Abraham 'e'ed'ik nala mane Abimelek
20
Basa naa ma, Abraham lali mia Mamre, nisi' rae Negeb seri' 'ona, de leo sia kambo Kades noo Sur talad'a na. Te nda doo' sa ma, ana lali nisi' kambo Gerar fai. 2 Ma nafad'e atahori mana sia naa ra nae, Sara naa, eni 'od'i na. Naa de, Abimelek, mane Gerar a, denu atahori na ra reu ro'e Sara, fo roo e nisi' ume panggat na. 3 Tetemba' esa ma, Lamatualain natud'u aon neu mane' a sia meit. Ana 'ola' nae, “Ho mae mate ia ena! Huu ha'i mala atahori sao na.”4-5 Te Abimelek naselu nae, “Lamatualain! Au nda fe'e kois ina' naa sa. Ma au nda sala sa. Abraham mana 'oi, ina' naa eni 'od'i na. Ma ina' naa o nataa ta'o naa boe. Naa de, au denu reu ha'i e noo rala meu'. Dad'i Lamatualain 'afi' fee sala' neu au!”
6 Boe ma Lamatualain nataa nae, “Mema' Au bub'ulu' ralam ndoos. Ma Au mana tao fo ho 'afi' kois ina' naa. Naa fo, ho nda tao sala' neu Au sa boe. 7 Ia naa, haitua bali' ina' naa neu sao na. Eni, Au mana 'ola-'ola ngga. De mo'e fo ana hule-o'e fee nggo fo 'afi' mate. Te mete ma ho nda fee bali' ina' naa sa, na, musuned'a malolole! Te ho moo basa atahori ma ra, mae mate ia ena.”
8 Mbila fefetu anan ma, mane' a no'e basa pagau na ra, de dui meit na. Boe ma basa se ramatau. 9 Basa ma mane' a no'e Abraham, de natane nae, “Au tao sala' saa neu nggo, losa mu'usususa' au o manggarau ngga ra ta'o ia? Ho 'afi' tao dala de'ulaka' 'ona' ia. 10 Ho du'a saa, losa ho tao ta'o ia?”
11 Boe ma Abraham nataa nae, “Ama mane'! Au du'a basa nggi nda mihine Lamatualain sa. De ne'o ruma rae tao risa au, fo ha'i rala sao ngga. 12 Mema' au 'ola' teb'e, 'ae eni, au 'od'i ngga. Hai ru'a nggi ama' esa, te esa' ina na. Naa de, hai esa sao esa. 13 Dad'i lele' Lamatualain denu hai misi' mamana doo-d'oo', au 'ufad'e sao ngga 'ae, ‘Mete ma hita teu sia bee-b'ee, fo atahori ratane ru'a nggita ne'eb'uen, na, mete ma ho sue au, na, mutaa mae hita 'od'i-'a'a.’”
14-16 Basa ma, mane Abimelek fee bali' Sara. Ana 'ola' noo e nae, “Ia naa, au bae 'a'am doi fula' rifon esa, fo dad'i bukti 'oi, au nda tao sala' saa-saa 'oo nggo sa boe. Naa fo, basa atahori rahine boe!”
Mane' a o 'ola' noo Abraham nae, “Abraham! Au nusa ngga ia, nenesoi' soa neu nggo. Mae muu leo sia bee o, neu.” Ana fee Abraham sapi ma hiek-lombo. Ana o fee ate tou' ma ate ina' boe.
17-18 Ma'ahulun, LAMATUALAIN 'ena mamana ana' mia basa ina' mana sia Abimelek nusan, huu ana rambas nala Abraham sao na. Ana fee bali' Sara nisi' saon ma, Abraham hule-o'e, de Lamatualain soi bali' ina' ra mamana ana na ra. De ara bisa bonggi selu' fai.