Abraham sao selu' fai
25
Abraham sao selu' ina' esa, naran Ketura. 2 Ketura bonggi fee ne: Simran, Yoksan, Medan, Midian, Isbak, ma Sua. 3 Yoksan ana na ra, Seba noo Dedan. Dedan tititi-nonosi na ra, naeni atahori Asyur, atahori Letus, ma atahori Leum ra. 4 Midian ana na ra, Efa, Efer, Henok, Abida ma Elda. Basa naa ra, Ketura tititi-nonosi na.5-6 Lele' Abraham fe'e masod'a', ana banggi fee Hagar noo Ketura ana na ra, esa-esa' noo su'in. Basa ma ana denu se reu leo sia Kana'an seri' rulu, fo ra'ad'od'oo' roo anan Isak. Te ana fee basa hata-heton neu Isak.
Abraham mate
7-8 Abraham too natun esa hitu nulu lima (175), ma ana mate. 9-10 Ana na ra Isak noo Ismael ra'oi e sia lua Makpela, deka noo Mamre. Abraham hasa 'etu osi naa mia atahori Het esa, naran Efron, fo Sohar ana na. Ma'ahulun, ana na'oi Sara sia luat naa boe. 11 Abraham mate ma, Lamatualain fee papala-b'ab'anggi' neu Isak, de ana nasod'a noo mole-d'ame. Lele' naa, ana leo deka oe mata', naran Beer Lahai Roi.
Ismael tititi-nonosi na ra
12 Ismael dud'uin, ta'o ia. Eni, Abraham noo sao tias na Hagar ana na. Ma Hagar ia, Sara aten mia Masir. 13-16 Ismael ana na ra tou' sanahulu rua. Nara na ra batutungga' mia ulu' a losa 'od'i muri' a: Nebayot, Kedar, Adbeel, Mibsam, Misma, Duma, Masa, Hadad, Tema, Yetur, Nafis, ma Kedma. Ana' naa ra, dad'i bei-ba'i' mia leo sanahulu rua, esa-esa' noo nusa na. Ara bab'ae nusa' naa ra, esa-esa' tungga bei-ba'i na ra, nara na ra.
17 Ismael too natun esa telu nulu hitu (137), ma ana mate. 18 Te tititi-nonosi na ra, esa musu esa. Basa se leo saranggaa mia Hawila losa Syur, fo natoo noo nusa Masir, nakandoo losa Asyur.a
Esau noo Yakob
19 Abraham anan Isak dud'uin, ta'o ia. 20 Isak too haa nulu ma, ana sao Ribka. Ribka ia, aman, Betuel. Ma naan, Lab'an. Sira, atahori Aram, mia Padan Aram.b
21 Huu Ribka nda hambu ana' sa, de Isak hule-o'e neu LAMATUALAIN no'e soi Ribka mamana ana na. Boe ma LAMATUALAIN rena hule-o'en, de Ribka nairu. 22 Ana nairu ana dua'. Anak ara ratimba-rasamba rakandoo 'a sia inan tein rala. De Ribka natatane sia ralan nae, “Ta'o bee de ru'a se, ta'o ia, e?” De natane LAMATUALAIN.
23 Boe ma LAMATUALAIN nafad'e nae,
“Sia teim rala, hambu nusa' rua. Dei fo ara ramusu' rakandoo 'a.
Mete te, muri ka ma'ad'ere' lena' ulu ka.
Ma 'a'a ka tao ues fee 'od'i ka.”
24 Fain losa ma, Ribka bonggi ana dua' tou' rua. 25 'A'a ka aon mbilas, ma mafulu'. Naa de, ara bab'ae naran, Esau (liin 'ona' ded'ea laen esa, sosoan nae, ‘mafulu'’).
26 Basa de, 'od'in fe'e dea nema. Te ana to'u 'a'an ei tingga na. Naa de, ara bab'ae naran, Yakob (liin nae 'a 'ona' ded'ea laen esa, sosoan nae, ‘ei tingga'’). Lele' Ribka bonggi ru'a se, te Isak too nee nulu ena.
Yakob nalaka nala Esau hak ulu na
27 Ana karua' ra ra'amoko ma, Esau dad'i mana sombu banda fui masi'et. Ana hii 'a leo sia lasi. Te Yakob, mana nee-nee' ma hii leo sia 'a ume. 28 Isak hii naa sisi banda fui. Naa de, ana sue Esau nalena'. Te Ribka sue Yakob nalena'.
29 Lao esa, lele' Yakob tao kua fufue ma, Esau fe'e sombu bali' ena. Ana bengge ma ndoe nala seli. 30 Ana nafad'e Yakob nae, “Od'i', e! Au ndoe 'ae mate ena. De fee au kua mbilas ma mana sia hura' naa mbei dei. Au 'ae 'ua.” (Naa de, ara ro'e e rae, Edom. Liin, nae 'a 'ona' ded'eat esa, fo sosoan nae, ‘mbilas’.)
31 Boe ma Yakob nataa nae, “Malole, 'a'a. Te fee au hak ulum dei!”c
32 Esau nataa nae, “Parsetan noo hak ulu' naa! Soa e leo! Au ndoe 'ae mate ena! Sod'e mendi kua naa leo, te au 'ae 'ua.”
33 Te Yakob 'ola' fai nae, “'A'a helafi' dei! 'A'a sumba dei mae, 'a'a fee au hak naa.” Boe ma Esau sumba. 34 Basa de, Yakob sod'e fee ne kua fufue naa noo roti. Esau naa-ninu basa ma, ana fela lao.
Noo ta'o naa, Esau fee hie' hendi hak ulu na.