Oe mandali monae'
7
Boe ma, LAMATUALAIN 'ola' noo Noh nae, “Au mete neu bee-b'ee, 'aka' mesa' nggo ralam ndoos. Huu naa, moo sao-ana ma ra, 'ofa' rala mii leo. 2-3 Mia basa banda fo hei bole mia' ra, ma bole mendi fee neu Au, na, mendi pasan be'e hitu' 'ofa' rala reu. Mia basa mbui' ra, mendi pasan be'e hitu' boe. Te mia banda laen ra naa, mendi pasan be'e esa' a. Noo ta'o naa, banda ma mbui' naa ra, dad'i fini, fo ara 'afi' mopo.4 Musuned'a malolole, e! Te hela' a fai hitu ena, na, Au u'onda' 'ud'an nda naloe' sa, losa rerelo' fai haa nulu ma tetemba' fai haa nulu boe. Naa fo, mate basa mana masod'a' sia mad'a' ata, fo Au 'u'ud'ad'ad'i' 'ala' ra.”
5 Boe ma, Noh tao tungga basa LAMATUALAIN parenda na ra. 6 Lele' oe mandali' a lala nema, te Noh too natun nee ena (600). 7 Basa ma, Noh noo saon, ana na ra, ma ana feto feu nara, 'ofa' rala reu, fo rasod'a mia oe mandali monae' a. 8-9 Noh o tungga LAMATUALAIN parendan, de nendi basa mbui' mata'-mata' ma banda laen ra, esa-esa' noo nonoon, mae banda fo atahori bole raa, ma banda fo atahori nda bole raa sa. 10 Basa hendi fai hitu ma, 'ud'an monae' mbo'a nema, fo nae tatana raefafo' a.
11 Lele' Noh too natun nee (600), fula rua, fai sanahulu hitu ma, oe mandali monae' a nema! Lele' naa, 'ona' lalai a lelesun nenesoi', de oe' a mbo'a rae nema. Ma basa oe mata' sia rae rala ra fanggi, de oe a nasapupura' dea nema. 12 Ud'an o nda naloe' sa hatu'-rerelon, losa fai haa nulu.
13 Te fai' naa o, Noh noo saon, ma ana na ra telu' se, naeni Sem, Yafet noo Ham, ma ana feto feu na ra, basa se 'ofa' rala reu. 14 Ara rala reu roo banda mata-mata'. Naeni: banda ne'eb'oi', banda fui, banda mana nod'o', mbui' ra ma banda malid'a' laen ra. 15-16 Noh 'ofa' rala neu noo basa masod'a' ra pasan be'e esa', tungga Lamatualain parenda na.
Lele' basa se sia 'ofa' rala ena ma, LAMATUALAIN nggoe 'ofa' a lelesu na.
17-19 Boe ma, 'ud'an monae' a nema nakandoo 'a losa fai haa nulu, de oe mandali monae' a boe hene naru' ata neu, losa 'ofa' a laa. Basa ma, oe' a hene nakandoo 'a, losa tatana nala lete naru' ra. 20 Oe' a hene nda naloe' sa, losa narun meter hitu sia lete' ra ata.