Atahori ra de'ulaka na ra
6
Lele' naa, atahori bau ramaheta. Ara rasod'a nggari-nggari sia bee-b'ee ndule raefafo' ia. Ara o bonggi ana ina' ra boe. 2 Lamatualain ana tou na raa rita atahori ra ana feto na ra 'aka' meulau' ra. De reu sao ana feto' fo sira hii' ra. 3 Boe ma LAMATUALAIN nae, “Au bengge 'oo atahori mana rasod'a tao leli' ia ra. Dula-d'ale ngga mana fee masod'a' neu se, nda nau se rasod'a rakandoo sa ena.b Ara musi mate. De mia ia nema, ara rasod'a losa 'a too natun esa rua nulu (120).”4 Lele' naa, ma fai ma'ab'ui' ra, hambu atahori sele' sia raefafo' ena.c Lamatualain ana tou na ra sao rala atahori ra ana feto na ra, de bonggi atahori manaseli', naeni malangga matati' ra, fo mana neneb'eb'engga' sia dud'ui ma'ahulu na ra.
5 Lele' naa, LAMATUALAIN nita atahori sia raefafo' de'ulakan naseli' ena. Rala na ra du'a 'aka' a de'ulaka' rakandoo 'a. 6 De LAMATUALAIN fale ralan, huu na'ad'ad'ad'i' nala se, ma fee se leo sia raefafo' ia ena. Naa, tao namera' ralan seli. 7 Naa de, Ana 'ola' nae, “Dei fo Au tao 'ulutu atahori, fo Au 'u'ud'ad'ad'i' sia raefafo' ia. Au o tao 'ulutu mbui' ra roo banda laen ra, huu Au fale rala ngga tao 'ala se ena.” 8 Te 'aka' a Noh, mana tao namaho'o LAMATUALAIN rala na.
Noh dud'ui na
9-10 Noh dud'ui na, ta'o ia: ana toun telu, nara na ra Sem, Yafet ma Ham. Noh nasod'a ndoos, nda tao de'ulaka' sa. Lele' naa, 'aka' a mesa' ne tao ndoo-tetu'. Ana nasod'a na'ab'ue noo Lamatualain.
11-12 Te Lamatualain nita nae basa atahori laen ra, de'ulaka'. Sia bee-b'ee atahori dala masod'a na ra sora-senggo rala seli ena. Lamatualain nita atahori sia raefafo', 'aka' a de'ulaka' ra. 13 Boe ma Ana nafad'e neu Noh nae, “Sia bee-b'ee, Au 'ita 'aka' a atahori de'ulaka na ra. De Au 'u'etu' 'ae tao 'ulutu raefafo' ia noo basa isi-oe na. 14 Dad'i ta'o ia, Noh! Tao mala 'ofa' esa mia hau manggatee'. Sia 'ofa' naa rala, tao kama-kama. Basa naa, dud'u 'ofa' a ma leli e mendi' ter. 15 Tao 'ofa' a nanarun, meter natun esa telu nulu telu (133). Loloan, meter rua nulu rua (22). Ma ata' neu a, meter sanahulu telu (13). 16 Tao 'ofa' a ma mbuni'. Te hela mbunin 'ona' a banggi rua meter esa mia ririndi na. Banggi 'ofa' a neu tad'a' telu ma tao lelesu esa neu bob'oa na.
17 Musuned'a malolole! Dei fo Au u'onda' oe mandali monae' fo tao nisa basa mana masod'a' sia raefafo' ia, losa nda hela saa sa boe. 18 Te Au 'ae tao hehelu-fufuli' 'oo nggo. Dei fo 'ofa' rala muu moo saom, ana ma ra, ma ana feto feu ma ra.
19-20 Ho o musi ha'i mala basa banda ra pasan be'e esa', ma mendi se 'ofa' rala reu, fo ara rasod'a roo nggo boe. 'Ona' banda ne'eb'oi' ra, mbui' ra, ma banda mana nod'o' ra, fo basa se rasod'a. 21 Ho o musi mendi nanaat mata'-mata' nisi' 'ofa' rala neu, soa' neu nggi moo banda ra.”
22 Boe ma, Noh tao tungga basa Lamatualain parenda na ra.