Atahori Sod'om ra de'ulaka na ra
19
Lele' Lamatualain fe'e 'ola' noo Abraham, ma Lamatualain aten rua reu risi' kota Sod'om. Ara losa naa te, relo a nae mopo ena. Lele' naa, Lot fe'e 'endo' sia kota a lelesu ine na.a Ana nita atahori karua' ra ma, ana neu soru se. De ana sende' lulu-langgan ma be'utee sia mata na ra. 2 Ma ana 'ola' nae, “Ama ngga ra, e! 'Ima tuli ume ngga dei, fo safe ei ma ra, ma sunggu'. Mbila fefetun fo, ama' se fe'e lao ena.”Te rataa rae, “Makasi. 'Afi' tao ia-naa! Hai sunggu' mii' a lenu loa' ia.”
3 Te Lot kokoe nakandoo 'a losa ara nau. Boe ma Lot se tunu roti, ma sad'ia mei, de raa ra'ab'ue. 4 Fui' ra nda fe'e sunggu' sa, te tou Sod'om ra moko-anak, rema heo rala Lot ume na. 5 Ara nggasi rahere' rae, “Hee, Lot! Tou karua' faa' ra, sia bee? Fee se dea rema, te hai mae sae se!”
6 Boe ma Lot dea neu, ma ena lelesu a. 7 Ana 'ola' nae, “Toronoo ngga ra, e! 'Afi' tao de'ulaka' neu fui' ngga ra. 8 Ama rena, e! Ana feto ngga ra rua, fe'e ao teme' re. Ona bee naa, au fee se reu nggi. Ama mae tao se ta'o bee o, naa sia 'a hei e. Sad'i 'afi' tao saa-saa neu fui' ngga ra boe. Huu tungga hita had'at na, au musi 'unea se malolole.”
9 Te atahori Sod'om ra nggasi rae, “Ho 'afi' sambor! Ho atahori manatain! Ho atahori dea', de nda mu'ena hak muuli hai sa. Dinggo' naa! Hoko', na, hai tao nggo lena' atahori karua' naa ra!” Boe ma ara timba hendi Lot, de reu ta ra lelesu a, fo rae ralutu e.
10 Te atahori fui' karua' ra soi lelesu ma loo lima na ra dea reu, de lea Lot ume rala neu, ma ara nggoe lelesu a. 11 Boe ma ara tao rapoke' atahori Sod'om naa ra mata na ra, losa ara rafa ngganggao lelesu a, te nda hambu sa.
Lamatualain nore hendi Lot se mia Sod'om
12-13 Basa ma, fui' karua' naa ra 'ola' roo Lot rae, “Lot! LAMATUALAIN nahine kota ia de'ulakan ena. De Ana fee hai 'ima fo tao milutu kota ia. Dad'i fe'e mu'ena 'od'i-'a'a, ana tou', do ina', do ana mone feus, do sud'i 'a see sia kota ia, do hoko'? Mete ma, sia, na, muu mala se fo lao hela ia leo!”
14 De Lot neu nandaa noo tou' rua mana rae dad'i ana mone feu na ra. Ana nafad'e se nae, “Rena malolole! Ama lao hela kota ia lai-lai leo, te LAMATUALAIN nae tao nalutu e!” Te ara rae ne'o Lot 'ola' andiao' a.
15 Mbila fefetu anan ma, Lamatualain ate karua na ra, ra'asusuu' Lot se lao hela Sod'om lai-lai leo. Ara rae, “Lot! Fela leo! Nore mendi saom, ma ana feto ma ra ru'a se, fo mela hela kota ia leo. 'Afi' losa ama mate hie' a, ma mimbilutu moo kota ia.”
16 Te Lot fe'e pale-pale. Tao-tao te LAMATUALAIN nae fee ne nasod'a. Naa de, fui' karua' ra to'u lima na ra de nore Lot, ma saon, ma ana feto na ra ru'a se, de roo se lao hela kota naa. 17 Boe ma fui' esa parenda se nae, “Mela' lai-lai, fo sangga masod'a' leo! 'Afi' mete dea'! 'Afi' hahae sia lololo'! Mela mikindoo misi' lete' naa, fo ama 'afi' mate!”
18 Te Lot nataa nae, “Ad'uu, ama'! 'Afi' ta'o naa! 19 Mema' ama' tulu-fali fee masod'a neu hai. Te lete' naa, doon seli! Se'u te hai nda fe'e losa naa sa te, de'ulaka' 'oi hambu hai sia 'a dala' talad'an ena. 20 Ama' mete dei. Hambu kambo ana' esa nda na'ad'oo' noo ia sa. Kambo' naa nda nandandaa sa. De mete ma ama' nau, naa hai mii sangga masod'a' sia 'a naa.”
21 Boe ma ana nataa nae, “Neu! Mii leo! Au nda tao 'ulutu kambo' naa sa. 22 De mela lai-lai mii leo! Te mete ma hei nda fe'e losa naa sa, na, au nda bisa tao saa-saa sa boe.” Eni' a lele' naa, atahori bab'ae kambo' naa naran Soar, sosoan ‘anak’.
Sod'om noo Gomora nenehotu' losa lutu-'eto'
23 Lele' relo a sangga tod'a ma, Lot se losa Soar boe. 24 'Aib'oi' ma, LAMATUALAIN mbori ai noo baleran manahotu' mia lalai a nisi' kota Sod'om noo kota Gomora. 25 LAMATUALAIN tao nalutu basa kota noo kambo' ra ma basa mana masod'a' sia mamana' naa, naeni: atahori, banda, ma huu-huu' ra.
26 Lele' Lot se rela ma, saon mete dea'. 'Aib'oi' ma, ana dad'i rii masi'.
27 Mbila fefetu anan ma, Abraham neu selu' sia mamana' fo afis sa ana nambarii' kokoe LAMATUALAIN. 28 Ana mete rae' neu nisi' Sod'om noo Gomora ma ndule basa lololo' ra. Sia bee-b'ee masu bub'ue-b'ub'ue' hene lalai neu. Ma ai a naa hendi basa' e.
29 Dad'i lele' Lamatualain tao nalutu mamana' naa, Ana nasaned'a hehelun neu Abraham. Naa de, Ana nore hendi Lot mia mamana nenehuku-d'oki' naa.
Lot noo ana feto na ra
30 Lele' naa, Lot namatau leo nakandoo sia kambo' Soar. Naa de, noo ana feto na ra ru'a se lali risi' lete' reu, de ara leo sia luat esa rala.
31 Lao esa, ana feto 'a'a ka 'ola' noo 'od'in nae, “Sia ia, nda hambu tou' esa sa boe, fo nema sao nggita sa. Nda doo' sa te, ama' boe namalasi fo nda bisa hambu ana' sa ena. 32 De malole lena', ata fee ne ninu mafu, fo sunggu' too e. Naa fo, ata tute tititi-nonosi na ra.”
33 Tetemba' naa boe, ara fee aman ninu anggor de mafu. Boe ma ana 'a'a ka neu sunggu' noo e. Te tou lasi' a mafu nala seli, de nda nita' nae eni tao sa noo ana feton sa boe.
34 Mbila' neu ma, 'a'a ka nafad'e 'od'in nae, “Od'i'! Temba' a au sunggu' 'oo hita aman ena. Tetemba' ia, ho hahambu ma. Dei fo tamafu' e fai, fo muu sunggu' moo e. Naa fo, ru'a nggita hambu ana', fo tute tititi-nonosi na ra.”
35 Tetemban neu boe, ara tao ramafu' aman fai. De ana feto muri ka neu sunggu' noo e. Te tou lasi' a mafu nala seli, de nda nita' nae eni tao sa noo ana feton sa boe.
36 Noo ta'o naa, ru'a se rairu mia ama bonggi na. 37 Boe ma 'a'a ka bonggi ana tou' esa. Ana bab'ae naran Moab (liin 'ona' ded'ea laen esa, sosoan nae ‘nema mia ama'’). Ana mana dad'i atahori Moab ra bei-ba'i na ra losa fai' ia. 38 Ma 'od'i ka o bonggi ana tou' esa boe. Ana bab'ae naran Ben Ami (sosoan ‘mia au atahori ngga’). Ana mana dad'i atahori Amon ra bei-ba'i na ra losa fai' ia.b