Ume monae naru' sia Bab'el
11
Lele ulu', basa atahori sia raefafo' ia 'ola' rendi 'a ded'eat esa' a. 2 Lele' ruma mia se mulai lali risi' seri' rulu, ara losa rae tetu' esa sia Sinear,a de leo sia naa. 3-4 Basa se rala hara' esa rae, “We! Toronoo' ra, e! 'Ima fo tafefela kota monae' esa. Ata musi tao fatu mbilas, fo basa naa lalangge se losa manggatee. Ma ata lutu fatu mbilas naa ra tendi' ter, fo taririi ume monae naru' esa, tonggon losa lalai a. Naa fo, ata hambu nara', ma dad'i nusa monae' esa, nda sea-saranggaa sa.”
5 Boe ma LAMATUALAIN nema mete sob'a kota naa, noo ume narun fo rafefela' a. 6 Ana 'ola' nae, “Basa atahori ia ra, nusa' esa, ma ded'eat esa. Saa fo ara tao' ia, fe'e fefeu'. Mbila-fini esa', mete ma basa se ra'ab'ue reu esa 'ona' ia, na, ara bisa tao sud'i 'a saa. 7 Malole lena' Ata 'onda fo tao se 'ola' ded'eat laen-laen, naa fo esa nda nahine esa ded'ean sa boe.”
8 Boe ma Lamatualain 'onda de tao tasib'u ded'ea na ra. Noo ta'o naa, Ana tao atahori ra sea-saranggaa risi' basa mamana' sia raefafo' ia. Ara o nda rafefela rakandoo kota naa sa ena. 9 Naa de, ara bab'ae kota naa, Bab'el, (liin nae 'a 'ona' ded'eat esa, fo sosoan ‘tab'angangaa’), huu LAMATUALAIN tao tasib'u ded'ea na ra, ma fee se sea-saranggaa sud'i 'a bee reu sia raefafo' ia.
Mia Sem losa Abram
10 Ia, Sem tititi-nonosi na ra. Lele' oe mandali monae' a naloe' too rua ena, nandaa noo Sem too natun esa (100), ma ana hambu ana tou' esa, naran Arpaksad. 11 Boe ma, Sem fe'e nasod'a too natun lima (500), de hambu selu' ana tou' ma ina' fai.
12 Arpaksad too telu nulu lima (35), ma ana hambu ana tou' esa, naran Sela. 13 Boe ma, Arpaksad fe'e nasod'a too natun haa telu (403), de hambu selu' ana tou' ma ina' fai.
14 Sela too telu nulu (30), ma ana hambu ana tou' esa, naran Eber. 15 Boe ma, Sela fe'e nasod'a too natun haa telu (403), de hambu selu' ana tou' ma ina' fai.
16 Eber too telu nulu haa (34), ma ana hambu ana tou' esa, naran Pelek. 17 Boe ma, Eber fe'e nasod'a selu' too natun haa telu nulu (430), de ana hambu selu' ana tou' ma ina' fai.
18 Pelek too telu nulu (30), ma ana hambu ana tou' esa, naran Rehu. 19 Boe ma, Pelek nasod'a selu' too natun rua sio (209), de hambu selu' ana tou' ma ina' fai.
20 Rehu too telu nulu rua (32), ma ana hambu ana tou' esa, naran Seruk. 21 Boe ma, Rehu fe'e nasod'a too natun rua hitu (207), de hambu selu' ana tou' ma ina' fai.
22 Seruk too telu nulu (30), ma ana hambu ana tou' esa, naran Nahor. 23 Boe ma, Seruk fe'e nasod'a selu' too natun rua (200), de hambu selu' ana tou' ma ina' fai.
24 Nahor too rua nulu sio (29), ma ana hambu ana tou' esa, naran Tera. 25 Boe ma, Nahor fe'e nasod'a selu' too natun esa sana hulu sio (119), de hambu selu' ana tou' ma ina' fai.
26 Tera too hitu nulu (70) lena ma, ana hambu ana tou' telu, nara na ra Abram, Nahor, ma Haran.
Tera tititi-nonosi na ra
27 Ia, Tera tititi-nonosi na ra. Tera ana na ra, Abram, Nahor, ma Haran. Haran hambu ana tou' esa, naran Lot. 28 Haran mate mia kambon, naran Ur, sia atahori Kasdim ra rae na. Lele' ana mate, te aman Tera fe'e masod'a'. 29 Abram sao nala Sarai. Nahor sao nala Haran ana feton, naran Milka. Haran o maana tou' esa, naran Yiska. 30 Te Sarai nda mana bonggi' sa.