1-2 Lele' Lamatualain na'ad'ad'ad'i' atahori, Ana tao mata-ao na ra, 'ona' Eni mata-aon boe. Ana na'ad'ad'ad'i' se, tou' noo ina'. Ana no'e se nae, “atahori”, ma fee se papala-b'ab'anggi'.

3 Lele' Adam too natun esa telu nulu (130), ma ana hambu ana tou' esa, matan 'ona' e boe. Ana bab'ae, naran Set. 4 Basa ma, Adam fe'e nasod'a too natun falu (800), de hambu selu' ana tou' noo ina' fai. 5 Ana too natun sio telu nulu (930), ma ana mate.

6 Lele' Set too natun esa lima (150), ma ana hambu ana tou' esa, naran Enos. 7 Basa ma, Set fe'e nasod'a too natun falu hitu (807), de hambu selu' ana tou' ma ina' fai. 8 Ana too natun sio sanahulu rua (912), ma ana mate.

9 Enos too sio nulu (90), ma ana hambu ana tou' esa, naran Kenan. 10 Basa ma, Enos fe'e nasod'a losa too natun falu sanahulu lima (815), de hambu selu' ana tou' ma ina' fai. 11 Ana too natun sio lima (905), ma ana mate.

12 Kenan too hitu nulu (70), ma ana hambu ana tou' esa, naran Mahalalel. 13 Basa ma, Kenan fe'e nasod'a losa too natun falu haa nulu (840), de hambu selu' ana tou' ma ina' fai. 14 Ana too natun sio sanahulu (910), ma ana mate.

15 Mahalalel too nee nulu lima (65), m a ana hambu ana tou' esa, naran Yared. 16 Basa ma, Mahalalel fe'e nasod'a losa too natun falu telu nulu (830), de hambu selu' ana tou' ma ina' fai. 17 Ana too natun falu sio nulu lima (895), ma ana mate.

18 Yared too natun esa nee nulu rua (162), ma ana hambu ana tou' esa, naran Henok. 19 Basa ma Yared fe'e nasod'a losa too natun falu (800), de hambu selu' ana tou' ma ina' fai. 20 Ana too natun sio nee nulu rua (962), ma ana mate.

21 Henok too nee nulu lima (65), ma ana hambu ana tou' esa, naran Metusalak. 22 Henok nasod'a rala' esa noo Lamatualain losa too natun telu (300). De ana hambu selu' ana tou' ma ina' fai. 23-24 Ana nasod'a rala' esa nakandoo noo Lamatualain. Lele' ana too natun telu nee nulu lima (365), ma mopo e, huu Lamatualain so'u boti' e.

25 Lele' Metusalak too natun esa falu nulu hitu (187), ma ana hambu ana tou' esa, naran Lamek. 26 Basa ma Metusalak fe'e nasod'a losa too natun hitu falu nulu rua (782), de hambu selu' ana tou' ma ina' fai. 27 Ana too natun sio nee nulu sio (969), ma ana mate.

28 Lele' Lamek too natun esa falu nulu rua (182), ma ana hambu ana tou' esa. 29 Ana nae, “Dei fo ana' ia tao namaho'o hita rala na ra, mia ue-taos sofe' noo doid'oso' sia rae fo Lamatualain sumba-ndoo' a ena.” De ana bab'ae naran, Noh (liin nae 'a 'ona' ded'eat esa, sosoan nae, ‘tao namaho'o’). 30 Basa ma, Lamek fe'e nasod'a losa too natun lima sio nulu lima (595), de hambu selu' ana tou' ma ina' fai. 31 Ana too natun hitu, hitu nulu hitu (777), ma ana mate.