Rae a nae mad'a
8
Te Lamatualain nda lilii' Noh se roo basa banda mana sia 'ofa' rala. De Ana fee anin fuu nare'e oe mandali' a. 2 Ana o tatana basa oe mata' sia raefafo' a, ma naloe' 'ud'an mia lalai a. 3 Boe ma oe' a boe re'e. Basa fai natun esa lima nulu ma, oe' a nda naru' nae' sa ena. 4 Nandaa noo fula kahitun, fai sanahulu hitu ma, 'ofa' a hara sia lete naru' esa ata, naran Ararat. 5 Oe' a re'e nakandoo, losa fai kaesan, fula kasanahulun, boe ma mbuku-lete' ra tonggo na ra sou. 6 Seli fai haa nulu ma, Noh soi 'ofa' a jandelan esa. 7 Basa ma Ana mbo'i mbui kaa' esa. Mbui' naa natambele neu-nema losa oe mandali monae' a re'e teb'e ena. Ana nda bali' 'ofa' neu sa. 8 Boe ma, Noh mbo'i selu' mbui lunda esa, fo nae nahine oe' a re'e teb'e ena, do fe'e hoko'. 9 Te, huu oe' a fe'e tatana nala raefafo' a, de mbui' a nda hambu mamana tetee' sa. De ana bali' nisi' 'ofa' a. Noh loo liman, de simbo nala bali' mbui' a 'ofa' rala neu.
10 Noh nahati fai hitu fai, dei de ana mbo'i selu' mbui' naa. 11 Bob'on ma, mbui' a bali' selu' nisi' Noh, nendi saitun roo' esa, fo ana fe'e bito nala ena. Dei de, Noh fe'e bub'ulu' oe' a meti teb'e ena. 12 Ana nahati fai hitu fai, de mbo'i selu' mbui lunda naa. Te ia naa, mbui' a nda bali' sa.
13 Lele' Noh too natun nee esa (601), nandaa noo fai kaesan, fula kaesan ma, oe' a meti teb'e-teb'e' ena. Boe ma, Noh soi 'ofa' a jandelan, de mete rereo' ma nita rae a mad'a ena. 14 Losa fai karua nulu hitun, fula karuan, ma rae a mad'a teb'e-teb'e' ena.
15 Basa ma, Lamatualain 'ola' noo Noh nae, 16 “Noh! Basa nggi 'onda mia 'ofa' a leo. 17 Soi basa banda ra dea reu! Naeni: banda ne'eb'oi', banda fui, banda mana nod'o', noo mbui' ra. Hela fo basa se boe ramahefu, fo rasofe raefafo' ia.”
18-19 Basa ma, Noh noo saon, ana na ra, ma ana feto feu na ra, dea rema mia 'ofa' a. Basa banda naa ra o, dea rema, esa-esa' noo nonoo na.
Noh fee tutunu-hohotu' fo no'e makasi neu Lamatualain
20 Basa ma, Noh lutu mbatu tao mei tunu-hotu' fee LAMATUALAIN. Noh ha'i nala banda be'e esa', mia basa banda fo bisa tao dad'i tutunu-hohotu'. Ana mbau-hala se, ma tunu se sia mei tutunu-hohotu' a, fo no'e makasi neu LAMATUALAIN. 21 Lele' LAMATUALAIN hae nala tutunu-hohotu' a ma'afoo menin ma, ralan namaho'o. De Ana du'a nae,
“Mia fai' ia, Au nda 'afi' sumba-ndoon raefafo' a huu atahori de'ulaka na ra sa. 'Ona' mae ara du'a 'aka' a de'ulaka' mia 'a'ana na ra o, Au nda 'afi' tao 'ulutu basa masod'a' ra sa, 'ona' Au tao' a ena. 22 Lele' raefafo' a fe'e sia, na, fula-fai' ia ra basa se fe'e lao' rakandoo, tungga dala na ra. Naeni: fula-fai sela-nggari' noo fula-fai 'etu-'oru', fula-fai ma'asufu' noo fula-fai matob'i', fula-fai relo-ai noo fula-fai ud'a-oe', ma rerelo' noo tetemba', basa se lao' tungga dala na ra.”