Lamatualain pa'a hehelu-fufuli' noo Abram
15
Basa naa ma, Lamatualain natud'u aon neu Abram nae, “Abram! 'Afi' mumutau. Au 'usula'e nggo mia musu ma. Ma Au fee nggo hahambu' nae'.”2-3 Te Abram nae, “Eee, Lamatualain, e. 'Ona' mae Lamatualain nae fee au nae' o, nda ngguna saa sa boe. Huu au nda maana' fo fee au tititi-nonosi' sa. Dad'i hambu hata-heto' nae-nae tao neu saa? Ne'o 'aka' au ate ngga, Eliasar mia Damsik, hambu basa se.”
4 Te LAMATUALAIN nataa nae, “Nda ta'o naa sa! Te ho anam mana hambu hata-hetom, nda ate a sa.”
5 Boe ma Ana noo Abram dea neu, de nafad'e nae, “Mete lalai a dei. Mete sob'a nduu' ra. Ho reken mala se, do? Tititi-nonosi ma ra dei fo hetar 'ona' nduu' ra boe!”
6 Abram rena nala ma, ana simbo LAMATUALAIN 'o'ola na. De LAMATUALAIN nile nae, Abram rala ndoos, huu namahere Eni.
7 Ma LAMATUALAIN 'ola' tute fai nae, “Au ia, Lamatualain. Au mana 'oo nggo lao hela kambo Ur sia atahori Kasdim rae na. Au mana fee rae ia dad'i hata-heto ma.”
8 Te Abram natane nae, “Dad'i ta'o bee LAMATUALAIN? Ta'o bee fo 'uhine 'ae rae ia dad'i au hata-heto ngga?”
9 Boe ma Ana nataa nae, “Ta'o ia! 'Uma fo ata tao dala' esa dad'i hehelu-fufuli' neu 'o'ola ngga faa' ra. De muu ha'i mendi banda fee Au. Naeni, sapi ine esa, hiek ine esa, ma bib'i lombo mone esa. Basa se musi too be'e telu'. Boe ma mendi mbui teu esa, noo mbui lunda esa boe.”
10 Boe ma Abram neu ha'i nendi basa banda naa ra. De ana sefa se reu be'e rua'. Ana mbed'a' sisi naa ra banggi rua neu rae, esa mbali esa, dad'i dala' rua. Te ana nda sefa mbui' ra sa. 11 Dei de mbui' mana naa sisi mburu' ra rema rae raa sisi naa ra. Te Abram 'oi hendi se.
12 Lele' relo a mopo ma, Abram sunggu' nasambeta ma nalamein nae, ma'ahatu' a tatana nala e, losa namatau nala seli.
13-15 Ma Lamatualain nafad'e neu e nae,
“Abram! Dei fo musod'a losa mumulasi mala seli, ma mate moo nemeho'ot, fo ra'oi nggo noo malolole.
Te dei fo tititi-nonosi ma ra dad'i atahori manatain sia atahori laen nusa na.
Dei fo atahori sia nusa' naa tao se dad'i ate, ma tuni-ndeni se losa too natun haa.
Te dei fo Au huku-d'oki nusa' naa atahori na ra.
Basa fo Au 'oo tititi-nonosi ma ra lao hela naa, ma rendi basa hata-heto na ra.a
16 Dei fo Au ator fo tititi-nonosi kalima ma ra bali' ia rema.
'Ale'ia, atahori Amori ra leo sia rae ia. Atahori ia ra de'ulaka', te nda fe'e raseli' sa.
Mete ma umbu-ana ma ra bali' ia rema, na, Au 'ae pake se fo hukun atahori Amori ra. Te lele' naa, de'ulaka na ra raseli' ena.”
17 Tetemban neu, 'aib'oi' ma, hura rae esa namasu, ma mbele esa mbila, ra'aunda' tungga sisi dala karua' ra talad'a na. 18 Lele' naa, LAMATUALAIN pa'a hehelu-fufuli' noo Abram nae, “Au helu dei fo fee nusa' ia neu tititi-nonosi ma ra, mulai mia loe Masir,b losa loe Efrat, 19 ma atahori Keni, Kenas, Kadmon, 20 Het, Feris, Refaim, 21 Amori, Kana'an, Girgasi, ma Yebus rae na ra.”