Noel ma haug le' nekin lasi 'honis
22
Lalit ahake na'ko sonaf neno tunan tuaf es naklila' kau noel mese', le' oel ansai nbi balel naan neki lasi 'honis. Oel naan knino on le' anino. In ansai npoi na'ko Uisnenog nok Abibi-kase Ana' Sin atoko' plenat.a 2 Ma in ansai noi laal uuf in atnanan anbi koot naan. Anbi noel naan in pani mpaan, anmu'i naan haug uu' mese le' neki lasi 'honis. Hau honis naan nafgua toon mese ate haef bo'es am nuug. Fuunn es', nafgua haef es. In noon of anjali malog he npaloli ale' kanan uuf ma pah anbi pah-pinan.b 3 Mes ale' saa'-saa' le' Uisnenog antita' napoitan sin ma nfee kasat noi sin, ka tiit sin fa nbin koot naan. Abiten koot naan, aal es le' Uisnenog ma Abibi-kase Ana' le' antuun Ok ma naplenat Een anbin Sin atoko' plenat, ma Sin aan lelu' ma aan leka' sin le' nabesan ma naluli' een noi Sin.c4 Sin aal-ala sin nabe'i nail niit Uisnenog In human ma In masan. Ma Uisnenog In kanan malula' et sin iilk een mese-mese'. 5 Anbi balel naan, ka tiit tani fa tabug faij. Es on naan Uisnenog Inin, sin ka npaluun fa manas, ai' pakug, natuin Uisnenog kuun es antana' koot naan. Sin of annaa' nokan aplenat anbi balel naan tal antee nabal-baal.d
Usif Yesus nasopub In lasi manpaa'
6 Lalit ahake naan natoon kau mnak, “Ale' saa'-saa' le' au utoon ko sin le' iij, lo namneo. Ale' mansian of anpalsain saa'-saa' le' au uguab sin naan. Faijan unu', Uisnenog anpake In Asmanan he natoon In A'an ma Plenat sin noi In mafefa knino' een. Mes tabug iij, In anpake In ahake na'ko sonaf neno tunan he natoon noi In aanh een anmatoom nok ale' kanan lasi le' ka loog fa nteni te, lo he anjalin.”
7 Lalit Nai Yesus naguab am nak, “Mimnau! Ka loog fa nteni te, Au 'uum eeh. Anbi sulat le' iij, anluul nani ale' saa'-saa' le' he anjalin. Ale' kanan mansian le' natuin sulat iij in lulat sin, sin of es le' an'ua lekon.”
8 Aluul sulat iij, es le' au, nai Yohanis kau. Au le' iij, es le' a'neen ulali, ma 'ail 'iit kuuk lasin le' iij ok-oke'. A'neen ulali on nane, au 'li'tuu he ubesan a'bi ahake sonaf neno tunan in haen. Fun in es le' naklila' lasin le' iij ok-oke' noi kau. 9 Mes in nakain kau mnak, “Hoi! Ho naik ammo'e on naan! Ho lo he mubesan moi Uisnenog kuun. Naika mubesan kau. Fun au le' iij, ala aan lelu aan leka' on le' ho, ma ho aom-abjaan sin le' anjalin In mafefa knino' een, ma tuaf abjaan anteni' le' anmo'e natuin saa'-saa' le' malula' anbin sulat iij in nanan.
10 Ho naik mu'nifa' sulat le' iij in nesan moi tuaf abjaan. Natuin ka loog fa te, saa'-saa' le' malula' anbi sulat iij, lo he anjalin.
11 Ale' kanan mansian le' anhainisib,
amkolen sin he sin anhainisin piut-piut.
Mes ale' kanan mansian le' anmonin nok aknino',
sin ala sin lo he anmonin nok aknino' piut.
Ale' kanan mansian le' anmaufinun,
amkolen sin he nmaufinun piut.
Mes ale' kanan mansian le' anmo'en alekot,
sin lo he anmo'en lasi alekot piut-piut.”e
12 Lalit Nai Yesus naguab anteni mnak, “Mimnau milek-leko'! Natuin ka loog fa nteni, Au 'uum eeh. Au of a'balas 'oi tuaf-tuaf, utuin saa'-saa' le' sin anmo'e nalali sin.f
13 Au le' iij,
Alfa antee Omega.
Au le' iij,
A antee Z.
Ale' kanan saa'-saa' na'uun ma naba'an anbi Kau,
anmulai na'ko ahunut tal antee amunit.g
14 Tuaf-tuaf le' anfase nalali sin paken, an'ua lekon.
Fun sin of napenin hak he ntaman anpe'o eno' naek noin koot naan in nanan.
Tuaf-tuaf le' anmonin nalalin nok aknino', an'ua lekon.
Fun sin of napenin meinuan he nbukae hau fgua honis le' neki 'honis nabal-baal.h
15 Mes tua teta', ka nabe'i fa he ntaman noin balel naan.
Le' ka Uisnenog Inin fa, ka nabe'i fa he natguan anbin balel naan.
Sin es le' tuaf-tuaf le' ka npalsain fa noin Uisnenog,i
amakaket, afuat,
amalolot, alaut,
ma aputa-kliun.
Sin ala sin le' naan, ka nabe'i fa he ntaman.
Sin ala sin le' naan, mautu he sin anbin mone'.
16 Au le' iij, Nai Yesus Kau. Au 'sonu' Au ahake na'ko sonaf neno tunan he natoon lasin le' iij ok-oke', he hi mnao mitoon Au lasi manpaa' noi jema'at balel hiit.
Au le' iij, kesel nai Daut in sufan-ka'un.
Au le' iij, Kesel le' anaa' aplenat.
Au mantahak ee, miu-sine' le'uf,
nahuum on le' Faaf Nomel.
Au mantahak ee, matani' le'uf,
nahuum on le' Faaf Nomel.”j
17 Uisnenog In Asmana Knino' anhone mnak, “Amkoen om uum moi ii!”
Baroit bifeel naan no'en am nak, “Atkoen ok teem nai!”
Maut he tuaf-tuaf le' anneen anhone msa' am nak, “Amkoen om uum nai!”
Maut he tuaf-tuaf le' anmeno oel, ankoen ok neman he ninun oel.
Maut he tuaf-tuaf le' anlomin he ninun oel le' neki lasi 'honis,
neman he nsimo ma ntopu nai!
Tuaf nabe'i naiti oel naan,
luum-luum ahaa.
Tuaf nabe'i ninu oel naan,
ma ka nfee fa loit.k
Nai Yohanis in lasi manpaa' amunit
18 Au le' iij, nai Yohanis kau. Au umnauba ki ala ki le' of amneen ma mtae saa'-saa' le' Uisnenog anfai nalali sin noi kau anbi sulat le' iij, on ii: kalu anmu'i tuaf le' ansato saa'-saa' anteni noi sulat le' iij, Uisnenog of anhukum ma napeni amle'ut hiit le' In nasanut sin noin pah-pinan naan. 19 Ma kalu anmu'i tuaf-tuaf le' nabati ma nabaun saa'-saa' na'ko sulat le' iij, Uisnenog of naiti nani in hak, he naik antaam nok anbi koot knino', ma in naik anbukae hau fgua honis le' neki lasi 'honis abaal-balat.l
20 Nai Yesus kuun es le' nekin On nasoitan ma naklila' lasin le' iij ok-oke'. In anba'an amsa' am nak, “Lo teeb! Ka loog fa lee na te, Au 'uum een.”
Usi' Yesus, amkoen Om uum nai!
21 Au 'toti he Usif Yesus naklila' In nekan alekot noi Inin ok-oke'. Tebes namneo. Amin.
Na'ko au,
Nai Yohanis kau.