Nai Yohanis ankiso niit neno tunan ma pah-pinan masaf fe'ug
21
Lalit au 'ail 'iit neno tunan ma pah-pinan maas fe'ug, fun neno tunan ma pah-pinan masaf amnaa' namneku nalaal je. Tasij amsa', ka mamnita' fa lee.a 2 Lalit au 'ail 'iit Uisnenog In koot knino', es le' Yerusalem Fe'ug, ansanu neem na'ko sonaf neno tunan. Koot naan naloitan nalaal je, on le' baroit bifeel le' he nnao nsenu in monel.b 3 Lalit au 'neen hanaf matani' mese', anpoi na'ko toko plenat nane mnak,“Mail milek-leko'!
Anmulai tabug iij, Uisnenog In Umel et mansian sin sonak ma sin atnaank een.
Anmulai nenog iij, Uisnenog anmoni nabgua nok Inin.
Fun In anjali sin Uisnenog.
Ma sin anjalin In anah sin.
In of nok sin piut-piut.
Ma In nabgua nok sin nabal-baal.c
4 In of annose nani sin matak nuuk een,
he sin naik ankae nme'-me'ul een antenin.
Natuin anbi balel naan, ka tiit tani fa amenat antein.
Ma nbi balel naan, ka tiit tani fa amates antein.
Ale' kanan lasi susal mane'at le' un-unu', ka tiit atteni sin fa lee.
Ale' kanan hamu'it ma mane'at un-unu', namnekun nalaal je.”d
5 Lalit In le' antuun On anbi toko plenat naan, naguab am nak, “Mail milek-leko', natuin Au ufe'ug ale' kanan saa'-saa'.” Lalit In naguab anteni noi kau mnak, “Amluul nai! Ale' kanan mansian of anpalsai Au Aguab een, natuin aguab een naan, lo namneo!”
6 Lalit In natoon anteni kau mnak,
“Ale' saa'-saa' le' Au 'paa' 'ani sin na'ko faijan unun naan, anjalin nalaal je.
Natuin Au le' iij,
Alfa antee Omega.
Ma Au le' iij,
A antee Z,
Ale' saa'-saa' na'uun ma naba'an anbin Kau,
anmulai na'ko ahunut tal antee amunit.
Ale' kanan mansian anmenon oel,
Au of a'feen sin oel ma ninun kuuk luum-luum aah,
na'ko oe mata' le' neki 'honis, maut he mansian sin anmonin namneo.e
7 Ale' kanan mansian le' nalan ma natuin Uisnenog In laal 'honis amneot ma amnonot,
sin of ansimo naan kuuk tetus-athoen sin le' ii.
Fun Au of a'jali sin Uisnenog,
ma sin anjalin Au anah sin.f
8 Mes anmu'i tuaf abjaan le' of anpolin napoitan sin,
noin tasi ai fatu-foon, le' anpiin ka nasnaas niit fa.
Nahuum on le' atoni amtaus,
tuaf le' ankoti Nai Yesus,
tuaf le' anhainiis,
tuaf le' anmakaken ma nmapaisa' nok tuaf le' ka sin monel ee fa, ai' ka sin feel ee fa,
anlolo mansian,
afuat noi nitug,
alaut,
ma aputa-kliun.
Sin aal-ala sin naan of naiti npolin sin noi tasi aij,
le' anteek nak, ‘bale maten nomol nuug.’”
Nai Yohanis nail niit koot Yerusalem masaf fe'ug
9 Lalit au 'ail 'iit tuaf es na'ko tua hitu een na'kon sonaf neno tunan le' tabug mese anna'an bokol le' matua' nok Uisnenog In to'as. In neem nateef nok kau, lalit naguab am nak, “Uum moi iij ee fe'! Natuin au he uklila' ko baroit bifeel le' he nmatsao nok Abibi-kase Ana'.”
10 Lalit Uisnenog In Asmana Knino' antaman kau. On nane msa' ahake sonaf neno tunan tuaf es neki kau a'sae 'oi anu'af mese', le' 'laat le'uf. Anbi naan, in naklila' kau koot Yerusalem, es le' Uisnenog In koot knino' naan, le' ansanu neem na'ko Uisnenog anbi sonaf neno tunan.g 11 Koot naan leko le'uf! Anmu'i miu-sine' le' antana' npoi na'ko Uisnenog In pina' ma klaha', on le' fatu intan le' naliim. Tal antee koot naan miu-sine' ok-oke'. 12 Anmu'i lapel amnanut namtetu anfuun natef-tefan koot naan. Anmu'i eno' naek bo'es am nuug. Anmu'i ahake sonaf neno tunan tuaf bo'es am nuug amsa', le' anpao eno' een naan. Anbi eno' een naan, malula' uuf bo'es am nuug na'ko pah Israel sin kaank een.h 13 Eno' naek teen nail noi pesit neno-saet. Tenu nail noi pesit neno-tees. Tenu nail noi pesit aliij. Ma tenu ntenin nail noi pesit ane'ug.i 14 Lapel naan nahakeb anbi fatu fanderen anaek-anaek afgua' bo'es am nuug. Anbi fatun naan mese-mese malula' kanaf tuaf mese-mese na'ko haef tuaf bo'es am nuug. Haef een naan es le' antuthae Abibi-kase Ana' tabug In anbi pah-pinan.
15 Lalit tuaf ahake le' naguab noi kau, annaa' hau letis amnatu' nono mese', he nleti koot naan in eno' naek ma in lapel.j 16 In anleti nahunun na'ko koot naan in lapel le' on le' segi empat. In amnanun ma meinuan, ma alatan huma' mese', es le' kilog nifun nuug natun nuug am bo' nuug (2.220).k 17 Lalit in anleti lapel naan in mafaun, metel bo' nee mniim, natuin mansian in hau letis.l 18 Lapel naan, sin anmo'el na'ko fatu alimat, le' in kanan, yaspis. Ma ale' kanan saa'-saa' le' anbi koot naan in nanan, sin anmo'el na'ko mnatu afa' le' nakenon on le' anino.
19 Fatu fanderen afgua' bo'es am nuug le' naan, anmo'e sin na'kon fatu alimat huma'-huma' le' ma'upa'. Fatu ahunut naan, anpake fatu yaspis le' anpiin masan matel. Fatu nomol nuug, anpake fatu nilam le' anpiin masan mate-muti'. Fatu nomol tenu ee anpake fatu mirah le' anpiin masan mee'. Fatu nomol haa ee anpake fatu samrut le' anpiin masan matel. 20 Fatu nomol niim, anpake fatu unam le' nmapeni' soklat-muti'. Fatu nomol nee' ee, anpake fatu sardius le' anpiin masan mee'. Fatu nomol hitu ee, anpake fatu ratna cempaka le' anpiin masan molo-mnatu'. Fatu nomol fanu ee, anpake fatu beril le' anpiin masan meet nuus ma matel. Fatu nomol seo' ee, anpake fatu krisolit le' anpiin masan molo'-molo'. Fatu nomol bo' es, anpake fatu krisopras le' anpiin masan mate muti'. Fatu nomol bo'es am mese ee, anpake fatu lasuardi le' anpiin masan meet nuus on le' oe tasij. Ma fatu nomol bo'es am nuug ee, anpake fatu kecubung le' anpiin masan mtaas uki napaf. 21 Ma eno' naek bo'es am nuug naan, anmo'e sin na'kon mutiara fua' bo'es am nuug. Eno' mese ate anmo'el nok mutiara fua' es. Ma koot naan in laal uuf, anmo'el na'ko mnatu afa' le' naliim on le' anino.m
22 Mes au 'ail, ka tiit fa ume onen anbi koot naan, natuin Uisnenog akuasat anneis-neis, nok Abibi-kase Ana' anbin naan piut-piut. Es on naan mansian sin nabesan an'anin haa Sin. 23 Koot naan amsa' ka npaluu fa manas ma funan he ntana', natuin Uisnenog In masan antana' anbi balel naan. Ma Abibi-kase Ana' naan anjali on le' paku apinat.n 24 Atoni na'ko ale' kanan uuf ma pah anbi pah-pinan, of neman ma antaam noin miu-sine' naan. Kesel sin abiten pah-pinan amsa', neman ma neki sin amu'ik een le' matani' anbin balel naan.o 25 Anbi balel naan ka tiit atteni fa tabug faij. Es on naan ka tpaluu fa he ta'eek eno' he ttaam toi koot. 26 Sin of antaam nekin noin koot naan, ale' kanan saa'-saa' le' naleek, ma ale' lasi holmaat na'kon pah ma negara nbi pah-pinan.p 27 Mes tuaf le' ka nabe'i fa he ntaam noi balel naan, es le' amaufinut een ok-oke', on le' afuat, amakaket, ma aputa-kliun. Tuaf le' nabe'i antaam, es le' aal tuaf-tuaf le' in kanan malula' et Abibi-kase Ana' naan In sulat, le' anluul kanaf na'ko tuaf amonit le' natuin Uisnenog piut-piut.q