Abram neu nala bali' Lot mia netatis
14
Lele' naa, hambu mane' haa ra'ab'ue. Naeni: Amrafel, mane nusa Sinear. Ariok, mane nusa Elasar. Kedarlaomer, mane nusa Elam. Ma Tideal, mane nusa Goyim. 2 Lele' naa o mane' laen lima ra'ab'ue boe. Naeni: Bera, mane kota Sod'om. Birsa, mane kota Gomora. Sinab, mane nusa Adema. Semeber, mane nusa Seboim. Ma mane nusa Bela (naeni nusa Soar). De mane kahaa' naa ra ratati lab'an mane kalima' ra. 3 Mane kalima' naa ra ra'ab'ue roo sold'ad'u na ra sia bab'afa' esa naran Sidim (fo 'ale' ia ara rae Tasi Mates).4 Netati' naa, huun ta'o ia: Ma'ahulun, mane kalima' ra ta'alok neu mane Kedarlaomer losa too sanahulu rua. Te too kasanahulu telun ma, ara lab'an e.
5 Lele' maso' too kasanahulu haan, ma mane Kedarlaomer noo nonoon mane katelu' ra rema roo sold'ad'u na ra. Ara ratati rasenggi' nusa' hira. Naeni: atahori Refaim sia nusa Asterot-Karnaim, atahori Susim sia nusa Ham, atahori Emim sia nusa Sawe-Kiryataim, 6 ma atahori Hori mana leo sia lete Seir losa mamana rou', naran El Paran suu na. 7 Basa ma, ara bali' risi' En Mispat (fo 'ale' ia, naran Kades). De ara tao ralutu atahori Amalek nusan, roo atahori Amori mana leo sia nusa Haseson-Tamar.
8-9 Basa ma, mane kalima' ra ator sold'ad'u na ra sia bab'afa' Sidim, de ratati lab'an mane kahaa' ra. 10 Sia bab'afa' naa, hambu lifu ter hetar. Lele' ara ratati ma, mane Sod'om noo mane Gomora ma sold'ad'u na ra rela. Ruma tud'a risi' lifu ter rala, ma ruma rela risi' lete'. 11 De mane kahaa' mana rasenggi' mane kalima' ra, reu rambas rala basa sud'i 'a saa na ra ma nanaat mia Sod'om noo Gomora. Basa de, ara bali'.
12 Lele' naa, Abram anan Lot leo sia Sod'om. De mane kahaa' ra o to'u rendi Lot se, ma rambas rendi basa sud'i 'a saa na ra.
13 Te hambu atahori esa nela, de neu nafad'e Abram, atahori Ibrani a. Lele' naa, hambu atahori Amori esa, naran Mamre. Abram leo deka sia Mamre hau-hau huu ine na. Mamre 'od'i na ra, Eskol noo Aner. Sira, Abram nonoo na ra. 14 Lele' Abram rena 'oi atahori to'u rendi anan ma, ana na'ab'ue nala mana tao ues na ra mana ratati rahine. Basa se atahori natun telu sanahulu falu (318). De ara reu 'oi mane kahaa' ra losa kambo Dan mana na'ad'oo' sia seri' dii.
15 Sia naa, Abram banggi atahori na ra reu bab'anggi' hira. Tetemban ma, reu sambu atahori naa ra. Hambu ruma rela, de Abram se 'oi rakandoo se, losa kambo Hoba, sia kota Damsik seri' dii. 16 Basa ma, Abram ha'i nala bali' Lot, noo atahori na ra, roo basa sud'i 'a saa na ra, ma atahori laen ra boe.
Melkisedek nandaa noo Abram. Ana dad'i mane' ma malangga agama mia Lamatualain
17 Lele' Abram bali' mia nasenggi' mane kahaa' ra ma, mane Sod'om nema soru e mia bab'afa' esa naran Sawe (fo atahori rae, Bab'afa Mane'). 18 Lele' naa, mane Salem a, naran Melkisedek.a Ana o malangga agama mia Lamatualain mana sia Ata' a. Ana nendi fee Abram, roti noo oe anggor. 19-20 Boe ma ana 'ola' fee Abram papala-b'ab'anggi' nae, “Hela fo Lamatualain mana sia Ata' a, ma mana na'ad'ad'ad'i' lalai noo raefafo' a, fee nggo papala-b'ab'anggi'. Koa-kio Lamatualain, mana fee nggo musenggi' musu ma ra.”
Basa ma Abram banggi fee Melkisedek bab'anggi' esa mia sanahulu, mia basa saa fo ana rambas nala bali' ra.
21 Boe ma, mane Sod'om no'e mbali Abram nae, “Ama Abram. Sud'i 'a saa fo ama' rambas mia musu ngga ra, hela fo ama' hambu basa se. Te au 'o'e bali' 'aka' a atahori ngga ra.”
22 Te Abram nataa nae, “Au sumba sia Lamatualain mana sia Ata' a matan, ma mana na'ad'ad'ad'i' lalai noo raefafo' a, 23 'ae, au nda ha'i 'ala saa-saa sa boe mia ho sud'i 'a saa ma ra. Mae 'ab'as ndoo' esa o, au nda ha'i sa. Noo ta'o naa, ho nda bisa 'ola' mae, ‘Abram namasu'i, huu au.’ 24 Au nda parluu saa sa boe. 'Aka' a bee fo au atahori ngga ra pake' ra ena, naa mana basa' ena. Ma fee au nonoo katelu ngga ia ra, Aner, Eskol noo Mamre, ha'i rendi bab'anggi na ra.”