Lamatualain pa'a hehelu-fufuli' noo Abram nendi' bukti sunat
17
Lele' Abram too sio nulu sio (99), ma LAMATUALAIN natud'u aon neu e nae, “Au ia, Lamatualain fo Mana Koasa Manaseli'. Ho musi tungga mukundoo Au hihii ngga, ma musod'a noo ndoo-tetu'. 2 Au 'ae pa'a hehelu-fufuli ngga, ma tao tititi-nonosi ma ra ramaheta.”3 Abram rena nala ma, ana sende' lulu-langgan ma naloe langgan losa rae a. Lamatualain o 'ola' nakandoo nae, 4-5 “Au helu-fuli 'oo nggo ta'o ia: Dei fo ho dad'i leo hetar bei-ba'i na ra. Naa de, naram nda 'afi' Abram sa ena (sosoan ‘ama' nenenehine'’), te naram dad'i Abraham (sosoan ‘leo hetar bei-ba'i na ra’). 6 Dei fo Au tao tititi-nonosi' ma ra ramahefu-ramab'ela. Au 'ufefela leo hetar mia se, ma so'u mane' hetar mia tititi-nonosi naa ra.
7 Au to'u 'uhere' hehelu ngga 'oo nggo ma tititi-nonosi ma ra. Hehelu-fufuli' ia nda 'etu sa, huu Au ia, ho moo tititi-nonosi ma ra Lamatualain ma. 8 Basa rae Kana'an ia, Au fee neu nggo moo tititi-nonosi ma ra. 'Oras ia, ho numban a sia ia. Te dei fo tititi-nonosi ma ra soa rae Kana'an ia losa doon neu. Ma Au o dad'i sira Lamatualain na boe. 9-10 Te ho moo tititi-nonosi ma ra musi to'u mihere' hehelu-fufuli' ia losa bab'asa na. Basa tou' ra musi sunat. 11-13 Mulai lele' ia, basa tou' mia fai be'e falu' ra, musi sunat. Ho bob'onggi ma ra, atahori mana tao ues ma ra, ma ate ma ra fo hasa mia nusa' laen ra, basa se musi sunat. Sunat ia, dad'i ru'a nggita bukti hehelu-fufulin sia hei ao ma ra. 14 Tou' bee nda sunat sa, na, ana nda hambu bab'anggi' sia hehelu-fufuli ngga rala sa, ma nda dad'i Au atahori ngga sa.”
15 Basa de, Lamatualain 'ola' nakandoo nae, “Mia fai' ia, ho 'afi' mo'e saom mae Sarai fai, te mae' a Sara. 16 Dei fo Au fee papala-b'ab'anggi' nae' neu Sara, fo ana bonggi fee nggo ana tou' esa. Teb'e! Dei fo Sara dad'i leo hetar bei-ba'i na ra. Au o so'u mane' hetar mia tititi-nonosi na ra.”
17 Boe ma Abraham sende' lulu-langgan, ma be'utee losa rae a. Te ana mali sia ralan, ma du'a nae, “Tou lasi nae' too natun esa (100) 'ona' au ia, fe'e hambu ana'? Ma Sara o lasi nae' too sio nulu (90) ena, na, fe'e bisa bonggi fai?” 18 De ana nafad'e Lamatualain nae, “Lamatualain. Hela fo Ismael hambu au hata-heto ngga o, nda saa sa boe.”
19 Te Lamatualain nataa nae, “Hoko'! Mete te saom Sara bonggi ana tou' esa. Ho musi bab'ae naran, Isak. Au hehelu-fufuli ngga tud'a neu e, noo tititi-nonosi na ra, losa doon neu. 20 Te Au o rena saa fo mo'e fee Ismael boe. Naa de, Au o fee papala-b'ab'anggi' neu e, ma tao 'umuhefu-'umub'ela tititi-nonosi na ra boe. Dei fo hambu maneleo sanahulu rua mia tititi-nonosi na ra. Ma tititi-nonosi na ra dad'i leo esa manaseli'. 21 'Ona' mae ta'o naa o, Au hehelu-fufuli ngga ia nenepa'a' noo anam Isak. Too mana nema' ia, nandaa noo 'ona' fai' ia, Sara bonggi e.” 22 'Ola' basa ta'o naa ma, Lamatualain lao.
23-27 Fai' naa boe, Abraham tungga Lamatualain parendan, de ana sunat. Ana o sunat Ismael noo basa tou' mana sia umen, ma basa ate tou' ra boe. Lele' naa, Abraham too sio nulu sio (99), ma Ismael too sanahulu telu (13).