Sangga ina' fee Isak
24
Abraham ua-nalen naru' losa namalasi nala seli. LAMATUALAIN nanea e malolole, ma fee ne nasod'a noo mole-d'ame. 2-3 Abraham ate nemeheren esa, tao mata' neu hata-heto na ra. Lao esa, Abraham no'e e nae, “Rena malolole! Au 'o'e nggo sumba matea mendi' LAMATUALAIN nara na. Naeni Lamatualain mana na'ad'ad'ad'i' lalai noo raefafo' ia. Mae, ho 'afi' ha'i ina' mia atahori Kana'an ra, fo mu'usasao' noo ana ngga Isak. 4 Musi muu sia au nusa ngga, sia au bob'onggi ngga ra. Sangga ana feto' esa sia naa, fo ta'asasao' noo ana ngga.”5 Basa de ate naa natane Abraham nae, “Malole, Ama'! Te mete ma ana feto' a nda nau nema sa, naa ta'o bee? Au musi 'oo ama' anan fo sao sia naa, do ta'o bee?”
6 Abraham nataa nae, “Musuned'a malolole! Mae ta'o bee o, 'afi' moo ana ngga naa neu! 7 Musuned'a te LAMATUALAIN mana to'u koasa sia lalai, noo au lao hela nusa ngga, de nendi au losa rae ia ena. Ana o pa'a hehelu-fufuli' noo au nae, ‘Dei fo Au fee basa rae ia neu tititi-nonosi ma.’ Dad'i 'afi' hia-b'ii! Muu neu' ena. Dei fo Lamatualain denu aten mia sorga nema soi dala' fee nggo, fo mundaa moo ana feto' mana nae dad'i ana ngga sao na. 8 Te mete ma ana feto' naa nda nau tungga nema sa, naa susumba' ia nda dai nggo sa. Mae ta'o bee o, 'afi' moo ana ngga naa neu.”
9 Boe ma, ate a sumba noo Abraham nae, dei fo eni tao tungga basa Abraham hihii-nanau na.
10 Basa naa ma, ana here nala onta sanahulu, de noo atahori na ra fua sud'i 'a saa meulau' ra reu banda onta ra ata. De lao risi' Nahor kotan sia Mesopotamia.b
11 Neu mate'en, ate a losa kambo' naa. Ana fee banda onta ra hahae deka oe mata' esa, sia kambo' a suu na. Lele' naa bob'o' ena, de ana feto' ra reu hando oe sia oe mata' a. 12 Boe ma ate a hule-o'e nae, “LAMATUALAIN, malangga ngga Abraham Lamatua na. Tulun soi dala', fo leleo-lalao ngga ia, hambu malole'. Mutud'u rala malole Ma neu malangga ngga, ma musuned'a hehelu-fufulin neu au. Naa fo, 'undaa 'oo ana feto' fo mana nae dad'i Isak sao na. 13 Lamatualain, au 'umburii' sia oe mata' suun ia. Ana feto' mia kota ia ra rema hando oe sia ia. 14 Dad'i au 'o'e ta'o ia: Mete ma au 'ola' 'oo ana feto' esa 'ae, ‘Ana feto', e! Mu'onda' hura oem fo au 'inu 'ala mbei dei.’ Mete ma nataa nae, ‘Ama' minu leo! Ma au o fee banda onta ma ra rinu boe.’ Na, naa dad'i bukti ana feto' naa Lamatualain dud'u basa dad'i Isak sao na! Noo ta'o naa, au 'uhine, Lamatualain mutud'u malole ma neu malangga ngga Abraham ena.”
Abraham aten nandaa noo Ribka
15-16 Ana nda fe'e hule-o'e basa sa te, ana feto' esa naran, Ribka, nema. Eni, Abraham 'od'in Nahor noo saon Milka umbu na. Ribka aman, naran Betuel. Ribka, meulaun seli, ma fe'e noo ao-teme. Ana 'onda oe mata' neu, nad'ai hura oen, de hene bali'.
17 Lele' Ribka losa ata ma, Abraham aten nela' neu. Ana no'e nae, “Ana feto'. Fee au 'inu 'ala mbei dei.”
18 Ana feto' a nataa nae, “Minu leo, to'o!” Ana na'onda' hura oen lai-lai, de fee ate a ninu. 19 Ana ninu basa ma, ana feto' a nae, “Hela fo au hando oe fee to'o banda onta na ra, fo rinu ra'ab'eta boe.” 20 Ana 'oni oe sisa' neu banda onta ra mamana nininu na ra, ma nela' neu hando selu' oe sia oe mata' fo hani banda onta naa ra, losa ra'ab'eta. 21 Abraham aten nambarii' hie-hie, mete namemeu ana feto' a tatao na. Ana dud'u'a nae, “Ana feto' ia, Lamatualain hii nala' a, do?”
22 Basa banda onta naa ra rinu losa ra'ab'eta. Boe ma ate a ha'i nala ndeli lilo' de nato neu ana feto' a mbanan, ma kale lilo' pasan esa, de 'olu neu liman ru'a se.c 23 Basa ma, ate a natane nae, “Ana feto', e! Amam, naran see? Mete ma nau, na, au sunggu' sia amam ume na.”
24 Boe ma ana feto' a nataa nae, “Ama ngga, naran Betuel. Ba'i ngga, naran Nahor ma nene ngga, Milka. 25 Sia hai umem hambu mamana susunggu' dai to'o se. Uru o nae' fee neu to'o se banda na ra boe.”
26 Basa ma, ate a be'utee neu LAMATUALAIN, 27 de 'ola' nae, “Koa-kio Lamatualain! Lamatua' soi dala' fee au ena, de 'undaa 'oo malangga ngga Abraham bob'onggi na ra sia ia. Noo ta'o naa, Lamatualain mutud'u rala malolem neu malangga ngga Abraham, ma tao mutetu hehelu-fufulin neu au ena.”
28 Basa ma, ana feto' a nela bali' lai-lai, de dui ume isi na ra, basa saa fo mana dad'i' a. 29-30 Ribka naan, naran Lab'an. Lele' Lab'an nita bua mbilas ra ma rena Ribka dud'uin ma, ana nela' lai-lai, neu nandaa noo ate mana rii-rii noo banda onta na ra deka oe mata' a. 31 Boe ma Lab'an 'ola' noo e nae, “To'o! Lamatualain noo to'o losa ia noo masod'a' ena. Dad'i 'afi' mumburi' sia 'a dea'! 'Uma tisi' hai ume ma. Hai sad'ia kama ena, ma nanaat fee to'o se banda onta na ra o, nae' boe.”
Abraham aten natane Ribka
32 Basa ma, Abraham aten tungga Lab'an, de risi' Betuel ume na. Lab'an se tulun ra'onda' sud'i 'a saa ra mia banda onta na ra. Boe ma ara fee banda onta ra raa uru, ma rendi oe fee ate a noo atahori na ra safe ei na ra. 33 Lele' ara tao nanaat neu mei ma, ate a nae, “Hita tae taa, te au 'ae 'ufad'e dud'u'at esa dei.”
Boe ma Lab'an nae, “'Ola' leo, to'o.”
34 Basa ma ate a nae, “Au ia, hei ba'im Abraham ate na. 35 LAMATUALAIN fee papala-b'ab'anggi' nae' neu malangga ngga, de namasu'i nala seli. Lamatualain fee ne lilo mbilas, lilo fula', ate tou'-ina', ma banda hetar. Naeni: sapi, onta, keled'ei, ma hiek-lombo. 36 Au malangga ngga tou'-ina' ramalasi, dei de mama Sara bonggi fee malangga ngga ana tou' esa. Dei fo, ana mana hambu basa Abraham hata-heto na ra. 37 Lao esa, malangga ngga denu au sumba 'oi, ‘Ho 'afi' ha'i ana feto Kana'an, fo mu'usasao' noo ana mone ngga Isak. 38 Te ho musi ha'i ana feto' mia bob'onggi ngga ra, dad'i eni sao na.’
39 Boe ma 'utane malangga ngga 'ae, ‘Te mete ma ana feto' a nda nau tungga au sa naa, ta'o bee?’
40 Ma ana nataa nae, ‘LAMATUALAIN fo au tungga hihiin 'ukundoo 'a, dei fo denu aten mia sorga nema soi dala' fee nggo, fo hambu ana feto' mia au bob'onggi ngga ra, fo dad'i ana ngga sao na. 41 Te mete ma bob'onggi ngga ra nda simbo sa, ma nda nau mbo'i ana feto' a nema sia ia sa, na, susumba' naa nda dai nggo sa.’
42 Dad'i losa oe mata' a ma, au hule-o'e sia rala ngga 'ae, ‘LAMATUALAIN, malangga ngga Abraham Lamatua na. Tulun soi dala', fo leleo-lalao ngga ia hambu malole'. Naa fo, au 'undaa 'oo ana feto' fo mana nae dad'i Isak sao na. 43 Lamatualain, au 'umburii' sia oe mata' ia suu na. Ana feto' mia kota ia ra rema hando oe sia ia. Dad'i au 'o'e ta'o ia: Mete ma au 'ola' 'oo ana feto' esa 'ae, “Ana feto', e! Mu'onda' hura oem fo au 'inu 'ala mbei dei.” 44 Mete ma ana nataa nae, “Ama' minu leo! Ma au o fee banda ma ra rinu boe.” Naa dad'i bukti, ana feto' naa Lamatualain dud'u basa dad'i Isak sao na!’
45 Au nda fe'e hule-o'e basa sa, te Ribka nema nendi hura oen, de hando oe sia oe mata' a. Ana hene ata neu ma, au 'o'e 'ae, ‘Ana feto' e. Fee au 'inu 'ala mbei dei.’ 46 Boe ma ana na'onda' hura oen, de nae, ‘To'o minu leo! Au o hani to'o banda na ra boe.’ De au 'inu ma banda onta ra o rinu boe.
47 Basa ma, 'utane e 'ae, ‘Amam, naran see?’
Nataa nae, ‘Ama ngga, naran Betuel. Ba'i ngga, Nahor, ma nene ngga, Milka.’ Boe ma au nato ndeli neu mbanan ma 'olu kale neu lima na.
48 Boe ma, au be'utee neu Lamatualain 'ae, ‘Koa-kio Lamatualain! Lamatualain soi dala' fee au ena, de 'undaa 'oo malangga Abraham bob'onggi na ra sia ia ena. Ma au o 'undaa 'oo mana nae dad'i malangga soru' Isak saon boe.’ 49 De ia naa, mete ma ama' se mae mitud'u susue' neu malangga ngga Abraham, na, mifad'e au relo-relo. Mete ma hoko' o, mifad'e relo-relo boe. Naa fo au bub'ulu' musi tao saa.”
Ribka bob'onggi na ra simbo nduna'
50 Ate a 'ola' basa ma, Lab'an noo Betuel rataa rae, “Mete ma LAMATUALAIN tao nala ta'o naa, na, hai mae saa fai. 51 Ribka sia ia, de moo e naa neu leo fo dad'i ba'i Abraham ana feto feun, tungga saa fo LAMATUALAIN ator nala ena.”
52 Ate a rena nala ma, ana be'utee losa rae, fo no'e makasi neu LAMATUALAIN. 53 Basa ma, ana ha'i lilo mbilas ma lilo fula', ma bua-b'a'u meulau' de fee neu Ribka. Ana o fee sud'i 'a saa mafelit neu Ribka naan noo inan boe. 54 Boe ma Abraham aten noo atahori na ra, 'endo' raa fefetas. Basa de, ara sunggu' sia naa. Mbila fefetun, ara fela ma, ate a nafad'e tenu ume' a nae, “Au 'o'e fo, nau naa, hai mae bali' leo misi' malangga ngga.”
55 Te Ribka naan noo inan rae, “Hei halai bali' tao saa? Hela Ribka nahani noo hai fai sanahulu dei ma. Basa' fo, moo e neu.”
56 Te ate a nataa nae, “Ad'uu! 'Afi' 'ai au! LAMATUALAIN tulun au ena, de 'undaa 'oo mana nae dad'i malangga soru ngga sao na. De ina' se mbo'i hai, fo bali' mii mifad'e malangga dei.”
57 Boe ma ara rae, “Ta'o ia! 'Ima fo tatane' a Ribka, eni hihiin, ta'o bee?”
58 Boe ma ara ro'e Ribka, de ratane rae, “Ribka! Ia sia 'a nggo. Mae tungga mema' moo atahori ia ra leo, do ta'o bee?”
Ana nataa nae, “Au nau.”
Lemba-d'od'e Isak noo Ribka
59-60 Boe ma, ara mbo'i Ribka, noo ate inan mana mete-se'u e eni' a 'a'anan, fo reu roo Abraham ate na ra. Ara 'ola' fee Ribka papala-b'ab'anggi' rae, “Ribka! Hai hule-hule' fo Lamatualain fee nggo bonggi mumuhefu, fo tititi-nonosi ma ra dad'i rifo-rata'. Ma hai o hule-hule' fo tititi-nonosi ma ra rasenggi' musu na ra!”
61 Basa naa ma, Ribka noo ate ina na ra ra'alilinu' sud'i 'a saa na ra, de sae banda onta, fo lao roo Abraham ate na ra.
62 Lele naa, Isak leo sia rae Negeb. Ana fe'e bali' mia oe mata' sia Beer Lahai Roi. 63 Bob'ob'o' esa, ma ana dea neu lao-lao' hai' anin. Ana boti' matan ma, nita banda onta ra rema.
64 Ribka nita Isak ma, ana 'onda lai-lai mia banda onta na. 65 Ana natane Abraham aten nae, “To'o! Tou' mana lao' nema naa, seka?”
Ate a nataa nae, “Naeni au malangga soru ngga.” Boe ma Ribka ha'i nala salendan na, de bab'ata mata na.