Lele' ru'a se ra'amoko ma, Habel dad'i manatad'a banda, ma Kaen mana tao osi. 3 Lao esa, Kaen nendi osin mbule-b'oan ruma fee neu LAMATUALAIN. 4 Habel o nendi bib'i lombo na ra ana ulu na ra. Ana mbau-hala se, ma nendi sisi malolen neu Lamatualain. LAMATUALAIN nita ta'o naa ma, ralan namaho'o mbali Habel noo tutunu-hohotu na. 5 Te Ana nda hii Kaen tutunu-hohotun sa. Naa de Kaen namanasa nala seli, losa matan ma'alasi.

6 Boe ma LAMATUALAIN 'ola' noo Kaen nae, “Hee, Kaen! Ta'o bee de mumunasa, losa matam ma'alasi ta'o naa? 7 Mete ma ho tao malole', na, Au simbo nggo noo malole' boe. Te besa-b'esa! Mete ma ho tao de'ulaka', dei fo de'ulaka' a naa bali' nggo, 'ona' meo 'ob'o lafo. Dad'i mete ma hii mae tao de'ulaka', malole lena' nggari hendi e leo!”

8 Lao esa, Kaen kokoe Habel nae, “Od'i'! 'Uma fo teu lao-lao' sia osi.”^a Lele' ara losa naa, 'aib'oi' ma, Kaen momoko nisa 'od'i na.

9 Basa ma LAMATUALAIN natane Kaen nae, “Hee, Kaen! 'Od'im sia bee?”

Nataa nae, “Au nda bub'ulu' sa! Mae au mana to'u ein, do?”

10 Boe ma Lamatualain 'ola' nae, “Ta'o bee de ho tao de'ulaka ta'o naa? 'Afi' mae ho bisa funi 'od'im raan sia rae a, te Au 'ita basa ena! 11 Ia naa ho hambu sumba-ndoon ena. Huu lele' misa 'od'im, rae a musi nala raa na. De ia naa, rae a nda fee masod'a' neu nggo sa ena. 12 Mete ma ho tao osi, rae a nda fee mbule-b'oa' saa-saa sa boe. Mia 'oras ia, ho koo-kale muu-uma 'ona' atahori mana to'a-taa' sangga masod'a' sia raefafo' ia.”

13 Te Kaen nasapaa mbali LAMATUALAIN nae, “Awii! Lamatualain! Ta'o bee de Lamatualain fee au hambu sumba-ndoon beran seli, losa au nda lemba be'i sa? 14 Huu Lamatualain 'oi hendi au mia mamana' ia, dei fo au 'u'ud'ood'oo' mia Lamatualain. Au koo-kale sud'i 'a bee 'uu. Ma sud'i 'a see randaa roo au, na, tantu tati risa au.”

15 Te LAMATUALAIN nataa nae, “Nda ta'o naa sa! See tati nisa nggo, na, dei fo Au huku-d'oki e beran lena' lao hitu!” Basa ma, LAMATUALAIN tao tatanda' neu Kaen, fo atahori rahine rae, nda bole tao risa e sa. 16 Basa ma, Kaen lao hela mamana' naa, fo neu na'ad'ood'oo' noo LAMATUALAIN. Ana lao losa mamana' esa sia osi Eden seri' rulu, naran Nod, sosoan nae, ‘koo-kale’. Boe ma, ana leo sia naa.

17 Basa ma, Kaen sao, de saon nairu. Ana bonggi ana tou' esa, de bab'ae e, Henok. Kaen o nafefela kambo' esa, de bab'ae kambo' a naran Henok, tungga anan nara na. 18 Henok anan, Irad. Ma Irad anan, Mehuyael. Mehuyael anan, Metusael. Ma Metusael anan, Lamek.

19 Lamek saon rua. Esa naran Ad'a, ma esa naran Sila. 20 Ad'a ana ulun, naran Yab'al. Yab'al tititi-nonosi na ra, dad'i manatad'a. Ara rasod'a lali-lali', ma leo sia lalaat. 21 Yab'al 'od'in, naran Yub'al. Yub'al tititi-nonosi na ra, mana ra'amina' lii-lii' mana pake sanar 'ona' a sasando, ma fuu 'ona' suling.

22 Ma Lamek saon Sila bonggi Tubal Kaen. Tubal Kaen tititi-nonosi na ra dad'i mana tutu besi. Ara tao sud'i 'a saa mata'-mata' mia besi ma riti. Tubal Kaen feton, naran Na'ama.

23 Lao esa, Lamek nananaru aon mia sao na ra ru'a se mata na ra nae, “Rena, e! Faa' ra monetena' esa tutu au, te au tao isa e. 24 Atahori mana tao nisa Kaen, hambu huku-d'oki' lao hitu. Te mete ma hambu mana nae nambed'a' rala' noo au, na, ana hambu huku-d'oki' lao hitu nulu hitu.”

25 Ad'am saon Hawa bonggi ana tou' esa fai. De ara bab'ae naran, Set, (sosoan 'oi, ‘loo fee’), huu Hawa nae, “Lamatualain loo fee ana' ia neu au fo nggati Habel, fo Kaen tao nisa' a.” 26 Doo-d'oo ma, Set hambu ana tou' esa, naran Enos.

Lele' naa, atahori ra fe'e mulai be'utee neu LAMATUALAIN ena.