Atahori telu rema randaa roo Abraham
18
Lao esa, Abraham leo deka noo hau ine' ra sia Mamre. LAMATUALAIN nema natud'u aon neu e sia naa. Dud'uin ta'o ia: fai' naa, mafeo' seli, de Abraham 'endo' ha'i anin mia lalaat mata'. 2 Lele' ana boti' matan ma, nita atahori telu rambarii' sia naa. Boe ma, ana nela' neu soru se, de sende' lulu-langgan, 3 ma nae, “Ama ngga ra, e! Mete ma bisa, na, ama' se tuli au lalaat ngga dei. 'Ona' mae minu 'aka' a oe hie' o, malole. 4 Ama' se hahae sia hau mafo' ia, dei fo au denu anak ara ha'i oe fo safe ei ma ra. 5 Dei fo au 'uu sad'ia nanaat fee ama' se, fo ma'ad'ere bali', fo fe'e lao mikindoo na. Au 'umuho'o bisa mete-se'u ama' se.”Boe ma ara rataa rae, “Neu. Makasi nae-nae. Hai tuli.”
6 De Abraham nela' nisi' lalaat, neu nafad'e Sara nae, “Lai-lai! Ha'i mala tarigu malole' saku esa, fo tao roti.”a
7 Basa ma nela' nisi' sapi na ra, de pili nala sapi ana mbaruna' esa, ma denu aten tati, de tunu-nasu sisi na. 8 Boe ma ana neu ha'i susu, keju, ma sisi naa, de nendi fee fui' ra. Lele' ara raa ma, ana nambarii' sia hau huun, de mete-se'u se.
9 Boe ma ara ratane rae, “Abraham! Saom Sara, sia bee?”
Ma ana nataa nae, “Sia lalaat rala.”
10 Boe ma esa mia telu' se 'ola' nae, “Too mana nema' ia, Au bali' 'uma. Lele' naa, saom Sara bonggi ana tou' esa ena.”
Lele' ara 'ola' ta'o naa ma, Sara rena mia lelesu a dea'. 11 Lele' naa, Abraham noo Sara lasi' seli ena, ma Sara o nda 'afi' hambu fulan sa ena. 12 Ana rena ara 'ola' ta'o naa ma, ana mali sia ralan, ma du'a nae, “Awe! Umulasi hela' a rui ngga 'ona' ia, ma sao ngga o mana masaloe' ena. Naa ta'o bee hai fe'e hii dad'i masao feu', fo sangga ana' fai?”
13 Basa de LAMATUALAIN natane Abraham nae, “Saa de Sara mali? Ana du'a nae saa fo Au 'ola' ia, nda dad'i sa, huu eni lasi' ena, do? 14 Au ia, LAMATUALAIN! Nda hambu saa fo Au nda tao 'ala sa! Misined'a malolole, e! Mete ma Au bali' 'uma too mana nema' ia, na, Sara bonggi nala ana tou' esa ena.”
15 Sara rena ta'o naa ma, namatau. De ana nafanii nae, “Au nda mali sa ma!”
Te Lamatualain nataa nae, “Ho mali teb'e ma!”
Abraham kokoe Lamatualain fo 'afi' huku-d'oki atahori Sod'om ra
16 Basa ma, fui' katelu' ra rae risi' kota Sod'om, de Abraham noo se losa dala' talad'a na. Mia naa, ara bisa rita Sod'om. 17 Basa ma LAMATUALAIN du'a sia ralan nae, “Malole lena', Au dui Abraham 'ae, Au 'ae tao 'ulutu kota Sod'om. 18 Huu tititi-nonosi na ra dei fo boe ramaheta, ma dad'i leo manaseli'. Ma ana o dad'i papala-b'ab'anggi' soa' neu basa leo sia raefafo' ia. 19 Au pili 'ala e fo nanori ana na ra roo atahori laen ra, fo tungga rakandoo LAMATUALAIN dalan fo rasod'a noo ndoo-tetu'. Mete ma ara tao ta'o naa, Au tao 'utetu hehelu-fufuli ngga 'oo Abraham.”
20 Boe ma LAMATUALAIN nafad'e Abraham nae, “Ta'o ia! Au rena atahori ra ramue so'al atahori mana sia kota Sod'om noo kota Gomora. Huu de'ulaka na ra, seli teb'e ena. 21 Naa de, Au 'onda fo 'ita noo mata ngga, basa saa fo Au rena' a, teb'e, do hoko'. Mete ma hoko', na, Au musi bub'ulu'.”
22 Lele' LAMATUALAIN fe'e 'ola' noo Abraham ma, fui' karua' ra lao rakandoo risi' kota Sod'om. 23 Abraham neu deka-d'eka noo Lamatualain, de kokoe nae, “Ta'o bee? Ama' mae tao mulutu atahori malole roo atahori de'ulaka' ra lao esa', do? 24 Mete ma hambu atahori malole' lima nulu sia kota naa, na, Ama' fe'e mae tao mulutu basa atahori ra, do? Do, Ama' nda tao mulutu kota naa sa, huu sira? 25 Ama' 'afi' tao mulutu se 'ona' naa! 'Afi' losa atahori malole' ra o mate boe, huu Ama' mae mulutu atahori de'ulaka' ra. Ama' dad'i Mana Na'etu' Ded'eat sia lalai noo raefafo' ia. Ama' o bub'ulu' naa nda matetu' sa.”
26 LAMATUALAIN nataa nae, “Mete ma Au hambu atahori malole' lima nulu sia Sod'om, na, Au nda hukun kambo' naa sa, huu sira.”
27 Boe ma Abraham 'ola' fai nae, “Ama', 'o'e ambon, au 'ae 'ola' mbei fai. Au ia, atahori nggoa', nda 'uhine saa-saa sa boe. 28 'Ona' nda hambu atahori malole' losa lima nulu sa, te 'aka' a haa nulu lima' a, na, ta'o bee? Mete ma kuran atahori lima, na, Ama' fe'e mae tao mulutu kota naa, do?”
Lamatualain nataa nae, “Mete ma Au hambu atahori malole' haa nulu lima sia naa, na, Au nda tao 'ulutu kota naa sa.”
29 Basa ma Abraham fe'e kokoe selu' fai nae, “Mete ma hambu 'aka' a atahori haa nulu, na, ta'o bee, Ama'?”
Boe ma nataa nae, “Mete ma Au hambu atahori haa nulu, na, Au nda hukun se sa.”
30 Abraham kokoe nakandoo 'a nae, “Ama' 'afi' mumunasa, te mete ma 'aka' a atahori malole' telu nulu' a, na, ta'o bee?”
Ana nataa nae, “Mete ma hambu atahori telu nulu, na, Au nda hukun se sa.”
31 Basa ma Abraham naloe selu' fai nae, “Ama' 'afi' mumunasa, te au 'utane selu' mbei fai. Mete ma 'aka' a atahori rua nulu, na, ta'o bee?”
Ma nataa nae, “Mete ma hambu atahori rua nulu, na, Au nda tao 'ulutu kota naa sa.”
32 Boe ma Abraham nate'e 'o'olan nae, “Ama'! Au 'ola' lao esa fai, te 'afi' mumunasa au, o! Mete ma 'aka' a atahori malole' sanahulu' a, na, ta'o bee?”
Boe ma Ana nataa nae, “Mete ma hambu atahori malole' sanahulu sia naa, na, Au nda tao 'ulutu kota naa sa.”
33 'Ola' basa ta'o naa ma, LAMATUALAIN lao nakandoo, ma Abraham bali'.