Isak 'e'ed'ik mane Abimelek
26
Lao esa, hambu ndoe-la'as manaseli' sia nusa' naa, 'ona' ndoe-la'as lele' Abraham fe'e masod'a na. Dad'i Isak neu no'e isin sia Abimelek, atahori Filistin ra manen, fo eni bisa leo sia Gerar. 2 Ana tao ta'o naa, huu LAMATUALAIN natud'u aon neu e nae, “'Afi' muu sia Masir. Dei fo Au 'utud'u nggo mamana laen. 3-4 Mete ma ho leo mu'utataa' sia mamana' naa, na, Au 'oo nggo, ma fee nggo papala-b'ab'anggi' mata'-mata'. Dei fo Au tao tititi-nonosi ma ra ramahefu, 'ona' nduu' sia lalai a. Au fee nggo moo tititi-nonosi ma ra mamana' ia noo basa nusa na ra. Mia tititi-nonosim, dei fo basa atahori raefafo' a hambu papala-b'ab'anggi'. Noo naa, Au tao 'utetu hehelu-fufuli ngga 'oo amam Abraham.a 5 Au tao basa ia ra, huu amam tungga hihii ngga, parenda ngga, ma dala ngga.” 6 De Isak leo na'atataa' sia Gerar.7 Ribka, meulaun seli. De atahori sia naa ra rita e ma, ara ratatane so'al e. Te Isak nataa nae, “Ribka ia, au 'od'i ngga.” Ana namatau mete ma eni nataa nae saon, ne'o atahori ra tao risa e fo ha'i rala Ribka. 8 Isak leo doo-d'oo sia naa ena ma, lao esa mane' a mete tungga jendela, ma nita Isak noo Ribka raholu ma ra'id'u. 9 Boe ma ana denu atahori ro'e Isak, de natane e nae, “Isak! Au 'uhine ina' naa, ho sao ma! Saa de mae, ho 'od'im?”
Boe ma Isak nae, “Ta'o ia, ama'! Au 'umutau mete ma 'ae eni, au sao ngga, 'afi' losa atahori ra tao risa au.”
10 Ma mane' a nae, “Mete ma atahori sia ia sunggu' roo saom, na, ho fee sala' neu hai! Saa de ho tao ta'o naa neu hai?”
11 Basa ma, Abimelek fee nesenened'a' neu rauinggu na ra nae, “Misined'a malolole! Hei see mimbirani bod'e atahori ia, do saon, na, au hukun 'isa e.”
Ara rareresi 'aka' a oe mata'
12 Lele' naa, Isak sela-nggari sia nusa' naa. Ana hambu bali' buna-b'oan lao natun esa, huu LAMATUALAIN fee ne papala-b'ab'anggi'. 13 Ana bau namasu'i, losa namasu'i raranggi. 14 Sapi, bib'i, ma hiek na ra, boe ramahefu. Ana mana tao ues na ra o, hetar boe. De atahori Filistin ra rala na ra mera mbali e.
15 Ma'ahulun, Isak aman Abraham se 'ali oe mata' hetar. Te ia naa, atahori Filistin ra mbori ra'ateme oe mata' ra rendi' rae.
16 Boe ma mane Abimelek 'ola' noo Isak nae, “Isak! Malole lena', ho lao hela nusa' ia leo. Te koasam lena' hai ena.”
17 Basa de, Isak lao hela naa, de neu leo bali' sia lololo' Gerar. 18 Ana 'ali bali' oe mata', fo ara tatana' ra. Ana bab'ae oe mata' ra, tungga nara-nara' fo aman bab'ae nala' ra.
19 Isak ate na ra 'ali oe mata' sia lololo' Gerar ma, ara 'ali dai oe a matan, de nasapupura' dea neu. 20 Te Gerar manatad'a na ra rareresi roo Isak manatad'a na ra, huu oe mata' naa. Ara rae, “Ia hai oe ma!” Naa de, Isak bab'ae oe mata' naa Esek, sosoan ‘rareresi’.
21 Basa ma, Isak atahori na ra 'ali selu' oe mata' esa fai. Te ara rareresi fai huu oe mata' naa. Naa de, Isak bab'ae oe mata' naa, Sitna, sosoan ‘balab'an’.
22 Basa naa ma, ana lao hela mamana' naa, de 'ali selu' oe mata' laen fai. Ia ma, ara nda rareresi sa. Naa de Isak bab'ae oe mata' naa, Rehobot, sosoan ‘mamana loa'’. Ana 'ola' nae, “Ia naa, Lamatualain fee nggita leo sia mamana loa' ena. Sia ia dei de, ata fe'e bisa tamahefu ena.”
23 Mia naa, Isak se lao fo reu leo sia Beer Syeba. 24 Tetemba' naa, LAMATUALAIN natud'u aon neu e, ma 'ola' nae, “Isak! Au ia, ho amam Abraham Lamatualain na. 'Afi' mumutau, te Au 'unea nggo. Dei fo Au fee nggo papala-b'ab'anggi'. Ma tititi-nonosi ma ra boe ramahefu. Au tao ta'o ia, huu hehelu-fufuli ngga neu ama ma.”
25 Basa ma Isak lutu mbatu mei tunu-hotu' sia naa, de no'e makasi neu LAMATUALAIN. Ana leo sia naa, ma atahori na ra 'ali selu' oe fai.
Mane Abimelek noo Isak bad'ame'
26 Lele' naa, mane Abimelek nema mia Gerar. Ana nema noo nonoon Ahusat, ma malangga netatin, Fikol, fo randaa roo Isak. 27 Isak natane nae, “Ama mane'! Fe'esa'an, hei 'oi hendi hai ena. De ia naa, ama 'ima mae tao saa fai?”
28 Ara rataa rae, “Ta'o ia! Ia naa hai bub'ulu' mae, Lamatualain nanea nggo. Huu naa, hai du'a-d'u'a, malole' lena' ru'a nggita tao hehelu-fufuli' ta'o ia: Ho sumba mae, 29 hei nda tao de'ulaka' mbali hai sa, 'ona' hai o nda tao de'ulaka' mbali nggi sa boe. Mema' hai rala ma ra malole' moo nggi. Naa de, fai mana neu' naa ra, hei lao hela hai mbuku-kambom noo mole-d'ame. Hai mihine teb'e-teb'e', LAMATUALAIN mana fee papala-b'ab'anggi' neu nggi.”
30 Basa ma, Isak tao fefetas, de raa-rinu ra'ab'ue reu esa. 31 Mbila fefetun ma, ara tao susumba'. Dei de Isak fee se bali' noo mole-d'ame.
32 Fai' naa, Isak atahori mana tao ues na ra rema rafad'e rae oe mata' fo sira 'ali' a, hambu oe' ena. 33 Boe ma Isak bab'ae oe mata' naa, Syeba, sosoan ‘susumba'’. De ara bab'ae kambo' naa Beer Syeba, losa fai' ia.b
Esau sao ina' rua mia leo fea'