Hagar noo anan Ismael
16
1-3 Lele' naa, Abram bali' mia Masir, de leo sia Kana'an too sanahulu ena. Saon Sarai, nda fe'e maana' sa. Te Sarai maate ina' mia Masir, naran Hagar.Lao esa ma, Sarai 'ola' noo Abram nae, “'A'a! LAMATUALAIN bab'ata mamana ana ngga ena. De malole lena', muu sunggu' moo ate ngga Hagar, fo ana bonggi fee au.”
Boe ma Abram tungga saon 'o'olan boe. De Sarai fee Hagar dad'i neu Abram sao muri na. 4 Boe ma Abram neu sunggu' noo Hagar, de nairu. Hagar bub'ulu' eni mairu' ma, ana koao, de naloe-nad'ae Sarai.
5 Basa ma Sarai 'ola' noo Abram nae, “Au mana fee ate naa fo dad'i sao muri ma. Te ana bub'ulu' eni mairu', ma naloe-nad'ae au. Ia, ho sala ma! Hela fo LAMATUALAIN na'etu' hita ru'a nggita ded'ea na. Dei fo ho bub'ulu'!”
6 Boe ma Abram nataa nae, “Ta'o ia! Ho ia, sao ulu ngga. Eni, sao muri' a. Dad'i mu'ena koasa neu e. Mae tao saa mbali e, na, sia 'a nggo!” Boe ma Sarai tao suka-rangga' e, losa ana nela.
7 Hagar nela losa nembe sara'ae ma, LAMATUALAIN aten esa mia sorga, hambu e deka noo oe mata' sia dala' mana nisi' Sur. 8 De Ana nae, “Wee! Hagar, Sarai ate na! Ta'o bee de ho sia ia? Mia bee 'uma, ma mae bee muu?”
Hagar nataa nae, “Au lao hela nyora ngga.”
9 Boe ma LAMATUALAIN aten kokoe e nae, “Ta'o ia! Malole lena' bali' misi' nyora ma. Ana tao nggo ta'o bee o, simbo' a. 10 'Afi' mumutau. Dei fo au tao tititi-nonosi ma ra ramaheta, losa atahori nda reken rala se sa. 11 Lele' ia ho mairu' ena, de nda doo' sa te, bonggi ana tou' esa. Musi bab'ae e Ismael (liin nae 'a 'ona' ded'ea laen esa sosoan ‘Lamatua' rena’), huu LAMATUALAIN rena hara ngganggae ma. 12 Te ana' naa na'amoko nema, ma nasod'a na'ad'ood'oo' noo bob'onggi na ra. Huu ana 'ona' ndara fui e, nda mana rena parenda' sa. Ana lab'an sud'i 'a see. Ma basa atahori lab'an bali' e.”
13 Hagar rena nala ma, ana 'ola' sia ralan nae, “Au 'ita LAMATUALAIN ena, mana nanea ma tao mata' neu au.” De ana mulai no'e Lamatualain, noo nara' “Lamatualain mana fad'uli au.” 14 Naa de, atahori bab'ae oe mata' naa, naran, Beer Lahai Roi. Sosoan 'oi, “Oe mata' mia mana masod'a', ma mana fad'uli au.” Oe mata' naa, sia kambo Kades noo kambo Beret talad'a na. Oe mata' naa fe'e sia, losa fai' ia.