Abram noo Lot saranggaa
13
Basa ma, Abram lao hela Masir, de bali' nisi' rae Negeb. Neu noo saon, ma basa hata-heto na. 'Od'in anan Lot o tungga e boe. 2 Abram ia, mamasu'in seli. Banda ne'eb'oin, lilo mbilas ma doi fulan, naen seli.3 Mia Negeb, ana lao lali-lali' de bali' nisi' kambo Betel noo kambo Ai talad'a na. Dalahulun, ana leo mia naa. 4 Ana o lutu mbatu fatu dad'i mei tunu-hotu' boe. De be'utee neu LAMATUALAIN sia naa.
5 Lot, mana tungga noo Abram, na'ena banda ne'eb'oi' nae', ma atahori mana tao ues na o hetar boe. 6-7 Te mamana' naa nda loa', soa' neu Abram noo Lot, ma basa hata-heto na ra fo rasod'a ra'ab'ue sa. De Abram noo Lot manatad'a na ra rareresi, huu uru sia naa nda dai banda na ra raa sa. (Lele' naa, atahori Kana'an roo atahori Feris o fe'e leo sia naa boe.)
8 Boe ma Abram nafad'e anan nae, “Lot, e! Hita ia bob'onggi'. 'Afi' losa hita esa nda malole noo esa sa, huu atahori mana tao ues ta ra ratofa rakandoo 'a. 9 Dad'i malole lena' ru'a nggita saranggaa. Mamana' ia loa', de mete ma ho pili mala rae seri' dii, na, au 'isi' seri' 'ona. Mete ma pili mala seri' 'ona, naa au 'isi' seri' dii.”
10 Boe ma Lot mete rereo', de nita bab'afa' loe Yordan oen nae' losa kambo Soar. Mamana' naa raen meulau' ma ma'asufu' 'ona' LAMATUALAIN osin, ma 'ona' rae Masir. (Lele' naa, LAMATUALAIN nda fe'e tao nalutu kota Sod'om noo kota Gomora sa. De rae naa fe'e malole'.) 11 Dad'i Lot pili nala basa rae sia bab'afa' loe Yordan. Basa ma ru'a se saranggaa, ma Lot nisi' seri' rulu. 12 Te Abram leo nakandoo sia rae Kana'an. Boe ma Lot neu leo sia kambo-kambo' deka kota Sod'om sia bab'afa' Yordan. 13 Atahori Sod'om ra de'ulaka na ra seli ma nda nau rena LAMATUALAIN sa.
14 Lele' Lot noo Abram saranggaa ena, ma LAMATUALAIN 'ola' noo Abram nae, “Abram! Sob'a mete rereo' basa mamana' mia mamana' ho mumburii' sia' a. Mete malolole dea'-mata' ma dii-'ona. 15 Basa rae fo mita' naa, dei fo Au fee neu nggo moo tititi-nonosi ma ra, fo dad'i hata-hetom losa doon neu. 16 Dei fo Au fee tititi-nonosi ma ra ramaheta 'ona' sara'ae' sia tasi suun, losa atahori nda reken rala se sa. 17 De ia naa, muu lao rereo' rae a loa-naru na. Te dei fo Au fee basa naa ra neu nggo!”
18 Boe ma, Abram se lali reu leo bali' sia mamana' deka hau-hau huu ine' sia Mamre, deka kambo Hebron. Sia naa, ana lutu mbatu mei tunu-hotu', de be'utee neu LAMATUALAIN.