Lamatualain no'e Abram
12
Lele' naa, LAMATUALAIN 'ola' noo Abram nae, “Abram! Lao hela bob'onggi ma ra, amam umen, ma kambo ma. Misi' mamana' esa, dei fo Au 'utud'u neu nggo.2 Dei fo Au fee papala-b'ab'anggi' neu nggo.
Tititi-nonosi ma ra, boe ramaheta,
dad'i nusa manaseli' losa atahori ra rahine nara ma.
Ma dei fo ho dad'i papala-b'ab'anggi' soa' neu atahori laen.
3 Dei fo Au fee papala-b'ab'anggi' neu atahori mana fee nggo papala-b'ab'anggi'.
Te Au sumba-ndoon atahori mana sumba-ndoon nggo.
Rena malolole!
Dei fo basa leo sia raefafo' hambu papala-b'ab'anggi' lao' mia nggo boe.”
4-5 Lele' naa, Abram too hitu nulu lima (75). Ana noo saon Sarai, 'od'in anan Lot, basa hata-heton, ma basa atahori mana tao ues na ra fo ana hambu mia kota Haran. Boe ma, ara lao hela Haran, de risi' mamana' fo LAMATUALAIN nafad'e neu e ena. Ara lao' rakandoo, losa mamana' esa, naran Kana'an.
6 Losa naa ma, Abram lao ndule rae naa, losa deka noo kambo' esa, naran Sikem. De ara leo ra'atataa' deka noo hau huu ine' esa sia More. Lele' naa, atahori Kana'an ra fe'e leo sia naa. 7 Sia naa, LAMATUALAIN natud'u aon neu Abram. Ana nae, “Au fee nusa' ia neu tititi-nonosi ma ra.” Basa ma Abram lutu mbatu mei tunu-hotu' soa' neu LAMATUALAIN, mana natud'u aon neu e sia naa.
8 Basa ma, Abram se lali risi' lete' sia 'ona, de leo ra'atataa' sia kambo Betel noo kambo Ai talad'a na ra. Sia naa, ana o lutu mbatu mei tunu-hotu' esa, de be'utee neu LAMATUALAIN. 9 Basa ma, ana lali-lali' mamana', losa rae Negeb sia Kana'an seri' 'ona.
Abram nisi' nusa Masir
10 Fai' esa, hambu ndoe-la'as manaseli' sia rae Kana'an. Naa de Abram se lao rakandoo risi' seri' 'ona, losa nusa Masir. Ara leo ra'atataa' sia naa. 11 Lele' ara rae maso' nusa Masir rala reu, ma ana nafad'e saon Sarai nae, “Sarai. Ho ia, meulaum seli. 12 De mete ma atahori Masir ra rita meulaum, na, ara tao risa au, huu au ia, ho sao ma. Noo ta'o naa, ara bisa sao rala nggo. 13 De malole lena', mufad'e se mae, au ia, ho 'a'a ma. Naa fo, ara nda tao risa au sa, te ara malole roo au, huu ho.”
14 De Abram se losa Masir ma, atahori ra rita ina' a meulaun seli. 15 Lele' mane Masir pagau na ra rita e, ma ara koa ina' meulaun sia mane' a mata na. Basa ma, ara rendi e nisi' mane' a ume na. 16 De mane' a malolole noo Abram, huu Sarai. Ana fee mud'a' Abram bib'i lombo, hiek, sapi, keled'ei, noo banda onta. Ana o fee ate tou' ma ate ina' ra boe.
17 Te, huu mane' a ha'i nala atahori saon nisi' umen, naa de LAMATUALAIN huku-d'oki mata'-mata' neu e noo atahori na ra. 18 Dei de mane' a no'e nala Abram ma natane nae, “Abram! Ho tao au ta'o bee ia? Saa de nda mufad'e mae, ina' ia, saom sa!? 19 Te mae eni, ho 'od'im! Hela' a mbei, na, au sao 'ala e! Sie, saom sie! Ha'i mendi e! Dinggo' hela mata ngga!” 20 Basa ma mane' a parenda pagau na ra, fo 'oi hendi Abram noo saon, ma sud'i 'a saa na ra mia nusa' naa.