ma Isak nataa mbali e nae,
“Ho masod'am na'ad'oo' mia osi meulau',
te nda hambu dinis 'onda mia lalai fo na'ad'oe raem sa.
40 Ho fela-tafam mana fee nggo masod'a'.
Te mae ta'o bee o, ho dad'i 'od'im ate na.
Mete ma ho bisa lab'an e, na, ho fe'e bisa nenembo'it mia lima na.”
Ribka denu Yakob nela
41 Esau namanasa nala Yakob seli, huu 'od'in nalaka nala papala-b'ab'anggi na. Ana du'a nae, “Nda doo' sa te, ama ngga mate ena. De nehani 'a. Basa beb'e'en fo, au 'isa e!”
42-43 Ribka nahine Esau dud'u'an, ma ana no'e Yakob de nae, “Rena malolole! 'A'am na'ena dud'u'at nae balas rala mera na. Ana nae nisa nggo, de, mela lai-lai misi' to'o Lab'an ma sia Haran. 44 Muu leo doo-d'oo sia naa, losa 'a'am nda 'afi' namanasa sa ena. 45 Mete ma ana lilii' hendi saa fo ho tao neu e, dei fo au denu atahori ro'e bali' nggo. Huu au nda nau ana ngga ru'a se mopo sia fai esa rala sa.”
46 Basa ma, Ribka 'ola' noo Isak nae, “'A'a, e! Au doa' 'oo Esau sao na ra atahori Het ia ra! Mete ma Yakob o sao ana feto Het boe, malole lena' au mate' a.”