Lamatualain pa'a hehelu-fufuli' noo Noh
9
Basa ma, Lamatualain fee papala-b'ab'anggi' neu Noh noo ana na ra. Ana 'ola' nae, “Ama bonggi mimihefu, fo misofe raefafo' a fai. 2 Dei fo basa banda fui ra, mbui' ra, ma 'u'u ra ramatau nggi. Hei musi ator se ma tao mata' neu se. 3 Hei bisa mia basa banda ra sisin, 'ona' hei mia huu-huu' ra buna-b'oa na. Au fee basa ia ra neu nggi.4 'Aka' na, hei 'afi' mia sisi fe'e maraa', huu banda hahaen sia raa na. 5-6 Au 'u'ud'ad'ad'i' atahori 'ona' mata-ao ngga boe. Huu naa, de 'afi' tao misa atahori. Mete ma hambu atahori, do banda, tao risa atahori, na, musi tao misa se boe. Hohoro-lalane' ia, mia Au nema. 7 Hei musi bonggi mimihefu, fo misofe raefafo' ia fai.”
8 Basa ma, Lamatualain tute 'o'olan nae, 9 “Ia naa, Au 'ae pa'a hehelu-fufuli' 'oo nggi, ma tititi-nonosi ma ra boe. 10 Hehelu-fufuli' ia dai neu basa masod'a' ra, mana dea rema roo nggi mia 'ofa' rala. Naeni, banda ne'eb'oi', banda fui, ma mbui' ra. 11 Au hehelu-fufuli ngga, ta'o ia: Au nda 'afi' fee oe mandali monae' sa ena, fo tao nisa basa mana masod'a' ra, ma nalutu basa raefafo' ia.
12-13 Au tao elus ngga sia lalai, fo dad'i bukti fee nesenened'a' neu hehelu-fufuli ngga nda nama'etu sa. Au helu-fuli ia neu nggi, basa mana masod'a ra, ma raefafo' ia. 14-17 Mete ma hambu lelee' sia lalai, ma elus a sou, na, ana fee nesenened'a' neu Au hehelu-fufuli ngga ia, nae: oe mandali monae' nda 'afi' nalutu basa mana masod'a' ra sa ena. Noo ta'a naa, Au hehelu-fufuli ngga ia, nda nama'etu' sa. Au helu-fuli ia neu nggi, moo basa mana masod'a' ra.”
Noh mafu
18 Noh ana na ra mana dea rema mia 'ofa' a, nara na ra Sem, Yafet, ma Ham. (Ham naa, Kana'an ama na). 19 Basa atahori sia raefafo' ia tititi-nonosi na ra lao' mia Noh ana katelu na ra naa ra.
20 Noh ia, atahori mana ue rae. Ana mana tao na'ahulu' osi anggor. 21 Lao esa, ana ninu anggor losa mafu nala seli. De 'olu hendi bua-b'a'un, ma sunggu' lengga-loli noo ma'aholan sia lalaan rala. 22 Lele' Ham nita aman ma'ahola' ma, ana nela dea neu, nafad'e 'a'an Sem noo Yafet. 23 De ru'a se ha'i rala lafe esa, ma ndae neu aru na ra. Dei de, ara lao rasad'ed'ea' lalaa' rala reu, de lu'u-mbanu rala ama na. Noo ta'o naa, ara nda rita aman ma'aholan sa. Basa de, ara bali' dea reu.
24 Lele' Noh mamafun mulai mopo ma, ana bub'ulu' ana murin tatao na. 25 Boe ma ana 'ola' nae, “He! Kana'an ama na! Au sumba-ndoon nggo! Dei fo ho dad'i ate sia 'a'a ma ra!
26 Koa-kio LAMATUALAIN! Hela fo Ana fee papala-b'ab'anggi' neu Sem!
Ma hela Kana'an, dad'i Sem ate na.
27 Hela fo Lamatualain boe tao naloa Yafet rae na;
Ma tititi-nonosi na ra rasod'a dame roo Sem tititi-nonosi na ra.
Ma hela Kana'an dad'i Yafet ate na.”